টি–২০ বিশ্বকাপ ২০২৬ৰ পঞ্চম দিনটোত ক্ৰিকেটপ্ৰেমীয়ে কেইবাটাও ৰোমাঞ্চকৰ মুহূৰ্ত উপভোগ কৰে। দিনটোৰ তৃতীয়খন খেলত ৱেষ্ট ইণ্ডিজে ইংলেণ্ডক ৩০ ৰাণত পৰাস্ত কৰি এক ঐতিহাসিক জয় সাব্যস্ত কৰে। এই জয়ৰ জৰিয়তে ইংলেণ্ডৰ বিৰুদ্ধে টি–২০ বিশ্বকাপত ১০ বছৰৰ বিৰতিৰ পাছত প্ৰথমবাৰৰ বাবে বিজয় সাব্যস্ত কৰিলে কেৰিবিয়ান বাহিনীয়ে। ইয়াৰ পূৰ্বে ২০১৬ চনৰ ফাইনেলত শেষবাৰৰ বাবে ইংলেণ্ডক পৰাস্ত কৰিছিল ৱেষ্ট ইণ্ডিজে।
মুম্বাইৰ ৱানখেড়ে ষ্টেডিয়ামত অনুষ্ঠিত মেচখনত ৱেষ্ট ইণ্ডিজে প্ৰথমে বেটিং কৰি নিৰ্ধাৰিত ২০ অভাৰত ১৯৬/৬ ৰাণ সংগ্ৰহ কৰে। শ্বাৰফেন ৰাডাৰফৰ্ডে মাত্ৰ ৪২টা বলত অপৰাজিত ৭৬ ৰাণৰ এক বিস্ফোৰক ইনিংছ খেলি দলৰ ভেটি মজবুত কৰে। আনহাতে ৰষ্টন চেজে ৩৪ আৰু জেচন হ’ল্ডাৰে ৩৩ ৰাণৰ গুৰুত্বপূৰ্ণ অৱদান আগবঢ়ায়। ইংলেণ্ডৰ হৈ আদিল ৰছিদে ৪ অভাৰত ১৬ ৰাণত ২ উইকেট দখল কৰি আটাইতকৈ সফল বলাৰ হিচাপে পৰিগণিত হয়।
১৯৭ ৰাণৰ লক্ষ্য অনুসৰণ কৰি ইংলেণ্ডে ১৯ অভাৰত ১৬৬ ৰাণতে অল আউট হয়। ফিল ছল্টে ৩০, জেকব বেথেলে ৩৩ আৰু ছেম কাৰাণে অপৰাজিত ৪৩ ৰাণ কৰিলেও দলটোক জয়ৰ দিশে নিব নোৱাৰিলে। ৱেষ্ট ইণ্ডিজৰ স্পিনাৰসকলে উজ্জ্বল প্ৰদৰ্শন কৰি ইংলেণ্ডৰ বেটিং লাইনআপ কৰে। গুডাকেশ মটিয়ে ৩টা আৰু চেজে ২টা উইকেট দখল কৰে। ৰাডাৰফৰ্ডক ‘প্লেয়াৰ অৱ দ্য মেচ’ৰ বঁটা প্ৰদান কৰা হয়।
ইফালে, কলম্বোৰ আৰ. প্ৰেমাদাছা ষ্টেডিয়ামত অনুষ্ঠিত দ্বিতীয়খন খেলত অষ্ট্ৰেলিয়াই আয়াৰলেণ্ডক ৬৭ ৰাণত পৰাস্ত কৰি বিজয়ী অভিযান আৰম্ভ কৰে। ১৮২ ৰাণৰ লক্ষ্য খেদি আয়াৰলেণ্ডে ১৬.৫ অভাৰত মাত্ৰ ১১৫ ৰাণতে সকলো উইকেট হেৰুৱায়। অষ্ট্ৰেলিয়াৰ হৈ নাথান এলিছ আৰু এডাম জাম্পাই বিধ্বংসী বলিং কৰি ৪টাকৈ উইকেট দখল কৰে। নাথান এলিছক ‘প্লেয়াৰ অৱ দ্য মেচ’ ঘোষণা কৰা হয়। বেটিংত জোছ ইংলিছে ৩৭, মেট ৰেনশ্ব’ৱে ৩৭ আৰু মাৰ্কাছ ষ্ট’ইনিছে ৪৫ ৰাণ সংগ্ৰহ কৰি দলটোক শক্তিশালী স্ক’ৰ প্ৰদান কৰে।
দিনটোৰ প্ৰথমখন খেল আফগানিস্তান আৰু দক্ষিণ আফ্ৰিকাৰ মাজত অনুষ্ঠিত হয়, যিখন খেলে অতি নাটকীয় ৰূপ ধাৰণ কৰে। দুয়োটা দলৰ স্ক’ৰ টাই হোৱাত খেলখন ছুপাৰ অভাৰলৈ যায়। প্ৰথম ছুপাৰ অভাৰো টাই হোৱাত মেচখনৰ ফলাফলৰ বাবে ‘ডাবল ছুপাৰ অভাৰ’ৰ আশ্ৰয় ল’বলগীয়া হয়। শেষত দ্বিতীয় ছুপাৰ অভাৰত দক্ষিণ আফ্ৰিকাই ২৪ ৰাণ সংগ্ৰহ কৰাৰ বিপৰীতে আফগানিস্তানে ১৯ ৰাণহে কৰিবলৈ সক্ষম হয়। ফলত দক্ষিণ আফ্ৰিকাই এই ৰোমাঞ্চকৰ মেচখনত জয়লাভ কৰে।
