বিগত বৰ্ষৰ আগষ্টত কট্টৰ ইছলামিক সংগঠন তালিবানে আফগানিস্তানৰ ক্ষমতা দখল কৰাৰ পিছৰে পৰা দেশখনৰ মহিলাসকলৰ স্বাধীনতা তথা অধিকাৰ হৰণ কৰি আহিছে। ইছলামিক নীতিৰ আধাৰত মহিলাসকলৰ ওপৰত যথেষ্ট বাধা-নিষেধ আৰোপ কৰা তালিবানে স্ত্ৰী শিক্ষাৰ তীব্ৰ বিৰোধ কৰি আহিছে।
স্ত্ৰী শিক্ষাৰ বিৰুদ্ধাচৰণ কৰি ইতিপূৰ্বে তালিবানে বিশ্ববিদ্যালয়ত মহিলাৰ উচ্চ শিক্ষাৰ ওপৰত নিষেধাজ্ঞা আৰোপ কৰিছিল। ইয়াকে লৈ দেশখনৰ লগতে আন্ত:ৰাষ্ট্ৰীয় পৰ্যায়তো তীব্ৰ নিন্দাৰ সন্মুখীন হৈছিল তালিবান। কিন্তু নাচোৰবান্দা তালিবানে এই নিন্দাক উলাই কৰি এইবাৰ আন এক আজৱ নীতি গ্ৰহণ কৰিছে।
প্ৰকাশিত খবৰ অনুসৰি, নাৰী শিক্ষাৰ অধিকাৰ খৰ্ব কৰি তালিবানে এইবাৰ দেশখনৰ কিছুমান প্ৰদেশত ১০ বছৰৰ উৰ্ধৰ ছাত্ৰীক বিদ্যালয়ত অধ্যয়ন কৰাত নিষেধাজ্ঞা আৰোপ কৰিছে। তালিবানৰ এই মহিলা অধিকাৰ বিৰোধী ফটোৱা ইতিমধ্যে বিদ্যালয়সমূহক লক্ষ্য কৰি জাৰি কৰা হৈছে।
গজনী প্ৰদেশৰ তালিবান শাসিত শিক্ষা মন্ত্ৰালয়ে বিদ্যালয় আৰু হ্ৰস্বম্যাদী প্ৰশিক্ষণ কাৰ্যসূচীৰ প্ৰধানসকললৈ অধিসূচনা জাৰি কৰি ১০ বছৰৰ ওপৰৰ ছাত্ৰীক বিদ্যালয়ত পঢ়াত বাৰণ কৰিবলৈ নিৰ্দেশ দিয়া হৈছে। লগতে বিদ্যালয়ৰ মুৰব্বীসকলক তৃতীয় শ্ৰেণীৰ উৰ্ধত অধ্যয়ন কৰা ছাত্ৰীক ঘৰলৈ পঠিয়াবলৈও নিৰ্দেশনা জাৰি কৰা হৈছে।
কেৱল সিমানেই নহয়, এগৰাকী ছাত্ৰীয়ে জানিবলৈ দিয়া মতে শাৰীৰিকভাৱে ওখ হ’লে আৰু ১০ বছৰৰ ওপৰৰ হ’লে, ছাত্ৰীক বিদ্যালয়ত প্ৰৱেশ কৰিবলৈ দিয়া নহয়। তালিবানৰ স্ত্ৰী শিক্ষা বিৰোধী এই নতুন ফটোৱাই স্বাভাৱিকতেই তীব্ৰ প্ৰতিক্ৰিয়াৰ সৃষ্টি কৰিছে।
উল্লেখ্য যে, বিগত বৰ্ষৰ ডিচেম্বৰ মাহত তালিবানে বিশ্ববিদ্যালয়ত মহিলাক নিষিদ্ধ কৰাৰ কথা ঘোষণা কৰিছিল আৰু ইয়াৰ বাবে বিভিন্ন দেশৰ লগতে ৰাষ্ট্ৰসংঘৰো ব্যাপক নিন্দাৰ সন্মুখীন হৈছিল। তালিবান চৰকাৰৰ এই নিষেধাজ্ঞাৰ বিৰুদ্ধে ৰাজপথত নামি প্ৰতিবাদ সাব্যস্ত কৰিছিল ছাত্ৰীসকলে।
ক্ষমতা দখল কৰাৰ পিছৰে পৰা তালিবানে মহিলাৰ ওপৰত বহু বাধা আৰোপ কৰিছে। দেশৰ বহু প্ৰদেশত কিশোৰীৰ মাধ্যমিক বিদ্যালয়ত শিক্ষাগ্ৰহণ নিষেধ কৰা হৈছে, মহিলাসকলক বহু চৰকাৰী চাকৰিৰ পৰা আঁতৰাই দিয়া হৈছে, পৰিয়াল তথা আত্মীয় পুৰুষ সদস্যৰ অবিহনে যাত্ৰা কৰাত বাধা দিয়া হৈছে।
লগতে মহিলাসকল ঘৰৰ পৰা বাহিৰলৈ ওলাই যোৱাৰ সময়ত বোৰ্খাৰে সৰ্বশৰীৰ ঢাকি ৰাখিবলৈ নিৰ্দেশ দিয়া হৈছে। ইয়াৰ উপৰি দেশখনত মহিলাসকলক উদ্যান বা বাগিচাত প্ৰৱেশতো নিষেধাজ্ঞা আৰোপ কৰিছে তালিবানে।
