প্ৰধানমন্ত্ৰী নৰেন্দ্ৰ মোদীৰ আহ্বানৰ প্ৰতি সঁহাৰি জনাই দেশত ইন্ধন ৰাহিৰ বাবে এইবাৰ আগবাঢ়ি আহিছে ভাৰতৰ উচ্চতম ন্যায়ালয়। কেন্দ্ৰীয় মন্ত্ৰী আৰু বিভিন্ন ৰাজ্যৰ মুখ্যমন্ত্ৰীসকলৰ পাছত এইবাৰ দেশৰ শীৰ্ষ আদালতে শক্তি সংৰক্ষণৰ বাবে কেইবাটাও গুৰুত্বপূৰ্ণ সিদ্ধান্ত গ্ৰহণ কৰিছে। শুকুৰবাৰৰ পৰা উচ্চতম ন্যায়ালয়ত ভার্চুৱেল শুনানি, ন্যায়াধীশসকলৰ বাবে কাৰপুল ব্যৱস্থা আৰু কৰ্মচাৰীসকলৰ বাবে সপ্তাহত দুদিন ৱৰ্ক ফ্ৰম হোম বা ঘৰৰ পৰা কাম কৰাৰ সুবিধা প্ৰদান কৰা হৈছে। এই সকলোবোৰৰ মূল লক্ষ্য হৈছে ইন্ধনৰ খৰচ কমোৱা আৰু দেশৰ সম্পদৰ সঠিক ব্যৱহাৰ নিশ্চিত কৰা।
উচ্চতম ন্যায়ালয়ৰ সচিব প্ৰধান ভৰত পৰাশৰে জাৰি কৰা এটা বিতং নিৰ্দেশনাত কোৱা হৈছে যে কেন্দ্ৰীয় কৰ্মী আৰু প্ৰশিক্ষণ বিভাগে যোৱা ১২ মে’, ২০২৬ তাৰিখে জাৰি কৰা নিৰ্দেশনাৰ ভিত্তিতেই এই নতুন ব্যৱস্থা কাৰ্যকৰী কৰা হৈছে। নতুন নিয়ম অনুসৰি সোমবাৰ, শুকুৰবাৰ আৰু অন্যান্য যিবোৰ দিনক মিচলেনিয়াচ ডে’ হিচাপে গণ্য কৰা হয়, সেই দিনবোৰত আদালতত শাৰীৰিকভাৱে উপস্থিত থকাৰ কোনো প্ৰয়োজন নাই। সেই দিনবোৰত সকলো শুনানি ভিডিঅ’ কনফাৰেন্সৰ জৰিয়তে সম্পন্ন কৰা হ’ব। আনকি গৰমৰ বন্ধ বা আংশিক কামৰ দিনতো কেৱল ভার্চুৱেল শুনানিহে চলিব। ইয়াৰ বাবে ৰেজিষ্ট্ৰীক সঠিক সময়ত ভিডিঅ’ কনফাৰেন্সৰ লিংক যোগান ধৰিবলৈ আৰু কাৰিকৰী সমস্যাসমূহ দ্ৰুতগতিত সমাধান কৰিবলৈ নিৰ্দেশ দিয়া হৈছে।
ইন্ধন ৰাহি কৰাৰ এই অভিযানৰ অংশ হিচাপে উচ্চতম ন্যায়ালয়ৰ সন্মানীয় ন্যায়াধীশসকলেও এতিয়াৰ পৰা কাৰপুলিং কৰিবলৈ অৰ্থাৎ একেলগে গাড়ী ব্যৱহাৰ কৰিবলৈ সন্মত হৈছে। আদালতৰ তৰফৰ পৰা জনোৱা হৈছে যে ইয়াৰ ফলত ইন্ধনৰ অপচয় যথেষ্ট হ্ৰাস পাব আৰু চৰকাৰী কামত বাহনৰ ব্যৱহাৰ অধিক ফলপ্ৰসূ হ’ব। ইয়াৰ উপৰি ৰেজিষ্ট্ৰীৰ প্ৰতিটো শাখাৰ ৫০ শতাংশ কৰ্মচাৰীয়ে সপ্তাহত দুদিনকৈ ঘৰৰ পৰা কাম কৰাৰ সুযোগ পাব।
অৱশ্যে বাকী কৰ্মচাৰীসকল আদালতত উপস্থিত থাকিব লাগিব যাতে ন্যায়ালয়ৰ স্বাভাৱিক কাম-কাজত কোনো ব্যাঘাত নজন্মে। ৰেজিষ্ট্ৰাৰসকলক এই গোটেই প্ৰক্ৰিয়াটোৰ বাবে এটা সাপ্তাহিক ৰোষ্টাৰ তৈয়াৰ কৰিবলৈ কোৱা হৈছে আৰু ঘৰৰ পৰা কাম কৰা কৰ্মচাৰীসকলৰ কামৰ গতিৰ ওপৰত চকু ৰাখিবলৈ নিৰ্দেশ দিয়া হৈছে। প্ৰয়োজন সাপেক্ষে ঘৰৰ পৰা কাম কৰি থকা লোকসকলক যিকোনো সময়তে অফিচলৈ মাতি পঠাব পৰা যাব।
উল্লেখ্য যে মধ্যপ্ৰাচ্যৰ উত্তেজনাৰ বাবে বৰ্তমান বিশ্ব বজাৰত ইন্ধনৰ নাটনি আৰু মূল্যবৃদ্ধিৰ এক আশংকা সৃষ্টি হৈছে। এনে পৰিস্থিতিত প্ৰধানমন্ত্ৰী নৰেন্দ্ৰ মোদীয়ে অলপতে দেশবাসীক ডিজেল আৰু পেট্ৰ’লৰ ব্যৱহাৰ কমাবলৈ আহ্বান জনাইছিল। তেওঁ জনসাৱাৰণক যিমান পাৰি মেট্ৰ’ ৰে’ল ব্যৱহাৰ কৰিবলৈ, কাৰপুলিং কৰিবলৈ আৰু ৱৰ্ক ফ্ৰম হোমৰ ওপৰত গুৰুত্ব দিবলৈ অনুৰোধ জনাইছিল। প্ৰধানমন্ত্ৰীয়ে আনকি বিদেশ ভ্ৰমণৰ পৰিৱৰ্তে নিজ দেশৰ ভিতৰতে ভ্ৰমণ কৰিবলৈও পৰামৰ্শ দিছিল। প্ৰধানমন্ত্ৰীয়ে নিজেও শেহতীয়া ভ্ৰমণৰ সময়ত নিজৰ কনভয়ত গাড়ীৰ সংখ্যা হ্ৰাস কৰি এক আদৰ্শ দাঙি ধৰিছে। বৰ্তমান বিজেপি শাসিত কেইবাখনো ৰাজ্যৰ লগতে উচ্চতম ন্যায়ালয়ে গ্ৰহণ কৰা এই কঠোৰ পদক্ষেপৰ পৰা এটা কথা স্পষ্ট যে সঁচাই দেশৰ অৰ্থনৈতিক অৱস্থা বেয়াৰ ফালে গতি কৰিবলৈ আৰম্ভ কৰিছে।
