মহাদেৱ অনলাইন গেমিং এণ্ড বেটিং এপ্লিকেচনৰ সহযোগী প্ৰতিষ্ঠান ফেয়াৰপ্লে এপত ২০২৩ চনৰ ইণ্ডিয়ান প্ৰিমিয়াৰ লীগ (আই পি এল)ৰ অবৈধ সম্প্ৰচাৰৰ সৈতে জড়িত এক গোচৰত অভিনেত্ৰী তামান্না ভাটিয়াক মহাৰাষ্ট্ৰ চাইবাৰ বিভাগে চমন জাৰি কৰিছে।
‘বাহুবলী’ৰ দৰে ছবিত অভিনয়ৰ বাবে পৰিচিত তামান্নাক ২৯ এপ্ৰিলত উপস্থিত হ’বৰ বাবে চমন জাৰি কৰা হৈছে।
ইয়াৰ পূৰ্বেও একেটা গোচৰতে ৰেপাৰ তথা গায়ক বাদশ্বাহক জেৰা কৰা হৈছিল। অভিনেতা সঞ্জয় দত্তকো এই সপ্তাহত মঙলবাৰে এই গোচৰত চমন কৰা হৈছিল যদিও তেওঁ হাজিৰ হ’বলৈ অধিক সময় বিচাৰে।
এই সকলো অভিনেতা আৰু গায়কে ফেয়াৰপ্লে এপটোক আই পি এল চাবলৈ প্ৰচাৰ কৰিছিল যদিও এপটোৰ IPL সম্প্ৰচাৰৰ অধিকাৰ নাছিল, যাৰ ফলত প্ৰকৃত সম্প্ৰচাৰকসকল যথেষ্ট লোকচানৰ সন্মুখীন হৈছিল।
যোৱা বছৰৰ ছেপ্টেম্বৰ মাহত আই পি এলৰ মেচ ষ্ট্ৰীমিং কৰাৰ বাবে বৌদ্ধিক সম্পত্তিৰ অধিকাৰ (আই পি আৰ) থকা ভায়াকম১৮ৰ অভিযোগৰ পাছত গোচৰ পঞ্জীয়ন কৰা হৈছিল। অভিযোগত উল্লেখ কৰা হৈছে যে বেটিং এপ ফেয়াৰ প্লে প্লেটফৰ্মে তেওঁলোকৰ প্লেটফৰ্মত আই পি এলৰ মেচসমূহ অবৈধভাৱে ষ্ট্ৰীমিং কৰি থকাৰ ফলত ভায়াকম১৮ৰ ১০০ কোটি টকাৰো অধিক লোকচান হৈছিল।
এফআইআৰৰ পাছতে বাদশ্বাহ, সঞ্জয় দত্ত, জেকলিন ফাৰ্নাণ্ডেজকে ধৰি কেইবাগৰাকীও তাৰকাক সোধা-পোছাৰ বাবে মাতি অনা হয়।
