দেশৰ ইতিহাসৰ এক কলংকিত অধ্যায় গুজৰাটৰ নৃশংস গোধৰা কাণ্ডৰ সময়ত সংঘটিত হোৱা বিলকিছ বানো দলবদ্ধ ধৰ্ষণ কাণ্ড তথা তেওঁৰ পৰিয়ালক হত্যা কৰাৰ অপৰাধত দোষী সাব্যস্ত হোৱা ১১ গৰাকী অপৰাধীৰ মুক্তিক প্ৰত্যাহ্বান জনাই বানোৱে উচ্চতম ন্যায়ালয়ত দাখিল কৰা আবেদনৰ শুনানিৰ বাবে এখন বিশেষ বিচাৰপীঠ গঠন কৰা হ’ব।
আজি মুখ্য ন্যায়াধীশ ডি ৱাই চন্দ্ৰচূড়, ন্যায়াধীশ পি এছ নৰসিংহ আৰু জে বি পাৰ্দিৱালাৰ বিচাৰপীঠে বানোক প্ৰতিনিধিত্ব কৰা অধিবক্তা শোভা গুপ্তাৰ জৰিয়তে নতুন বিচাৰপীঠ গঠন কৰা হ’ব বুলি বিলকিছ বানোক প্ৰতিশ্ৰুতি দিয়ে। অধিবক্তা গুপ্তাই জৰুৰী শুনানিৰ বাবে আহ্বান জনাই এখন নতুন বিচাৰপীঠ গঠনৰ প্ৰয়োজনীয়তাৰ বিষয়ে ন্যায়ালয়ত উল্লেখ কৰিছিল।
ইতিপূৰ্বে যোৱা ২৪ জানুৱাৰীত বানোৰ আবেদনৰ শুনানি গ্ৰহণৰ বাবে নিৰ্ধাৰণ কৰা হৈছিল যদিও উচ্চতম ন্যায়ালয়ৰ সংশ্লিষ্ট ন্যায়াধীশসকলে পাঁচ জনীয়া সংবিধান বিচাৰপীঠৰ অংশ হিচাপে ইচ্ছামৃত্যু সম্পৰ্কীয় আন এক বিষয়ৰ শুনানি গ্ৰহণ কৰি থকাৰ বাবে বানোৰ আবেদনৰ শুনানি গ্ৰহণ কৰিব পৰা হোৱা নাছিল।
দোষীৰ মুক্তিক প্ৰত্যাহ্বান জনোৱা আবেদনৰ উপৰিও বানোৱে তেওঁৰ বিৰুদ্ধে সংঘটিত অপৰাধত দোষী সাব্যস্ত হোৱা এগৰাকী অপৰাধীৰ আবেদনৰ ওপৰত উচ্চতম ন্যায়ালয়ৰ পূৰ্বৰ আদেশৰ পুনৰীক্ষণ বিচাৰি আন এক পৃথক আবেদন দাখিল কৰিছিল। কিন্তু বানোৱে দাখিল কৰা এই পুনৰীক্ষণ আবেদন খাৰিজ কৰিছিল উচচতম ন্যায়ালয়ে।
উল্লেখ্য যে ২০০২ চনৰ গুজৰাটৰ নৃশংস গোধৰা সাম্প্ৰদায়িক সংঘৰ্ষৰ সময়ত সেই সময়ৰ ২১ বৰ্ষীয় বিলকিছ বানোক দলবদ্ধ ধৰ্ষণ কৰা হৈছিল। সেই সময়ত বানো আছিল ৫ মহীয়া গৰ্ভৱতী। তদুপৰি বানোৰ তিনি বছৰীয়া কন্যাকে ধৰি পৰিয়ালৰ ৯ জন সদস্যক হত্যা কৰিছিল দুৰ্বৃত্তৰ দলটোৱে।
২০০৮ চনত আদালতে বিলকিছ বানো ধৰ্ষণ তথা হত্যাৰ এই গোচৰত ১১ গৰাকী অভিযুক্তক দোষী সাব্যস্ত কৰি আজীৱন কাৰাদণ্ডৰে দণ্ডিত কৰিছিল যদিও ১৫ আগষ্টত গুজৰাট চৰকাৰে আটাইকেইগৰাকী ধৰ্ষণকাৰীকে মুক্তি দিছিল।
যোৱা ১৫ আগষ্ট অৰ্থাৎ স্বাধীনতা দিৱসত গুজৰাট চৰকাৰে পূৰ্বৰ ৰেমিছন নীতিৰ আধাৰত দোষীক মুকলি কৰি দিয়াৰ পিছত দেশজুৰি ব্যাপক ক্ষোভৰ সৃষ্টি হৈছিল। বিশেষকৈ ধৰ্ষণকাৰী অপৰাধীসকলক কাৰাগাৰৰ পৰা মুকলি কৰি দিয়াৰ পিছত এক হিন্দুত্ববাদী সংগঠনে নায়কৰ দৰে আদৰণি জনোৱাক লৈ তীব্ৰ প্ৰতিক্ৰিয়াৰ সৃষ্টি হৈছিল।
ৰেমিছন নীতিৰ অধীনত গুজৰাট চৰকাৰে ১১ গৰাকী দোষীক মুকলি কৰাৰ পদক্ষেপ গ্ৰহণ কৰাৰ পিছত কেন্দ্ৰয়ো এই মুক্তিৰ গতি দ্ৰুত কৰি দুসপ্তাহৰ ভিতৰতে দোষীৰ মুক্তিৰ পথ মুকলি কৰি তুলিছিল। গুজৰাট চৰকাৰৰ এই সিদ্ধান্তই সমগ্ৰ দেশজুৰি তীব্ৰ চাঞ্চল্যৰ সৃষ্টি কৰাৰ পিছতেই শীৰ্ষ আদালতৰ দ্বাৰস্থ হৈছিল কেইবাগৰাকীও মহিলা কৰ্মী।
ইয়াৰ পাছতে বিলকিছ বানোৱে নিজেই দোষীৰ এই মুক্তিৰ বিৰোধিতা কৰি উচ্চতম ন্যায়ালয়ত এক আবেদন দাখিল কৰিছিল।
