ছ’চিয়েল মিডিয়াত লাগ বান্ধ নোহোৱা ভিডিঅ’, অবাঞ্চিত কনটেন্ট আৰু ইউটিউবাৰৰ বিতৰ্কিত মন্তব্য – এই সকলোবোৰৰ বাবে কোন দায়ী? উচ্চতম ন্যায়ালয়ে ‘ইণ্ডিয়াজ গট লেটেণ্ট’ গোচৰৰ শুনানিৰ সময়ত সেই প্ৰশ্নটো চৰ্চালৈ আনিছে। এই সন্দৰ্ভত মুখ্য ন্যায়াধীশ সূৰ্য কান্তই কঠোৰ মন্তব্য কৰে। তেওঁ কয়, “নিজৰ চেনেল খুলিয়ে দায়সৰাৰ পথ নহয়, কোনোবাইতো জবাবদিহি হ’ব লাগিব।”
‘স্বাধীনতাৰ নামত বিকৃতি সহ্য কৰা নহ‘ব‘, কেন্দ্ৰলৈ এক স্পষ্ট বাৰ্তা
শুনানিৰ সময়ত কেন্দ্ৰক প্ৰতিনিধিত্ব কৰি ছলিচিটৰ জেনেৰেল তুষাৰ মেহতাই আদালতত কয় যে সমস্যাটো কেৱল অশ্লীলতা নহয়, বৰঞ্চ গভীৰ ‘বিকৃতি’ৰ। “মুক্ত প্ৰকাশ অমূল্য, কিন্তু ইয়াৰ আৱৰণত বিকৃতি বিয়পাই দিব নোৱাৰি।”
মুখ্য ন্যায়াধীশগৰাকীৰ ওলোটা মন্তব্যত কোৱা হৈছে যে ছ’চিয়েল মিডিয়াত নিজৰ প্লেটফৰ্ম সৃষ্টি কৰি কোনেও জবাবদিহিতাৰ বাহিৰত থাকিব নোৱাৰে।
‘ৰাষ্ট্ৰবিৰোধী’ বিষয়বস্তুক লৈ (এন্টি নেশ্যনেল কনটেন্ট) উদ্বেগ
ন্যায়াধীশ জয়মল্য বাগচিয়ে প্ৰশ্ন উত্থাপন কৰে, “আপলোড কৰা বিষয়বস্তু যদি ৰাষ্ট্ৰবিৰোধী বুলি ধৰা পৰে, তেন্তে ইয়াৰ দায়িত্ব কোনে ল’ব?” আদালতে লগতে উদ্বেগ প্ৰকাশ কৰি কয়, “যদি কন্টেন্ট ভাইৰেল হয়, তেন্তে কৰ্তৃপক্ষই ব্যৱস্থা লোৱাৰ পূৰ্বে লাখ লাখ লোকৰ ওচৰলৈ যায়। ইয়াক কেনেকৈ নিয়ন্ত্ৰণ কৰিব?”
স্বায়ত্তশাসিত ৱেব বিষয়বস্তু নিৰীক্ষণকাৰী? আদালতৰ ইংগিত
মত প্ৰকাশৰ স্বাধীনতাৰ স্বাৰ্থত প্ৰশান্ত ভূষনে সাৱধানতাৰ বাৰ্তা দিয়ে। ইতিহাস, ভূপ্ৰকৃতি বা ব্যাখ্যাৰ ওপৰত বিতৰ্কিত আলোচনাক ‘ৰাষ্ট্ৰ বিৰোধী’ বুলি আখ্যা দিয়াৰ বিপদৰ বিষয়ে তেওঁ ব্যাখ্যা কৰে। অৱশ্যে তেওঁৰ কিছুমান উদাহৰণত কেন্দ্ৰই আপত্তি কৰে।
এনে পৰিস্থিতিত মুখ্য ন্যায়াধীশে কয়, “এই কাৰণেই আমি স্বায়ত্তশাসিত নিয়ন্ত্ৰক সংস্থাৰ কথা ভাবিছো। শিশুসকলৰো নিজৰ মতামত প্ৰকাশ কৰাৰ অধিকাৰ আছে – কিন্তু সমাজখনক দায়বদ্ধ কৰাটোও গুৰুত্বপূৰ্ণ।”
আদালতৰ পৰামৰ্শ –
বিষয়বস্তু আৰম্ভ কৰাৰ আগতে স্পষ্ট আৰু দীঘলীয়া সতৰ্কবাণী
প্ৰয়োজন হ’লে বয়স পৰীক্ষণৰ দৰে ব্যৱস্থা (আধাৰৰ দৰে)
ন্যায়াধীশ, সাংবাদিক, প্ৰযুক্তি বিশেষজ্ঞক লৈ স্বতন্ত্ৰ নিয়ন্ত্ৰণ ব্যৱস্থা
ইয়াকে লৈ উচ্চতম ন্যায়ালয়ে কেন্দ্ৰক চাৰি সপ্তাহৰ ভিতৰত নিয়মৰ প্ৰস্তাৱ দিবলৈ নিৰ্দেশো দিয়ে।
ব্যক্তিগত অপমান আৰু শাৰীৰিক অক্ষমতাৰ ওপৰত মন্তব্য, সময় ৰাইনাৰ বিতৰ্কিত ভিডিঅ’টোও শুনানিৰ সময়ত আলোচনালৈ আহে। আদালতে জানিব বিচাৰে, “সেই ল’ৰাটোৱে এতিয়া সঠিক আচৰণ কৰিছেনে?” এছ এম এ ৰোগীক প্ৰতিনিধিত্ব কৰা অধিবক্তাগৰাকীয়ে কয় যে ৰাইনাৰ মন্তব্যত বহু ৰোগী আৰু পৰিয়ালক অপমান কৰা হৈছে। যদিও ৰাইনাই ক্ষতিপূৰণ হিচাপে টকা দিব বিচাৰিছে, তথাপিও তেওঁলোকে নাকচ কৰিছে। তেওঁলোকে কৈছে, “আমি টকাৰ বাবে অহা নাই, মৰ্যাদাৰ বাবে আহিছো।”
মুখ্য ন্যায়াধীশগৰাকীয়ে পৰ্যবেক্ষণ কৰে, “কেন্দ্ৰই এছ চি/এছ টি আইনৰ দৰে কঠোৰ শাস্তিযোগ্য আইনৰ কথা চিন্তা কৰিব পাৰে। কাৰো মৰ্যাদা হৰণ কৰি হাস্যৰস চলিব নোৱাৰে।”
বিচাৰপীঠে সময় ৰাইনাক এছ এম এ ৰোগীৰ বাবে এক বিশেষ কাৰ্যসূচী আয়োজন কৰিবলৈ পৰামৰ্শ দিয়ে। তেওঁ পৰামৰ্শ দিয়ে, “তেওঁলোকৰ কৃতিত্বক উজ্জ্বল কৰি তোলক। মানুহক সন্মান দিয়ক।”
