তেহৰিক-ই-তালিবানে নিঃশেষ কৰি অহিছে পাকিস্তানক! খাইবাৰ পাখতুনখোৱা প্ৰদেশত পুনৰ ৰক্তক্ষৰণ হৈছে সন্ত্ৰাসবাদী আক্ৰমণত। গ্ৰেনেড বিস্ফোৰণত এখন চৰকাৰী বাহন ধ্বংশপ্ৰাপ্ত হোৱা লগতে। ইয়াৰ ফলত এজন উচ্চ পদস্থ বিষয়াকে ধৰি পাঁচজন লোকৰ মৃত্যু হয়। মুঠ ১১ জন আহত হোৱা বুলি জানিব পৰা গৈছে। ইয়াৰ পূৰ্বেও তালিবান সন্ত্ৰাসবাদী সংগঠনে এই অঞ্চলত বহুবাৰ ৰক্তক্ষৰণ কৰিছে।
সূত্ৰ অনুসৰি বুধবাৰে বিয়লি খাইবাৰ পখতুনখোৱাৰ জনজাতি অধ্যুষিত বজাউৰ জিলাত সংঘটিত হয় এই বিস্ফোৰণ। এই আক্ৰমণত নিহত হয় বাজাউৰৰ সহকাৰী আয়ুক্ত ফৈছাল ইছমাইল আৰু মহকুমাধিপতি আব্দুল ৱাকিল। ইয়াৰ উপৰিও দুজন আৰক্ষী আৰু এজন সাধাৰণ নাগৰিকেও প্ৰাণ হেৰুৱাইছে। বাজাউৰ আৰক্ষী অধীক্ষক ৱাকাছ ৰফিকে জনোৱা মতে, খাৰ তহচিলৰ ছিদ্দিকাবাদ ৰেলৱে এলেকাৰ নৌগাই পথত সন্ত্ৰাসবাদীয়ে এখন চৰকাৰী বাহনত গ্ৰেনেডেৰে আক্ৰমণ কৰে। লগে লগে আহতসকলক উদ্ধাৰ কৰি চিকিৎসালয়লৈ প্ৰেৰণ কৰে। ঘটনা সন্দৰ্ভত তদন্ত আৰম্ভ কৰা হৈছে বুলি সদৰী কৰিছে।
তদন্তকাৰীয়ে দাবী কৰিছে যে এই ঘটনাৰ আঁৰত আছে টিটিপি। মন কৰিবলগীয়া যে দীৰ্ঘদিন ধৰি পাকিস্তানৰ মূৰৰ বিষৰ আটাইতকৈ ডাঙৰ কাৰণ হৈছে আফগানিস্তানৰ সমৰ্থিত টিটিপিৰ সন্ত্ৰাসবাদী। খাইবাৰ পাখতুনখোৱা, বেলুচিস্তান আৰু পাক-আফগান সীমান্ত এই সন্ত্ৰাসবাদীৰ আত্মগোপন স্থান হিচাপে পৰিচিত। প্ৰায়ে তাৰ পৰাই পাকিস্তানী সেনাৰ ওপৰত মাৰাত্মক আক্ৰমণ সংঘটিত হৈ অহিছে বুলি উল্লেখ কৰে। ইফালে চীন-পাকিস্তান ইকনমিক কৰিডৰ বা চিপিইচি এই অঞ্চলসমূহৰ মাজেৰে পাৰ হৈ যায়। এই সন্ত্ৰাসবাদীয়ে তাত চীনৰ বিষয়াসকলকো কেইবাবাৰো আক্ৰমণ কৰিছে। সেই অঞ্চলত সঘনাই সন্ত্ৰাসবাদী আক্ৰমণৰ ফলত পাকিস্তানৰ অৰ্থনীতিকো প্ৰভাৱিত হৈছে।
