বিত্তীয় কেলেংকাৰীৰ গোচৰৰ ক্ষেত্ৰত কেন্দ্ৰীয় তদন্ত সংস্থা এনফৰ্চমেণ্ট ডাইৰেক্টৰেটে চলায় অনুসন্ধান। পিছে এইবাৰ সৰিয়হৰ ডুলিতে ভূত ওলাইছে। এনফৰ্চমেণ্ট ডাইৰেক্টৰেটৰ খোদ এগৰাকী বিষয়াই গ্ৰেপ্তাৰ হৈছে উৎকোচ লোৱাৰ অভিযোগত।
দক্ষিণ তামিলনাডুৰ মাদুৰাইত কৰ্মৰত বিষয়াজনক ২০ লাখ টকা উৎকোচ লোৱাৰ অভিযোগত গ্ৰেপ্তাৰ কৰা হৈছে। ডিন্দিগুল জিলাৰ এজন চৰকাৰী চিকিৎসকৰ সৈতে জড়িত এক বিত্তীয় গোচৰৰ তদন্ত কৰি আছিল বিষয়াজনে।
আৰক্ষীয়ে সদৰী কৰা মতে, অংকিত তিৱাৰী নামৰ বিষয়াজনে গোচৰটো বন্ধ কৰিবলৈ ১ কোটি টকাৰ উৎকোচ দাবী কৰিছিল। ইয়াৰ পিছতে কৰ্তৃপক্ষই বিষয়াজনৰ বিৰুদ্ধে অভিযান চলায় আৰু ফান্দত ভৰি দিয়ে বিষয়াজনে।
দাবী কৰা উৎকোচৰ প্ৰথমটো কিস্তি হিচাপে ২০ লাখ টকা পথৰ কাষৰ এক ড্ৰপ অফ পইণ্টত সংগ্ৰহ কৰাৰ সময়তে আৰক্ষীয়ে বিষয়াজনক গ্ৰেপ্তাৰ কৰে আৰু পিছত তেওঁক জিম্মাত লোৱা হয়।
উল্লেখ্য যে, তামিলনাডুত এইবাৰেই প্ৰথমবাৰৰ বাবে গ্ৰেপ্তাৰ হৈছে এনফৰ্চমেণ্ট ডাইৰেক্টৰেটৰ বিষয়া। স্মৰ্তব্য যে, তামিলনাডুত অবৈধ বালি খননৰ সৈতে জড়িত ধন সৰবৰাহৰ অভিযোগ সন্দৰ্ভত তদন্ত চলাই আছে।
এই গোচৰত তদন্তকাৰী সংস্থাটোৱে পাঁচগৰাকী উপায়ুক্তক চমন জাৰি কৰিছে। এই বিষয়ক লৈ তামিলনাডুৰ ৰাজ্য চৰকাৰ আৰু কেন্দ্ৰীয় তদন্তকাৰী সংস্থাটোৰ মাজত বাদ-বিবাদ চলি আহিছে।
তাৰ মাজতে শেহতীয়াকৈ মাদ্ৰাজ উচ্চ ন্যায়ালয়ে তিনি সপ্তাহৰ বাবে চমন স্থগিত ৰাখিছে। এনফৰ্চমেণ্ট ডাইৰেক্টৰেটে উপায়ুক্তলৈ চমন প্ৰেৰণ কৰা কাৰ্যক যুক্তৰাষ্ট্ৰীয় ব্যৱস্থাৰ পৰিপন্থী আখ্যা দিছে ৰাজ্য চৰকাৰে।
