বন্ধুত্বৰ বিৰল চানেকিৰে বন্ধুৰ স্মৃতিক যুগমীয়া কৰিবলৈ সুদূৰ ছুইজাৰলেণ্ডৰ পৰা অহা এদল যুৱক-যুৱতীয়ে মাজুলীত নিৰ্মাণ কৰা এটা চালে চকুৰোৱা বাঁহৰ ঘৰে সকলোৰে দৃষ্টি আকৰ্ষণ কৰিছে।
অসমীয়া সাজপাৰ পিন্ধি আপোন বিভোৰ হৈ পৰা ছুইজাৰলেণ্ডৰ বাৰ্ন বিশ্ববিদ্যালয়ৰ এই ছাত্ৰ-ছাত্ৰীসকল হৈছে মাজুলীৰ গড়মূৰৰ উদ্যোগী, শিল্পী কৌশিক নাথৰ পুত্ৰ ৰাউলৰ বন্ধু। গড়মূৰৰ পৰা দুই কিঃ মিঃ পশ্চিমলৈ লুইতৰ পাৰত থকা কৌশিক নাথৰ ডেকাচাঙৰ গাতে নিৰ্মাণ কৰা বাঁহৰ ঘৰটো অকালতে মৃত্যুক সাবটি লোৱা নাথৰ পুত্ৰ ৰাউলৰ স্মৃতিত স্মৃতিঘৰ হিচাপে নামকৰণ কৰিছে।
উল্লেখযোগ্য যে মাত্ৰ ৬টা দিনতে লাচিতে গড় বন্ধোৱাৰ দৰে বাৰ্ন বিশ্ববিদ্যালয়ৰ ১৮ গৰাকী ছাত্ৰ-ছাত্ৰী আৰু তিনিজন অধ্যাপকৰ নেৰানেপেৰা প্ৰচেষ্টাত দুটা ভাগত বিভক্ত কৰা বাঁহৰ ঘৰটো সম্পূৰ্ণ হৈ উঠিছে। তেওঁলোকে ঘৰটোৰ এটা ভাগক যাদুঘৰ আৰু আনটো ভাগক কীৰ্ত্তন ঘৰ হিচাপে সজাই তুলিছে।
এই উপলক্ষে যোৱা ১১ ফেব্ৰুৱাৰিত অনুষ্ঠিত উদ্বোধনি অনুষ্ঠানত মাজুলীৰ উপায়ুক্ত দেৱ প্ৰসাদ মিশ্ৰই ফিটা কাটি গৃহটি উদ্বোধন কৰে। ইয়াৰ পিছতে চুইজাৰলেণ্ডৰ ছাত্ৰ-ছাত্ৰীসকলে কম দিনতে আয়ত্ত কৰা অসমৰ জাতীয় সংগীত অ’ মোৰ আপোনাৰ দেশ আৰু মাজুলীৰ বিখ্যাত মুখা ভাওনা প্ৰদৰ্শন কৰে।
প্ৰকৃতিৰ অপূৰ্ব নান্দনিক শোভা, বৈষ্ণৱ কলা সংস্কৃতি, জনগোষ্ঠীয় বৈশিষ্ট্য আৰু বিভিন্ন জীৱ-জন্তু, চৰাই চিৰিকতিৰ অন্যতম থলি মাজুলীত নিৰ্মাণ কৰি তোলা এই যাদুঘৰে বিশ্বৰ যিকোনো ঠাইৰ পৰ্যটকৰ বাবে আকৰ্ষণীয় কেন্দ্ৰ হিচাপে পৰিগণিত হ’ব পাৰে।
