আইনৰ ছাত্ৰ-ছাত্ৰীৰ আচৰণ নিয়ন্ত্ৰণ কৰাৰ কোনো বিধিগত ক্ষমতা ভাৰতীয় বাৰ কাউন্সিল অফ ইণ্ডিয়াৰ নাই। বৃহস্পতিবাৰে উচ্চতম ন্যায়ালয়ে এই কথা স্পষ্ট কৰি দিয়ে। আজিৰ ৰায়দানত দেশৰ শীর্ষ ন্যায়ালয়ে কয় যে যদি শিক্ষার্থীসকলৰ বিৰুদ্ধে কোনো অনুশাসনমূলক ব্যৱস্থা গ্রহণ কৰিবলগীয়া হয় তেন্তে সংশ্লিষ্ট শিক্ষানুষ্ঠানখনেই তেওঁলোকৰ নিজা নীতি-নিয়ম অনুসৰি ল’ব লাগিব৷
বৃহস্পতিবাৰে মুখ্য ন্যায়াধীশ সূৰ্য কান্ত আৰু ন্যায়াধীশ জয়মাল্য বাগচি আৰু ভি মোহনেৰে গঠিত বিভাগীয় বিচাৰপীঠে এই গুৰুত্বপূৰ্ণ নিৰ্দেশ দিয়ে। হায়দৰাবাদৰ ‘নালছাৰ ইউনিভাৰ্চিটি অৱ ল’ৰ ছাত্ৰ-ছাত্ৰীৰ মাজত হোৱা বিবাদৰ শুনানি গ্ৰহণ কৰি উচ্চতম ন্যায়ালয়ে এই নিৰ্দেশ জাৰি কৰিছে। বিশ্ববিদ্যালয়খনৰ সমাৱৰ্তন অনুষ্ঠানত মুখ্য ন্যায়াধীশৰ অংশগ্ৰহণৰ প্ৰস্তাৱত আপত্তি জনাইছিল সেই বিশ্ববিদ্যালয়ৰ ছাত্ৰ-ছাত্ৰীসকলে।
সেই ঘটনাৰ পিছতে আইনী বৃত্তি আৰু আইনী শিক্ষা নিয়ন্ত্ৰণ কৰা বিধিগত সংস্থা ভাৰতীয় বাৰ কাউন্সিলে যোৱা মাহত এক নিৰ্দেশ জাৰি কৰিছিল। ইয়াত কোৱা হৈছিল যে বিশ্ববিদ্যালয়ৰ অনুষ্ঠানত মুখ্য ন্যায়াধীশৰ অংশগ্ৰহণৰ বিৰুদ্ধে থিয় দিয়াৰ বাবে ২০২৬ চনৰ বেটচৰ ‘নালছাৰ’ ছাত্ৰ-ছাত্ৰীসকলক যাতে তালিকাভুক্ত কৰা নহয়। ব্যাপক সমালোচনাৰ সন্মুখীন হৈ ভাৰতীয় বাৰ কাউন্সিলে এই নিৰ্দেশ প্ৰত্যাহাৰ কৰাৰ লগতে ইয়াৰ অধ্যক্ষ মনন কুমাৰ মিশ্ৰইও ছাত্ৰ-ছাত্ৰীৰ ওচৰত ক্ষমা বিচাৰে।
নালছাৰ বিতৰ্কৰ পৰিপ্ৰেক্ষিতত ভাৰতীয় বাৰ কাউন্সিলে জাৰি কৰা দুয়োটা অধিসূচনা বিচাৰপীঠে বাতিল কৰে। অৱশ্যে জাৰি কৰাৰ কেইঘণ্টামানৰ ভিতৰতে অধিসূচনাসমূহ প্ৰত্যাহাৰ কৰা হৈছিল।
উচ্চতম ন্যায়ালয়ে স্পষ্ট কৰি দিলে যে ভাৰতীয় বাৰ কাউন্সিলৰ এনে অনুশাসনমূলক ব্যৱস্থা গ্ৰহণৰ কোনো ক্ষমতা নাই। আদালতে উল্লেখ কৰে যে আইনৰ ছাত্ৰ-ছাত্ৰীসকলে অধিবক্তা হিচাপে নামভৰ্তি কৰাৰ পিছতহে অনুশাসনমূলক ব্যৱস্থা গ্ৰহণ কৰাৰ আইনী অধিকাৰ কাউন্সিলৰ হাতত আছে।
ইয়াৰ নিৰ্দেশত উচ্চতম ন্যায়ালয়ে কয়, “আমাৰ মতে ভাৰতীয় বাৰ কাউন্সিলক বিধিগত সংস্থা হিচাপে গঠন কৰা অধিবক্তা আইন, ১৯৬১ৰ অধীনত ভাৰতীয় বাৰ কাউন্সিল বা কোনো ৰাজ্যিক বাৰ কাউন্সিলক আইনৰ ছাত্ৰ-ছাত্ৰীৰ বিৰুদ্ধে অনুশাসনমূলক ব্যৱস্থা গ্ৰহণৰ কোনো প্ৰত্যক্ষ বা পৰোক্ষ ক্ষমতা প্ৰদান কৰা হোৱা নাই। এনে ক্ষমতা প্ৰয়োগ কৰাৰ পূৰ্বচৰ্ত হ’ল যিকোনো এজন আইনৰ স্নাতকক উক্ত আইনৰ অধীনত অধিবক্তা হিচাপে নথিভুক্ত কৰা।”
বিচাৰপীঠে লগতে কয়, “ছাত্ৰ-ছাত্ৰীৰ ক্ষেত্ৰত কেৱল তেওঁলোকৰ মূল শিক্ষা প্ৰতিষ্ঠান বা সেই প্ৰতিষ্ঠানৰ নিয়ম/উপ-বিধি অনুসৰি নিৰ্ধাৰণ কৰা কৰ্তৃপক্ষইহে অনুশাসনমূলক ব্যৱস্থা গ্ৰহণ কৰিবলৈ যোগ্য। আমি ১৩ আগষ্টৰ সকলো যোগাযোগ বা পৰৱৰ্তী সংশোধিত যোগাযোগ আইনগতভাৱে বাতিল বুলি ঘোষণা কৰিছো। অন্তৱৰ্তীকালীন নিৰ্দেশনা চূড়ান্ত কৰা হ’ল।”
