বঙাইগাঁও আৰক্ষীয়ে অবৈধ চুপাৰিৰ বেহাৰ বিৰুদ্ধে অভিযান অব্যাহত ৰাখিছে ৷
এই অভিযানৰ অংশ হিচাপে দেওবাৰে পুনৰ বঙাইগাঁও জিলাৰ গৰাইমাৰীৰ আই নৈৰ চৰত বঙাইগাঁও আৰক্ষীয়ে অভিযান চলায় ৷
বঙাইগাঁও সদৰ থানাৰ ভাৰপ্ৰাপ্ত আৰক্ষী বিষয়া জ্যোতি লাহনৰ নেতৃত্বত দিনৰ প্ৰায় ১২ বজাত আৰক্ষীৰ দলে আমিৰ হুছেইন বানিয়াৰ গৃহত চলোৱা অভিযানত বাৰ্মিজ চুপাৰি সন্দেহত ৫১ বস্তা চুপাৰি জব্দ কৰে ৷
আৰক্ষীয়ে গৃহটোত অভিযান চলোৱাৰ সময়ত আমিৰ হুছেইন বানিয়া গৃহত নাছিল ৷
আৰক্ষীয়ে জব্দকৃত চুপাৰিসমূহ পিছত থানালৈ লৈ আহে ৷ ইপিনে স্থানীয় ব্যক্তি তথা ব্যৱসায়ী সকলে জব্দকৃত চুপাৰি খিনি থলুৱা চুপাৰি বুলি দাবী কৰিছে ৷
অৱশ্যে আৰক্ষীয়ে জব্দকৃত চুপাৰিখিনি বাৰ্মিজ চুপাৰি নে স্থানীয় চুপাৰি সেয়া তদন্তৰ পিছতহে পোহৰলৈ আহিব ।
বৰ্তমান জিলাই জিলাই আৰক্ষীয়ে অবৈধ চুপাৰি ,ড্ৰাগছ, গাঞ্জা আদিৰ বিৰুদ্ধে অব্যাহত ৰখা ধাৰাবাহিক অভিযানত অবৈধ ব্যৱসায়ীসকলে থৰকাচুটি হেৰুৱাইছে ৷
সেয়ে সচেতন মহলে আৰক্ষীক এনে অভিযান অব্যাহত ৰাখি অবৈধ বেহাৰ লগত জড়িতসকলক কৰায়ত্ব কৰি চলি থকা অবৈধ বেহাসমূহ উৎখাত কৰিবলৈ দাবী জনাইছে ৷
