অৰুণাচল প্ৰদেশৰ নামচাই জিলাত যোৱা কেইবাদিনো ধৰি চলি থকা গোষ্ঠীগত সংঘাতৰ উত্তেজনাৰ পৰিপ্ৰেক্ষিতত তাই খামতি আৰু চিংফৌ কাউন্সিলে ২৮ অক্টোবৰত এখন জৰুৰী বৈঠকৰ আহ্বান জনাইছে। বৈঠকত জিলাখনৰ আইন-শৃংখলাৰ দিশটো আলোচনা কৰা হ’ব বুলি এটা বিবৃতিযোগে সংগঠনটোৱে জানিবলৈ দিছে।
পুৱা ৯ বজাত অনুষ্ঠিত হ’ব লগীয়া বৈঠকৰ স্থান হ’ব চংখাম কমিউনিটি হল।
যোৱা ২৫ অক্টোবৰত জিলাখনৰ জয়পুৰ গাৱঁৰ পৰা আদি ছাত্ৰ সন্থা আৰু আদি বানে কেবাঙে এটা ডাঙৰ সমদল উলিয়াইছিল। সমদলত বাধা দিব খোজা আৰক্ষীৰে সংঘৰ্ষত লিপ্ত হৈ প্ৰতিবাদী সমদলকাৰীয়ে আৰক্ষীলৈ শিল আৰু ইটা দলিয়াইছিল। কেইবাজনো আৰক্ষী বিষয়া আৰু জোৱান এই ঘটনাত আহত হৈছিল।
ইয়াৰ পূৰ্বে ১৫ অক্টোবৰত জিলাখনৰ টেঙাপানী ফৰেষ্ট ৰিজাৰ্ভৰ অধীনৰ খাই-হেই নলাৰ ওচৰত থকা এখন আদি সম্প্ৰদায়ৰ গাৱঁত অচিনাক্ত দুৰ্বৃত্তই ১৪টাকৈ ঘৰ জ্বলাই দিছিল।
আদি ছাত্ৰ সন্থাই এই কাণ্ডত সদৌ তাই খামতি চিংফৌ ছাত্ৰ সন্থাৰ সদস্য জড়িত থকা বুলি অভিযোগ আনিছে। অৱশ্যে অভিযোগৰ সত্যতা নাকচ কৰিছে সদৌ তাই খামতি চিংফৌ ছাত্ৰ সন্থাই।
আনপিনে কাইলৈ বৈঠক আহ্বান জনাই তাই খামতি চিংফৌ কাউন্সিলে কয় যে এই পৰিপ্ৰেক্ষিতত নামচাই জিলা কমিউনিটি বেছড সংস্থাবোৰে (চি বি অ’) ছাত্ৰ আৰু যুৱ সংস্থাবোৰৰ সৈতে বিষয়টো খামতি আৰু চিংফৌ জনসাধাৰণৰ সৈতে বহল পৰিসৰত আলোচনা কৰিবলৈ সিদ্ধান্ত গ্ৰহণ কৰিছে।
বিবৃতিটোত আদি ছাত্ৰ সন্থাক ইংগিত কৰি কোৱা হয়, “আমাৰ ঠাইত ওপৰত কোৱা ধৰণৰ কোনো বহিৰাগত সংগঠনক যাতে ভৱিষ্যতে সমাৱেশ বা সমদল উলিয়াব অনুমতি দিয়া নহয় এই বিষয়ে আলোচনা কৰা হ’ব।”
বৈঠকত খামতি আৰু চিংফৌ সমাজৰ সকলো স্বাৰ্থজড়িত পক্ষক, ছাত্ৰসমাজ আৰু যুৱসকলকে ধৰি, উপস্থিত থাকিবলৈ কোৱা হৈছে।
