উত্তৰ প্ৰদেশ প্ৰশাসনৰ ধাৰাবাহিক বুলড’জাৰ অভিযানৰ বিৰুদ্ধে দাখিল কৰা আবেদনৰ আজি শুনানি গ্ৰহণ কৰিব উচ্চতম ন্যায়ালয়ে। উত্তৰ প্ৰদেশ চৰকাৰৰ এই উচ্ছেদ অভিযানক বেআইনী আখ্যা দি এনে ধ্বংসাত্মক কাৰ্যত লিপ্ত বিষয়াসকলৰ বিৰুদ্ধে কঠোৰ ব্যৱস্থা গ্ৰহণ কৰিবলৈ মুছলমান সংস্থা জমিয়ত উলেমা-ই-হিন্দে এই আবেদন দাখিল কৰিছিল।
সম্প্ৰতি দেশব্যাপী চৰ্চিত হৈ থকা প্ৰফেট মহম্মদ বিতৰ্কৰ প্ৰতিক্ৰিয়া স্বৰূপে যোৱা সপ্তাহত সৃষ্টি হোৱা প্ৰতিবাদী কাৰ্যকলাপ তথা সংঘৰ্ষৰ পাছতে উত্তৰ প্ৰদেশ প্ৰশাসনে সংঘৰ্ষত জড়িত থকা বুলি অভিযোগ কৰি কেইবাজনো ব্যক্তিৰ ঘৰত উদ্দেশ্যপ্ৰণোদিতভাৱে বুলড’জাৰেৰে উচ্ছেদ চলাইছিল। প্ৰশাসনে এই ঘৰসমূহ অবৈধভাৱে নিৰ্মাণ কৰা বুলি অভিযোগ তুলিছিল।
ৰাজ্যিক প্ৰশাসনৰ এই উচ্ছেদৰ হাতোৰা ভাৰতীয় ৱেলফেয়াৰ পাৰ্টিৰ নেতা তথা ৰাজ্যখনৰ আগশাৰীৰ ৰাজনীতিবিদ জাভেদ মহম্মদৰ ঘৰতো পৰিছিল। প্ৰয়াগৰাজৰ জিলা উন্নয়ন কৰ্তৃপক্ষই দেওবাৰে জাভেদ মহম্মদৰ ঘৰত উচ্ছেদ চলাইছিল।
জিলা প্ৰশাসনে জাভেদ মহম্মদৰ এই ভৱনটো অবৈধভাৱে নিৰ্মাণ কৰা হৈছিল বুলি দাবী কৰাৰ লগতে মে’ত জাননী জাৰি কৰাৰ পিছত জাভেদ মহম্মদ শুনানিৰ বাবে উপস্থিত হোৱা নাছিল বুলি যুক্তি দিছিল।
আনহাতে জাভেদক প্ৰতিনিধিত্ব কৰা অধিবক্তা সকলে কয় যে জাভেদৰ পৰিয়ালে উচ্ছেদৰ আগদিনা ৰাতিহে জাননীৰ প্ৰতিলিপি লাভ কৰিছিল। তদুপৰি উচ্ছেদিত ভৱনটো তেওঁৰ পত্নীৰ নামতহে আছিল।
ইফালে ভাভেদ মহম্মদৰ ঘৰত উচ্ছেদ চলোৱাৰ এদিন পূৰ্বে কানপুৰত ৩ জুনত সংঘটিত হিংসাত্মক ঘটনাত মুখ্য অভিযুক্ত বুলি অভিযোগ উঠা নিজাম কুৰেছিৰ এজন ঘনিষ্ঠ সহযোগীৰ মালিকানাধীন এটা বহুমহলীয়া অট্টালিকাও উত্তৰ প্ৰদেশ প্ৰশাসনে ভাঙি পেলাইছিল।
ৰাজ্য চৰকাৰৰ এনে বেআইনী ধ্বংসাত্মক কাৰ্যকলাপত বাধা প্ৰদান কৰিবলৈ আহ্বান জনাই দাখিল কৰা আবেদনখনত কোৱা হৈছে যে এনে ধৰণৰ আইনবহিৰ্ভূত ব্যৱস্থা গ্ৰহণ কৰাটো স্পষ্টভাৱে ন্যায়ৰ নীতিৰ উলংঘন।
বিশেষকৈ আদালতে বিষয়টোৰ শুনানি গ্ৰহণ কৰি থকাৰ সময়ত প্ৰশাসনৰ এই কাৰ্য কোনো প্ৰকাৰে গ্ৰহণযোগ্য নহয় বুলি জমিয়তে আবেদনখনত উল্লেখ কৰিছে।
উল্লেখ্য যে জমিয়ত উলেমা-ই-হিন্দে ইয়াৰ পূৰ্বে দিল্লীৰ জাহাংগীৰপুৰী অঞ্চলত প্ৰশাসনে চলোৱা উচ্ছেদৰ বিৰোধিতাৰে শীৰ্ষ আদালতত আবেদন দাখিল কৰিছিল। উচ্চতম ন্যায়ালয়ে এই আবেদনৰ শুনানি গ্ৰহণ কৰি কেন্দ্ৰ আৰু স্থানীয় প্ৰশাসনলৈ জাননী জাৰি কৰি এই উচ্ছেদ ৰদ কৰিছিল।
জমিয়তে উচ্চতম ন্যায়ালয়ক সেই বিষয়ে সোঁৱৰাই দি উত্তৰ প্ৰদেশ প্ৰশাসনৰ বুলড’জাৰ অভিযানৰ ক্ষেত্ৰতো ব্যৱস্থা গ্ৰহণৰ বাবে আহ্বান জনায়।
স্মৰ্তব্য যে উত্তৰ প্ৰদেশৰ মুখ্যমন্ত্ৰী যোগী আদিত্যনাথে কিছুদিন পূৰ্বে সংবাদ মাধ্যমৰ আগত হিংসাত জড়িত অভিযুক্তৰ ঘৰ বুলড’জাৰ ব্যৱহাৰ কৰি উচ্ছেদ কৰা হ’ব বুলি দাম্ভিক মন্তব্য কৰিছিল। ইয়াৰ পিছতে জমিয়তে এই আবেদনৰ জৰিয়তে উচ্চতম ন্যায়ালয়ৰ কাষ চাপে।
