দিল্লী উচ্চ ন্যায়ালয়ৰ ন্যায়াধীশ যশৱন্ত ভাৰ্মাৰ বাসগৃহত উদ্ধাৰ হোৱা নগদ ধন সন্দৰ্ভত শুকুৰবাৰে উচ্চতম ন্যায়ালয়ে এক গুৰুত্বপূৰ্ণ আবেদনৰ শুনানি গ্ৰহণ কৰিবলৈ সাজু হৈছে।
উচ্চতম ন্যায়ালয়ৰ অধিবক্তা মেথিউ নেডুমপাৰাই দাখিল কৰা এই আবেদনখনত এখন এফআইআৰৰ পঞ্জীয়ন বিচাৰিছে আৰু এই বিষয়টোৰ তদন্তৰ বাবে তিনিজনীয়া ন্যায়াধীশ সমিতি গঠন কৰাটো অপ্ৰয়োজনীয় বুলি যুক্তি আগবঢ়াইছে। বৰঞ্চ আৰক্ষীৰ নেতৃত্বত ইয়াৰ তদন্তৰ আহ্বান জনাইছে।
ন্যায়াধীশ অভয় এছ ওকা আৰু ন্যায়াধীশ উজ্জ্বল ভূঞাৰে গঠিত বিচাৰপীঠে এই শুনানি গ্ৰহণ কৰিব। এই আবেদনত চৰকাৰক ন্যায়িক মানদণ্ড আৰু জবাবদিহিতা বিধেয়ক, ২০১০ (Judicial Standards and Accountability Bill, 2010)পুনৰ বিবেচনাকে ধৰি ন্যায়িক দুৰ্নীতি ৰোধৰ বাবে ফলপ্ৰসূ পদক্ষেপ গ্ৰহণ কৰিবলৈও আহ্বান জনোৱা হৈছে।
ইপিনে, দিল্লী অগ্নিনিৰ্বাপক বাহিনীৰ সঞ্চালক অতুল গাৰ্গক ছয় ঘন্টা আৰক্ষীৰ সোধা-পোছাৰ অন্তত তেওঁৰ বক্তব্য লিপিবদ্ধ কৰিছে। চলি থকা তদন্তত তেওঁৰ সাক্ষ্যক এক গুৰুত্বপূৰ্ণ অংশ হিচাপে দেখা গৈছে।
উল্লেখ্য যে ন্যায়াধীশ যশৱন্ত ভাৰ্মাৰ বাসগৃহত অগ্নিকাণ্ড সংঘটিত হোৱাৰ পিছতে এই বিতৰ্কৰ সৃষ্টি হয়। ঘটনাৰ সময়ত তেওঁ ঘৰত নথকাৰ সময়তে ঘটনাস্থলীত জ্বলি যোৱা টকাৰ নোট উদ্ধাৰ হোৱা বুলি দাবী উত্থাপন হয়। অৱশ্যে পিছত দিল্লী অগ্নিনিৰ্বাপক বাহিনীৰ মুৰব্বীয়ে কয় যে জুই নিৰ্বাপন কৰাৰ সময়ত কোনো নগদ ধন আৱিষ্কাৰ হোৱা নাছিল।
ইয়াৰ পিছতো ন্যায়াধীশগৰাকীৰ বাসগৃহৰ বাহিৰত জ্বলি যোৱা নোট উদ্ধাৰ হোৱাৰ অভিযোগ উত্থাপন হোৱাৰ ফলত গোচৰটোক কেন্দ্ৰ কৰি ৰাজনৈতিক আৰু আইনী বিতৰ্ক তীব্ৰতৰ হৈ পৰে। এতিয়া উচ্চতম ন্যায়ালয়ে হস্তক্ষেপ কৰিবলৈ সাজু হোৱাৰ লগে লগে সকলোৰে দৃষ্টি আজিৰ শুনানিৰ ওপৰত নিবদ্ধ হৈছে।
