এই সপ্তাহত আমেৰিকাৰ নিউ ইয়ৰ্কত অনুষ্ঠিত হ’বলগীয়া ৰাষ্ট্ৰসংঘৰ সাধাৰণ সভাত অংশগ্ৰহণ কৰিব তালিবানে আৰু সেই উদ্দেশ্যে ডোহাস্থিত চুহেইল চাহীনক তালিবান শাসিত আফগানিস্তানৰ স্থায়ী দূত হিচাপে মনোনীত কৰিছে।
তালিবান চৰকাৰৰ বিদেশ মন্ত্ৰী আমিৰ খান মুত্তাকীয়ে যোৱা সোমবাৰে ৰাষ্ট্ৰসংঘৰ সচিব এণ্টনিঅ’ গুটেৰেচলৈ প্ৰেৰণ কৰা এক পত্ৰযোগে অহা ২৭ ছেপ্টেম্বৰত সামৰণি পৰিব লগীয়া ৰাষ্ট্ৰসংঘৰ বাৰ্ষিক উচ্চ স্তৰীয় বৈঠকত অংশগ্ৰহণৰ অনুমতি বিচাৰিছে।
গুটেৰেচৰ মুখপাত্ৰ ফাৰহান হকে এই পত্ৰখনৰ কথা সদৰী কৰিছে।
হকৰ ভাষ্য অনুসৰি তালিবান শাসিত আফগানিস্তানৰ ৰাষ্ট্ৰসংঘৰ পদৰ এই আবেদন ইতিমধ্যে ৯ সদস্যৰ ক্ৰেডেঞ্চিয়েল সমিতিলৈ প্ৰেৰণ কৰা হৈছে। এই সমিতিত আমেৰিকা, চীন আৰু ৰাছিয়াৰ দৰে ৰাষ্ট্ৰই এই সম্পৰ্কে বিবেচনা কৰিব।
পিছে অহা সোমবাৰৰ আগেয়ে এই বৈঠক অনুষ্ঠিত হোৱাৰ সম্ভাৱনা নাই আৰু সেয়ে ৰাষ্ট্ৰসংঘৰ উচ্চ স্তৰীয় বৈঠকত তালিবানৰ বিদেশ মন্ত্ৰীয়ে যে অংশগ্ৰহণ কৰিব পাৰিব সেইয়া সন্দেহ আছে।
ৰাষ্ট্ৰসংঘৰ সচিব প্ৰধান গুটেৰেচে মন্তব্য কৰে যে আন্তঃৰাষ্ট্ৰীয় পৰ্যায়ত মান্যতা লাভৰ তালিবানৰ ইচ্ছাৰ ফলত বিশ্বৰ অন্যান্য দেশসমূহে আফগানিস্তানৰ অন্তৱৰ্তী চৰকাৰ আৰু ব্যক্তিৰ অধিকাৰ,বিশেষকৈ মহিলাৰ অধিকাৰৰ বাবে হেঁচা প্ৰয়োগ কৰিবলৈ সুবিধা পাব।
আনহাতে তালিবানৰ পত্ৰখনে আফগানিস্তানৰ ক্ষমতাচ্যুত চৰকাৰক প্ৰতিনিধিত্ব কৰা ৰাষ্ট্ৰসংঘৰ দূত গুলাম ইশ্বাকজাইৰ কাৰ্যকাল সমাপ্ত হোৱা বুলি উল্লেখ কৰিছে আৰু তেওঁ বৰ্তমান আফগানিস্তানৰ প্ৰতিনিধি নহয় বুলি সদৰী কৰিছে।
অৱশ্যে ক্ৰেণ্ডেঞ্চিয়েল সমিতিয়ে তালিবান শাসিত আফগানিস্তানৰ ৰাষ্ট্ৰদূত জনক স্বীকৃতি নিদিয়া পৰ্যন্ত ৰাষ্ট্ৰসংঘৰ সাধাৰণ সভাৰ নীতি অনুসৰি ইশ্বাকজাই পূৰ্ব পদত বাহাল থাকিব। তেওঁ ২৭ ছেপ্টেম্বৰত ৰাষ্ট্ৰসংঘৰ উচ্চ স্তৰীয় বৈঠকত আন্ত:ৰাষ্ট্ৰীয় নেতাসকলক সম্বোধন কৰিব।
উল্লেখ্য যে তালিবানে ইয়াৰ পূৰ্বে যেতিয়া ক্ষমতা দখল কৰিছিল আৰু ১৯৯৬ ৰ পৰা ২০০১ চনলৈ শাসন কৰিছিল তেতিয়া তালিবানে ক্ষমতাচ্যুত কৰা চৰকাৰখনৰ প্ৰতিনিধি জনেই ৰাষ্ট্ৰসংঘৰ দূত হিচাপেই কাৰ্য্যকৰী হৈ আছিল।
