নিৰ্বাচনী বণ্ড আঁচনিৰ গোচৰত নৰেন্দ্ৰ মোডী চৰকাৰে উচ্চতম ন্যায়ালয়ত ডাঙৰ আঘাত পালে। উচ্চতম ন্যায়ালয়ৰ মুখ্য ন্যায়াধীশ ডি ৱাই চন্দ্ৰচুড়ৰ নেতৃত্বত গঠিত পাঁচজনীয়া সংবিধান বিচাৰপীঠে বৃহস্পতিবাৰে কয় যে বেনামি নিৰ্বাচনী বণ্ডে সংবিধানত সন্নিৱিষ্ট বাক স্বাধীনতাৰ অধিকাৰ খৰ্ব কৰিছে। সেয়েহে মোডী চৰকাৰে জাৰি কৰা নিৰ্বাচনী বণ্ড আঁচনি অসাংবিধানিক। আৰু সেই আধাৰতে উচ্চতম ন্যায়ালয়ে নিৰ্বাচনী বণ্ড প্ৰকল্প খাৰিজ কৰিলে।
ইয়াৰ লগতে উচ্চতম ন্যায়ালয়ৰ পাঁচজনীয়া সাংবিধানিক বিচাৰপীঠে কয় যে আৰ্থিক অনুদান লাভ কৰাৰ এসপ্তাহৰ ভিতৰত নিৰ্বাচন আয়োগে জনসাধাৰণৰ আগত তথ্য প্ৰকাশ কৰিব লাগিব। অৰ্থাৎ কোনে কিমান টকা দিলে, সেয়া এতিয়া প্ৰকাশ হ’বলৈ গৈ আছে।
উচ্চতম ন্যায়ালয়ৰ পাঁচজনীয়া সাংবিধানিক বিচাৰপীঠে নিৰ্বাচনী বণ্ড গোচৰত সৰ্বসন্মতিক্ৰমে ৰায় দিয়ে। ভাৰতৰ মুখ্য ন্যায়াধীশ ডি ৱাই চন্দ্ৰচুড়, ন্যায়াধীশ সঞ্জীৱ খান্না, ন্যায়াধীশ বি আৰ গাভাই, ন্যায়াধীশ জে বি পাৰ্দিৱালা আৰু ন্যায়াধীশ মনোজ মিশ্ৰক লৈ গঠিত আছিল বিচাৰপীঠখন। যোৱা বছৰৰ ২ নৱেম্বৰত উচ্চতম ন্যায়ালয়ে সেই গোচৰৰ ৰায়দান স্থগিত ৰাখিছিল।
লগতে পঢ়কঃ পানীৰ পৰা প্লাষ্টিক ফিল্টাৰ কৰিব চুম্বকে; খোৱাপানী বিশুদ্ধ কৰিবলৈ নতুন উদ্ভাৱন ‘নেনো-মেগনেট’
উচ্চতম ন্যায়ালয়ে কয় যে বেনামি নিৰ্বাচনী বণ্ড প্ৰদান কৰিলে তাত তথ্যৰ অধিকাৰ আইন আৰু সংবিধানৰ ১৯ (১) (ক) অনুচ্ছেদ উলংঘা হ’ব। উল্লেখ্য যে সংবিধানৰ ১৯ (১) (ক) অনুচ্ছেদৰ অধীনত সকলো নাগৰিককে বাক স্বাধীনতা প্ৰদান কৰা হৈছে।
উচ্চতম ন্যায়ালয়ৰ মুখ্য ন্যায়াধীশে কয় যে নিৰ্বাচনী বণ্ড আঁচনিখন সংবিধানৰ ১৯ (১) (ক) অনুচ্ছেদৰ বিৰুদ্ধে। গতিকে যিবোৰ বেংকে নিৰ্বাচনী বণ্ড জাৰি কৰি আছে, সেইবোৰে তৎক্ষণাত নিৰ্বাচনী বণ্ড জাৰি কৰা বন্ধ কৰক। উচ্চতম ন্যায়ালয়ৰ মুখ্য ন্যায়াধীশে নিৰ্বাচন আয়োগক সেই তথ্য ১৩ মাৰ্চৰ ভিতৰত নিজৰ ৱেবছাইটত প্ৰকাশ কৰিবলৈ নিৰ্দেশ দিছে।
উল্লেখ্য যে ২০১৮ চনৰ ২ জানুৱাৰীত চৰকাৰে নিৰ্বাচনী বণ্ড আঁচনিৰ অধিসূচনা প্ৰকাশ কৰে। কেন্দ্ৰই যুক্তি আগবঢ়ায় যে ৰাজনৈতিক দলসমূহলৈ আৰ্থিক অনুদানৰ ক্ষেত্ৰত স্বচ্ছতা অনাৰ বাবে নগদ ধনৰ বিকল্প হিচাপে নিৰ্বাচনী বণ্ড প্ৰৱৰ্তন কৰা হৈছে। যিকোনো ভাৰতীয় নাগৰিকে নিৰ্বাচনী বণ্ড আঁচনিৰ অধীনত নিৰ্বাচনী বণ্ড ক্ৰয় কৰিব পাৰিব। ব্যক্তিগতভাৱে বণ্ড ক্ৰয়ৰ নিয়ম ৰখা হয়। সেই প্ৰকল্পত যৌথভাৱে বণ্ড ক্ৰয় কৰাৰ নিয়মো ৰখা হয়। দেশৰ বিভিন্ন সংগঠনে নিৰ্বাচনী বণ্ড ক্ৰয় কৰি ৰাজনৈতিক দলসমূহক আৰ্থিক সহায় আগবঢ়াব পাৰে।
লগতে পঢ়কঃ কৃষকৰ প্ৰতিবাদৰ সন্মুখত বেৰিকেড-কন্দুৱা গেছ ব্যৰ্থ; কেন্দ্ৰৰ সৈতে আজি পুনৰ বৈঠক
জনপ্ৰতিনিধিত্ব আইন, ১৯৫১ৰ ২৯ক ধাৰাত পঞ্জীয়ন কৰা ৰাজনৈতিক দল আৰু যিবোৰ দলে অন্তিম লোকসভা বা বিধানসভা নিৰ্বাচনত ভোটদান কৰা মুঠ ভোটৰ এক শতাংশতকৈ কম পোৱা নাই, সেইবোৰ দলেহে নিৰ্বাচনী বণ্ড ক্ৰয় কৰাৰ অনুমতি পাব। চৰকাৰী অধিসূচনা অনুসৰি যোগ্য ৰাজনৈতিক দলসমূহে অনুমোদিত বেংক একাউণ্টৰ জৰিয়তেহে ধন উলিয়াব পাৰিব। তেনে ক্ষেত্ৰত কোনো দলক কাক বা কিমান টকা দিয়া হৈছে সেয়া সম্পূৰ্ণ গোপনে থাকিব।
