চৰকাৰী বিষয়াসকলক আদালতত হাজিৰ হ’বলৈ কেতিয়া আৰু কেনেদৰে মাতিব লাগে সেই সন্দৰ্ভত উচ্চতম ন্যায়ালয়ে SOP নিৰ্ধাৰণ কৰিছে। লগতে সৰ্বোচ্চ ন্যায়ালয়ে চৰকাৰী বিষয়াক অপমান নকৰিবলৈ বা তেওঁলোকৰ সাজ-পোছাক আৰু চেহেৰাৰ ওপৰত কোনো মন্তব্য নকৰিবলৈ সকলো উচ্চ ন্যায়ালয়ক সকীয়াই দিয়ে।
উচ্চতম ন্যায়ালয়ে নিজৰ সিদ্ধান্তত কয় যে চৰকাৰী বিষয়াৰ বিৰুদ্ধে অপৰাধমূলক অৱজ্ঞাৰ ক্ষমতা প্ৰয়োগ কৰিব নোৱাৰি। এনে বিষয়াক মাতি অনাৰ বাবে উচ্চ ন্যায়ালয়ৰ এনে আদেশৰ প্ৰক্ৰিয়া সংবিধানে কল্পনা কৰা আঁচনিৰ বিপৰীত।
দৰাচলতে ১৬ আগষ্টত কেন্দ্ৰীয় চৰকাৰে পৰামৰ্শ দিছিল যে কেৱল ব্যতিক্ৰমী ক্ষেত্ৰতহে এজন বিষয়াক ব্যক্তিগতভাৱে হাজিৰ হ’বলৈ আদালতলৈ মাতিব লাগে।
উল্লেখ্য যে এলাহাবাদ উচ্চ ন্যায়ালয়ে এই নিৰ্দেশনা পালন নকৰি উত্তৰ প্ৰদেশৰ দুজন আই এ এছ বিষয়া শ্বাহিদ মঞ্জৰ আব্বাছ ৰিজৱী আৰু সৰ্যু প্ৰসাদ মিশ্ৰক আটক কৰিবলৈ নিৰ্দেশ দিয়াৰ সৈতে উচ্চতম ন্যায়ালয়ৰ এই শুনানিটো জড়িত।
২০ এপ্ৰিলত উচ্চতম ন্যায়ালয়ে গোচৰৰ শুনানি গ্ৰহণ কৰি থকাৰ সময়তে দুয়োজন বিষয়াক শীঘ্ৰে মুকলি কৰি দিয়াৰ নিৰ্দেশ দিছিল। ইয়াৰ পিছত কেন্দ্ৰীয় চৰকাৰে চৰকাৰী বিষয়াৰ হাজিৰ সন্দৰ্ভত উচ্চতম ন্যায়ালয়ত SOP দাখিলৰ বাবে কিছু পৰামৰ্শ দিছিল। সেয়ে, SOP সন্দৰ্ভত আদালতে নিজৰ সিদ্ধান্ত সংৰক্ষণ কৰি ৰাখিছিল।
উচ্চতম ন্যায়ালয়ে কয় যে প্ৰমাণ, সাৰাংশ আদিৰ ক্ষেত্ৰত ব্যক্তিগত উপস্থিতিৰ প্ৰয়োজন হ’ব পাৰে। ইয়াৰ উপৰিও যদিহে শপতনামাৰ জৰিয়তে সমস্যাসমূহ সমাধান কৰিব পৰা যায় তেন্তে এনে ব্যক্তিগত উপস্থিতিৰ প্ৰয়োজন নহ’ব।
প্ৰয়োজন নহ’লে বিষয়াসকলে গোটেই কাৰ্য্যবিধিৰ সময়ছোৱাত থিয় হৈ থাকিব নালাগে। বিষয়াক অপমান কৰাৰ পৰা আদালতে বিৰত থাকিব লাগে।
