বৃহস্পতিবাৰে পুৱতি নিশা কোকৰাঝাৰ জিলাত সন্দেহযুক্ত আই ই ডি বিস্ফোৰণৰ ফলত ছালাকাটি আৰু কোকৰাঝাৰৰ মাজৰ ৰেলপথৰ এটা অংশ ক্ষতিগ্ৰস্ত হোৱাৰ পিছতে উত্তেজনাই বিৰাজ কৰে।
উত্তৰ-পূব সীমান্ত ৰে’লৱেৰ আলিপুৰদুৱাৰ সংমণ্ডলৰ সমীপত নিশা প্ৰায় ১:০০ বজাত সংঘটিত হোৱা এই বিস্ফোৰণটোৱে পথটোত ৰে’লৰ চলাচলত ব্যাঘাত জন্মায়।
ঘটনাটো পোহৰলৈ আহে যেতিয়া এখন গুডছ ট্ৰেইন (ইউ পি আজাৰা চুগাৰ)ৰ ট্ৰেইন মেনেজাৰে ছেকচনটোৰ মাজেৰে পাৰ হৈ যোৱাৰ সময়ত এটা অস্বাভাৱিক গধুৰ জোকাৰণিৰ খবৰ দিয়ে। লগে লগে ৰে’লখন ৰখাই দিয়া হয় আৰু প্ৰাথমিক পৰিদৰ্শনত ট্ৰেকখনৰ এটা অংশ আৰু কেইবাটাও শ্লীপাৰৰ ক্ষতি হোৱা দেখা যায়, যিয়ে সম্ভাৱ্য বিস্ফোৰণৰ ইংগিত দিয়ে।
ঘটনাৰ কিছু সময়ৰ পাছতে অসম আৰক্ষী, ৰে’ল সুৰক্ষা বাহিনী (আৰ পি এফ), চৰকাৰী ৰে’ল আৰক্ষী (জি আৰ পি) আৰু চোৰাংচোৱা সংস্থাৰ দল উপস্থিত হয়৷ ব্যৱহৃত বিস্ফোৰকটোৰ প্ৰকৃতি নিশ্চিত কৰিবলৈ বোমা নিষ্কাশন দল আৰু ফৰেনছিক বিশেষজ্ঞসকলে ধ্বংসাৱশেষ পৰীক্ষা কৰিবলৈ আৰম্ভ কৰে।
আৰক্ষীৰ এগৰাকী জ্যেষ্ঠ বিষয়াই কয় যে, “আমি এইটোক কূটাঘাতৰ সন্দেহজনক ঘটনা হিচাপে গণ্য কৰিছো। তদন্ত চলি আছে আৰু অঞ্চলটোত নিৰাপত্তা কটকটীয়া কৰা হৈছে।”
অভিযন্তাসকলে ট্ৰেক পুনৰুদ্ধাৰৰ বাবে নিশাটোৰ ভিতৰতে কাম কৰাৰ বাবে ক্ষতিগ্ৰস্ত ষ্ট্ৰেচত ৰে’ল সেৱা কেইবা ঘণ্টা ধৰি বন্ধ কৰি দিয়া হয়। জৰুৰী মেৰামতিৰ কাম সম্পূৰ্ণ হোৱাৰ পিছত পুৱা প্ৰায় ৫:২৫ বজাত পুনৰ আৰম্ভ হয় ৰেল যাতায়ত। কিন্তু এই ব্যাঘাতৰ বাবে কমেও ৮খন ৰে’ল চলাচল পলম হয়।
ছালাকাটিৰ এজন বাসিন্দাই কয় যে, “শব্দত ওচৰৰ ঘৰবোৰ জোকাৰি গ’ল। আমি প্ৰথমে ট্ৰেন্সফৰ্মাৰ বিস্ফোৰণ বুলি ভাবিছিলো, কিন্তু পিছত গম পালোঁ যে ট্ৰেকত এইটো সংঘটিত হৈছে।”
