নিৰাপত্তা বাহিনীৰ তৎপৰতাৰ বাবে এক বৃহৎ সন্ত্ৰাসবাদী আক্ৰামণৰ পৰা ৰক্ষা পৰিল দিল্লী। দুই পক্ষৰ মাজত চলা প্ৰচণ্ড গুলীয়াগুলিৰ পাছত আই ই ডি বিস্ফোৰকসহ এজন সন্দেহযুক্ত ISIS সন্ত্ৰাসবাদীক গ্ৰেপ্তাৰ কৰা হৈছে।
দিল্লী আৰক্ষীয়ে গ্ৰেপ্তাৰ কৰা সন্ত্ৰাসবাদীজনৰ নাম য়ুছুফ খান বুলি জানিব পৰা গৈছে।
আৰক্ষী সূত্ৰই জানিবলৈ দিয়া মতে শুকুৰবাৰে কৰ’লবাগ আৰু ধোলাকুৱা অঞ্চলৰ মাজত এটুকুৰা ঠাইত এজন সন্ত্ৰাসবাদী আত্মগোপন কৰি থকাৰ কথা জানিব পাৰে।
ইয়াৰ পাছতেই দিল্লী আৰক্ষীৰ বিশেষ শাখাই অঞ্চলটোত তালাচী অভিযান চলায়।
তেওঁলোকে অঞ্চলটোৰ বুদ্ধ জয়ন্তী পাৰ্কৰ সমীপত তালাচী চলোৱাৰ সময়তে সেই ISIS সন্ত্ৰাসবাদীৰ সৈতে সংঘৰ্ষ হয়।
বহুসময় ধৰি গুলীয়াগুলি চলাৰ পাছত য়ুছুফ নামৰ ISIS সন্ত্ৰাসবাদীজনক গ্ৰেপ্তাৰ কৰা হয়।
সন্ত্ৰাসবাদীজনৰ জিম্মাৰ পৰা আই ই ডি বিস্ফোৰকৰ লগতে এটা পিষ্টল জব্দ কৰা হৈছে। এই ঘটনাৰ পাছতে এনএছজি কমাণ্ডোই অঞ্চলটোত তালাচী চলাইছে।
দিল্লী আৰক্ষীৰ বিশেষ শাখাৰ সহকাৰী আয়ুক্ত প্ৰমোদ সিং কুশোৱাই কৰ’লবাগ আৰু ধোলাকুৱা অঞ্চলৰ মাজৰ এক স্থানত চলা এক সংঘৰ্ষৰ পাছত তাৰ পৰা আই ই ডি বিস্ফোৰকসহ এজন ISIS সন্ত্ৰাসবাদীক গ্ৰেপ্তাৰ কৰা হৈছে।
