গণতন্ত্ৰ দিৱসৰ দিনাই বিশ্ববিখ্যাত কীৰ্তিচিহ্ন তাজমহলৰ চৌহদত এক চাঞ্চল্যকৰ ঘটনা সংঘটিত হৈছে। তাজমহলৰ নিৰাপত্তা বেষ্টনী অতিক্ৰমি একাংশ লোকে ৰাষ্ট্ৰীয় পতাকা উত্তোলন কৰাৰ লগতে ৰাষ্ট্ৰগান পৰিৱেশন কৰি ‘ভাৰত মাতা কী জয়’ শ্ল’গান দিয়ে। এই সমগ্ৰ কাৰ্যসূচীৰ এটা ভিডিঅ’ ছচিয়েল মিডিয়াত ভাইৰেল হোৱাৰ লগে লগে তীব্ৰ বিতৰ্কৰ সৃষ্টি হৈছে আৰু প্ৰশাসনে ইতিমধ্যে ঘটনাটোৰ তদন্তৰ নিৰ্দেশ দিছে।
জানিব পৰা মতে, অখিল ভাৰত হিন্দু মহাসভাৰ একাংশ বিষয়ববীয়া আৰু সদস্যই এই কাৰ্য সম্পন্ন কৰে। সংগঠনটোৰ দাবী অনুসৰি, ১৬৩২ চনত তাজমহলৰ নিৰ্মাণ কাৰ্য আৰম্ভ হোৱাৰ পৰা আজিলৈকে ইয়াৰ মূল চৌহদত কেতিয়াও আনুষ্ঠানিকভাৱে ত্ৰিৰংগা উত্তোলন কৰা হোৱা নাছিল। হিন্দু মহাসভাই ইয়াক এক ‘ঐতিহাসিক পদক্ষেপ’ বুলি অভিহিত কৰিছে। তেওঁলোকৰ মতে, ভাৰতৰ প্ৰতিটো কোণত ত্ৰিৰংগা উৰুৱাটো দেশৰ গৌৰৱৰ প্ৰতীক।
তাজমহলৰ নিৰাপত্তাৰ দায়িত্বত থাকে কেন্দ্ৰীয় ঔদ্যোগিক নিৰাপত্তা বাহিনী (CISF)। উল্লেখনীয় যে, তাজমহলৰ ভিতৰত যিকোনো ধৰণৰ ধৰ্মীয়, ৰাজনৈতিক বা ব্যক্তিগত পতাকা প্ৰদৰ্শনৰ ওপৰত চৰকাৰীভাৱে কঠোৰ নিষেধাজ্ঞা বলৱৎ আছে। ইমান তন্নত তন্নকৈ কৰা তালাচী আৰু চিচিটিভিৰ তীক্ষ্ণ নজৰৰ মাজতো সংগঠনটোৰ সদস্যসকলে কেনেকৈ পতাকা লৈ ভিতৰত প্ৰৱেশ কৰিলে, তাক লৈ এতিয়া ডাঙৰ প্ৰশ্ন উত্থাপন হৈছে।
ভিডঅ’টো পোহৰলৈ অহাৰ লগে লগে ভাৰতীয় পুৰাতত্ত্ব জৰীপ বিভাগ (ASI) আৰু স্থানীয় আৰক্ষী প্ৰশাসনৰ মাজত ব্যাপক তৎপৰতা আৰম্ভ হৈছে। প্ৰশাসনে জনোৱা মতে, ভিডিঅ’টো তাজমহলৰ কোনটো অংশত আৰু কেতিয়া চিত্ৰগ্ৰহণ কৰা হৈছিল, সেই সম্পৰ্কে বিশদ তদন্ত চলাই থকা হৈছে। নিৰাপত্তাৰ দায়িত্বত থকা জোৱানসকলৰ গাফিলতি আছিল নেকি, সেই দিশটোও পৰীক্ষা কৰা হ’ব।
আনহাতে, হিন্দু মহাসভাই নিজৰ স্থিতিত অটল থাকি জনাইছে যে ভাৰতৰ যিকোনো কীৰ্তিচিহ্নত ৰাষ্ট্ৰীয় পৰ্বৰ দিনা পতাকা উত্তোলন কৰাটো প্ৰতিজন নাগৰিকৰ মৌলিক অধিকাৰ। তেওঁলোকে এই কাৰ্যক তাজমহলৰ ইতিহাসৰ এক নতুন অধ্যায় বুলি আখ্যা দিছে।
