কোনো এখন চৰকাৰে অসমৰ ৬ জনগোষ্ঠীক কৰিব নোৱাৰিলে জনজাতিকৰণ। বিজেপি চৰকাৰ শাসনলৈ আহি ৬ মাহৰ ভিতৰতে ৬ জনগোষ্ঠীক জনজাতিকৰণ কৰাৰ বাবে আশ্বাস দিছিল। কিন্তু জনজাতিকৰণৰ বিলেই উত্থাপন কৰা নহ’ল দুয়োখন সদনত। সেয়েহে ক্ষুভিত হৈ পৰিছে আহোম জনগোষ্ঠীয় সংগঠন তাই আহোম যুৱ পৰিষদ।
আজি গুৱাহাটী প্ৰেছ ক্লাৱত এক সংবাদমেল সম্বোধন কৰি বিজেপি চৰকাৰ শাসনলৈ আহিলে ২ মাহৰ ভিতৰত আহোম জনগোষ্ঠীক জনজাতিকৰণৰ বাবে দাবী জনায়।
‘২০১৯ ৰ লোকসভা নিৰ্বাচনৰ পাছত যদি বিজেপিয়ে চৰকাৰ গঠন কৰিবলৈ সক্ষম হয়, তাৰ পাছত ২ মাহৰ ভিতৰত আহোম জনজাতিক জনজাতিকৰণৰ মৰ্য্যদা নিদিয়ে তেন্তে বিজেপিয়ে তাৰ উচিত প্ৰত্যুত্তৰ পাব। সংগঠনৰ ফালৰ পৰা বিজেপি বিৰোধী প্ৰচাৰ চলামগৈ। বিজেপিৰ নেতা-পালিনেতা ভোটাৰ ৰাইজৰ কাষ চাপিব নোৱাৰাকৈ পুলিয়ে পোখালিৰে উভালি পেলোৱাৰ ব্যৱস্থা কৰিম।‘ সংবাদমেলত এই হুংকাৰ তাই আহোম যুৱ ছাত্ৰ পৰিষদৰ প্ৰচাৰ সম্পাদক গুণকান্ত গগৈৰ।
ইয়াৰোপৰি শাসনলৈ অহাৰ পাছত বিজেপি চৰকাৰক বিদেশী বহিস্কাৰৰ কাম সম্পন্ন কৰিবৰ বাবেও দাবী জনায়।
ইপিনে, কেন্দ্ৰীয় চৰকাৰৰ জাতিধ্বংসী নাগৰিকত্ব সংশোধনী বিধেয়কৰ বিৰুদ্ধে ৭০সংগঠনৰ অংশীদাৰী জাতীয় সংগঠন তাই আহোম যুৱ পৰিষদ, অসমে আগন্তক লোকসভা নিৰ্বাচনত দলক গুৰুত্ব দিয়াতকৈ প্ৰাৰ্থীক গুৰুত্ব দিবৰ বাবে আহ্বান জনায়।
‘অসমৰ বানপানীৰ সমস্যা, আহোম জনগোষ্টীৰ জনজাতি কৰণ লগতে ৰাজ্যত দেখা দিয়া নিবনুৱা সমস্যা সমাধানৰ বাবে যি নেতাই গুৰুত্ব দিব সেই নেতাকে সমৰ্থন কৰিম।‘ সংবাদমেলত এইদৰে কয় প্ৰচাৰ সম্পাদকজনে।
তেওঁ লগতে কয় ‘আগন্তুক লোকসভা নিৰ্বাচনত তাই আহোম যুৱ পৰিষদে প্ৰথম পৰ্যায়ৰ লোকসভাৰ নিৰ্বাচনত তিনিটা সমষ্টিৰ তিনিজন প্ৰাৰ্থীক মুকলিলৈ সমৰ্থন জনাম।
অৱশ্যে আজি সংবাদমেলত সমৰ্থন কৰিব লগা প্ৰাৰ্থী সকলৰ নাম উল্লেখ কৰাৰ পৰা বিৰত থাকিল যদিও অতি সোনকালে ৰাজহুৱা কৰিব বুলিও সদৰী কৰি কয় যে ইতিমধ্যে নেতাকেইজনৰ সৈতে আলোচনা প্ৰক্ৰিয়া সম্পূৰ্ণ হৈছে।
উক্ত নেতা কেইজনে টাই আহোম যুৱ পৰিষদ অসমক তেওঁলোকৰ দীর্ঘদিনীয়া দাবী আহোম জনগোষ্টীক জনজাতিকৰণ কৰা আৰু জাতিধ্বংসী নাগৰিকত্ব সংশোধনী বিধেয়ক বিৰোধিতা কৰাৰ আশ্বাস প্ৰদান কৰিছে বুলিও সংবাদমেলত তেওঁ জনায়।
