শেহতীয়াকৈ একেলগে প্ৰায় ৮ হাজাৰ কৰ্মচাৰীক চাকৰিৰ পৰা বৰ্খাস্ত কৰিছে মেটা কোম্পানীয়ে । ইয়াৰ ফলত কোম্পানীটোৰ মুঠ কৰ্মচাৰীৰ প্ৰায় ১০ শতাংশই চাকৰি হেৰুৱাইছে। এই ঘটনাক লৈ সমগ্ৰ বিশ্বতে চৰ্চা চলি থকাৰ মাজতে ছাটাই হোৱা কৰ্মচাৰীসকললৈ পঠিওৱা এটা শেষ ইমেইলে বিতৰ্ক আৰু অধিক বৃদ্ধি কৰিছে। সেই ইমেইলত লিখা আছিল যে যদি আপুনি এই মুহূৰ্তত অফিচত আছে, তেন্তে নিজৰ ব্যক্তিগত সামগ্ৰীসমূহ লৈ ঘৰলৈ ৰাওনা হওক। এই বাৰ্তাটোক বহু কৰ্মচাৰীয়ে অপমানজনক বুলি অভিহিত কৰিছে আৰু ইয়াক লৈ তীব্ৰ সমালোচনা আৰম্ভ হৈছে।
কৰ্মচাৰীসকলে এই ইমেইলটো লাভ কৰিছিল পুৱা প্ৰায় চাৰি বজাত। তাত স্পষ্টকৈ লিখা আছিল যে দুৰ্ভাগ্যবশতঃ কোম্পানীটোৰ পুনৰ্গঠনৰ কামত আপোনাৰ ভূমিকাৰ আৰু প্ৰয়োজন নাই।
তথ্য অনুসৰি, মেটাত মুঠ ৭৮ হাজাৰ কৰ্মচাৰী আছিল। প্ৰথমতে তেওঁলোকক ঘৰৰ পৰা কাম কৰিবলৈ কোৱা হৈছিল আৰু তাৰ পিছত পুৱতি নিশা এই ছাটাইৰ ইমেইল পঠিওৱা হৈছিল। এই ইমেইলসমূহ ছিংগাপুৰৰ কাৰ্যালয়ৰ পৰা প্ৰেৰণ কৰা হৈছিল। কেৱল এয়াই নহয়, আন হাজাৰ হাজাৰ কৰ্মচাৰীক অন্য স্থানলৈ বদলি কৰা হৈছে। কোম্পানীৰ এগৰাকী উচ্চপদস্থ বিষয়া জেনেল গেইলৰ মতে, এই কৰ্মচাৰীসকলৰ পৰিৱৰ্তে নতুন কৃত্ৰিম বুদ্ধিমত্তা বা এআই ভিত্তিক দল গঠন কৰা হৈছে আৰু প্ৰায় ৬,০০০ খালী পদ সম্পূৰ্ণৰূপে বন্ধ কৰি দিয়া হৈছে।
অৱশ্যে মেটাৰ কৰ্মচাৰীসকলে এনেধৰণৰ পদক্ষেপৰ উমান আগেই পাইছিল। কাৰণ কোম্পানীটোৱে আজিকালি এআই প্ৰযুক্তিৰ ওপৰত অধিক গুৰুত্ব দিছিল আৰু ছাটাই হ’বলগীয়া লোকসকলৰ তালিকাও আগতীয়াকৈ প্ৰস্তুত কৰা হৈছিল। ধাৰণা কৰা হৈছে যে অফিচত যাতে কোনো ধৰণৰ হুলস্থুল নালাগে, সেই বাবেই কৰ্মচাৰীসকলক ঘৰৰ পৰা কাম কৰাৰ নিৰ্দেশ দি এই ইমেইল পঠিওৱা হৈছিল। এই ছাটাইৰ ফলত ইঞ্জিনিয়াৰিং আৰু প্ৰডাক্ট টীম আটাইতকৈ বাছি প্ৰভাৱিত হ’ব বুলি জানিব পৰা গৈছে।
বিশেষজ্ঞসকলৰ মতে, বছৰৰ শেষৰ ফালে আৰু অধিক কৰ্মচাৰীয়ে চাকৰি হেৰুৱাব পাৰে। মেটাই আগতেই জনাইছিল যে তেওঁলোকে এই বছৰ ১২৫ ৰ পৰা ১৪৫ বিলিয়ন ডলাৰ খৰচ কৰাৰ পৰিকল্পনা কৰিছে আৰু ইয়াৰ বেছিভাগ অংশই কৃত্ৰিম বুদ্ধিমত্তাৰ বাবে ব্যৱহাৰ কৰা হ’ব। গতিকে আগন্তুক দিনত মেটাত আৰু ছাটাই হ’লে আচৰিত হ’বলগীয়া একো নাথাকিব।
