দুয়োগৰাকী বিজেপি নেতা-নেত্ৰীৰেই দোষ একেটাই- হজৰত মহম্মদৰ বিৰুদ্ধে মন্তব্য কৰা। কিন্তু ইমানৰ পিছতো গ্ৰেপ্তাৰ নোহোৱাকৈ সাৰি গৈছে নুপুৰ শৰ্মা। অথচ গ্ৰেপ্তাৰ হৈছে তেলেংগানাৰ বিজেপি বিধায়ক ৰাজা সিং। নুপুৰ শৰ্মাক বিজেপিয়েই ৰক্ষণা-বেক্ষণ দি থকা বুলি বিভিন্ন মহলত আলোচনা হৈ আছে। নুপুৰ শৰ্মাৰ মন্তব্যৰ বাবেই দেশৰ বিভিন্ন প্ৰান্তত হিংসাৰ জুই জ্বলিছিল, নিহত হৈছিল একাধিক লোক।
আনকি ভাৰতক তেলৰ যোগান ধৰা মধ্য প্ৰাচ্যৰ দেশসমূহেও নুপুৰ শৰ্মাৰ মন্তব্যৰ বাবে ভাৰতৰ বিৰুদ্ধে অৰ্থনৈতিক অৱৰোধৰ হুংকাৰ দিছিল। ইমানৰ পিছতো অৱশ্যে আজিও মুকলি আকাশৰ তলতে আছে নুপুৰ শৰ্মা।
এখন নহয়, দুখন নহয় দেশৰ কেইবাখনো ৰাজ্যত হজৰত মহম্মদৰ বিৰুদ্ধে কৰা মন্তব্যৰ বাবে বিজেপিৰ বহিষ্কৃত নেত্ৰী নুপুৰ শৰ্মাৰ বিৰুদ্ধে ৰুজু হৈছিল গোচৰ।সেই গোচৰসমূহ একত্ৰিত কৰি দিল্লীলৈ অনাৰ বাবে নুপুৰ শৰ্মাই উচ্চতম ন্যায়ালয়ত আবেদন জনাইছিল।
উচ্চতম ন্যায়ালয়ে সেই আবেদনৰ শুনানি গ্ৰহণ কৰি বিৰুদ্ধে দেশৰ বিভিন্ন থানাত নুপুৰ শৰ্মাৰ বিৰুদ্ধে থকা সকলো গোচৰ একেলগ কৰি দিল্লীলৈ স্থানান্তৰ কৰাৰ নিৰ্দেশ দিছিল। পশ্চিম বংগ, কৰ্ণাটক, উত্তৰ প্ৰদেশ, জম্মু-কাশ্মীৰ আৰু অসম আৰক্ষীয়ে বহিষ্কৃত বিজেপি নেতাজনৰ বিৰুদ্ধে গোচৰ ৰুজু কৰিছে।
নুপুৰে সকলো গোচৰতে তেওঁৰ গ্ৰেপ্তাৰৰ বিষয়ত স্থগিতাদেশ বিচাৰি উচ্চতম ন্যায়ালয়ত আবেদন কৰিছিল। নুপুৰে সকলো গোচৰ একেলগে সংযুক্ত কৰিবলৈও আবেদনত উল্লেখ কৰিছিল। বহিষ্কৃত বিজেপি নেতাগৰাকীয়ে কৈছিল যে তেওঁৰ জীৱনৰ প্ৰতি ভাবুকি আহিছে ।
সেয়েহে তেওঁ বিভিন্ন ৰাজ্যলৈ গৈ আইনীভাৱে যুঁজ দিয়াটো সম্ভৱ নহয়। নুপুৰ শৰ্মাই দাখিল কৰা আবেদনৰ ভিত্তিত উচ্চতম ন্যায়ালয়ে কয় যে যিবোৰ ৰাজ্যত গোচৰ ৰুজু কৰা হৈছে সেইবোৰ গোচৰ দিল্লীলৈ স্থানান্তৰ কৰিব লাগে। ইয়াৰ অৰ্থ হৈছে যে বিৰোধী শাসিত ৰাজ্যসমূহৰ আৰক্ষীয়ে আৰু নুপুৰৰ গোচৰৰ তদন্ত কৰিব নোৱাৰিব। তেওঁ আনকি দিল্লীৰ বাহিৰৰ আন ৰাজ্যতো গোচৰৰ বাবে উপস্থিত হ’ব নালাগিব।
হজৰত মহম্মদ বিৰুদ্ধে তেওঁৰ বিতৰ্কিত মন্তব্যৰ বাবে নুপুৰক দলৰ পৰা নিলম্বিত কৰা হৈছিল। অৱশ্যে নুপুৰৰ বক্তব্যৰ পৰিপ্ৰেক্ষিতত দেশৰ বিভিন্ন প্ৰান্তত বিক্ষোভ তথা হিংসাত্মক ঘটনা সংঘটিত হৈছিল।
উচ্চতম ন্যায়ালয়ে নুপুৰ শৰ্মাক কৈছিল যে “দেশত যি ঘটি আছে তাৰ বাবে তেওঁৱেই একমাত্ৰ দায়ী”। তদুপৰি উচ্চতম ন্যায়ালয়ে নুপুৰ শৰ্মাক দেশৰ ওচৰত ক্ষমা বিচাৰিব লাগে বুলি মন্তব্য কৰিছিল।
নুপুৰ শৰ্মাই কাণ্ডই দেশ তথা বিদেশ জ্বলাই থকাৰ সময়তে ২ আগষ্টৰ নিশা সামাজিক মাধ্যমত এটা ভিডিঅ’ আপলোড কৰা পয়গম্বৰ হজৰত মহম্মদ বিৰোধী এটা মন্তব্যৰ বাবে গ্ৰেপ্তাৰ হৈছিল বিজেপিৰ এজন বিধায়ক। তেলেংগানাৰ বিজেপি বিধায়ক ৰাজা সিঙে হজৰত মহম্মদৰ বিৰুদ্ধে অপমানজনক মন্তব্য কৰাৰ পিছতে প্ৰতিক্ৰিয়াৰ সৃষ্টি হৈছিল।
হায়দৰাবাদ আৰক্ষীয়ে বিজেপিৰ বিধায়ক ৰাজা সিঙৰ বিৰুদ্ধে ভাৰতীয় সংবিধানৰ দণ্ডবিধি ধাৰা ২৯৫, ৫০৫ আৰু ১৫৩এ ধাৰা আৰোপ কৰিছে।