উজনিৰ গাহৰিৰ জ্বৰে কাজিৰঙা ৰাষ্ট্ৰীয় উদ্যানৰ বন্যপ্ৰাণীকো সংক্ৰমিত কৰাৰ আশংকা; কাজিৰঙাত বন বিভাগৰ বৈঠক
ৰাজ্যত প্ৰাদূৰ্ভাৱ ঘটা গাহৰি জ্বৰৰ সংক্ৰমণে কাজিৰঙা ৰাষ্ট্ৰীয় উদ্যানৰ বন্যপ্ৰাণীকো বিপদাগ্ৰস্ত কৰিব পাৰে লগতে উজনিত ব্ৰহ্মপুত্ৰত উটুৱাই দিয়া গাহৰিৰ মৃতদেহে নামনিৰ প্ৰাণী কুলকো সংক্ৰমিত কৰিব পাৰে বুলি ১ মে’ত কাজিৰঙাৰ কহঁৰাত অনুষ্ঠিত এখন বৈঠকত আশংকা ব্যক্ত কৰে বন বিভাগৰ প্ৰধান মুখ্য বন সংৰক্ষক এম কে যাদবে।
আগন্তুক বানপানীৰ সন্মুখীন হ’ব পৰাকৈ কাজিৰঙা ৰাষ্ট্ৰীয় উদ্যানত কৰ্তৃপক্ষই লেৱা ব্যৱস্থাৱলী পৰ্যবেক্ষণ কৰিবলৈ কাজিৰঙালৈ অহা বিষয়া গৰাকীয়ে কাজিৰঙাত কেইবাখনো জিলাৰ উপায়ুক্ত, আৰক্ষী অধীক্ষকে ধৰি বিভিন্ন উচ্চ পদস্থ বিষয়াৰ সৈতে আলোচনাত মিলিত হয়।
পৰৱৰ্তী সময়ত তেওঁ বিভিন্ন দল সংগঠন আৰু বেচৰকাৰী সংগঠনৰ প্ৰতিনিধিৰ সৈতেও সাম্ভাৱ্য বানপানীত ল’ব পৰা ব্যৱস্থাৱলী সন্দৰ্ভত আলোচনা কৰে।
আলোচনা কালত তেওঁ নদীত উটুৱাই দিয়া স্বোৱাইন ফিভাৰত আক্ৰান্ত গাহৰিৰ মৃতদেহে কাজিৰঙাৰ বন্যপ্ৰাণীক সংক্ৰমিত কৰিব পৰাৰ শংকা ব্যক্ত কৰে।
এনেক্ষেত্ৰত নদীত উটি অহা গাহৰিৰ মৃতদেহ যাতে কাজিৰঙা ৰাষ্ট্ৰীয় উদ্যান বা তাৰ কাষৰীয়া অঞ্চলত সোমাব নোৱাৰে তাৰবাবে দৃষ্টি ৰাখিবলৈ সংশ্লিষ্ট বন বিষয়া সকলক নিৰ্দেশ দিয়ে।
সভাত বিষয়া গৰাকীয়ে গাহৰিৰ মৃতদেহ নদীত নেপেলাবলৈ ৰাইজক অনুৰোধ জনোৱাৰ লগতে অধিক সচেতনতা অৱলম্বন কৰিবলৈও আহ্বান জনায়।
কভিড-১৯-ৰ বিশ্ব জোৰা সংক্ৰমণৰ সময়ত বানপানী আহিলে কাজিৰঙাৰ বাবে এক পৃথক প্ৰত্যাহ্বান আহিব বুলি মত ব্যক্ত কৰি বানপানীৰ সময়ত কৰ্তব্য পালন কৰাতো বনকৰ্মী সকলৰ বাবে যথেষ্ট কঠোৰ হ’ব বুলিও যাদৱে কয়।
সেয়েহে, কভিড-১৯ সংক্ৰমণ প্ৰতিৰোধৰৰ সকলো নীতি-নিৰ্দেশনা মানি বানপানীৰ সম্পৰ্কত ল’ব পৰা ব্যৱস্থাৱলী প্ৰস্তুত কৰিবৰ বাবে তেওঁ কাজিৰঙা উদ্যান কৰ্তৃপক্ষক আহ্বান জনায়।
আনহাতে, এই সম্পৰ্কত সভাত উপস্থিত বিভিন্ন লোকে দিয়া পৰামৰ্শও বিষয়া গৰাকীয়ে গ্ৰহণ কৰে।