‘’বিপিএফ দল কোনো এটা বিশেষ জাতি বা জনগোষ্ঠীৰ দল নহয়। বিটিএডি অঞ্চলত বসবাস কৰা প্ৰতিটো জাতি-জনগোষ্ঠীৰ লোকৰ উন্নয়নৰ হকে কাম কৰাৰ বাবে হাগ্ৰামা মহিলাৰীৰ নেতৃত্বত গঠন কৰা বিপিএফ দলে দেশৰ বিভিন্ন ৰাজ্যৰ চৰকাৰবোৰে ভিন্ন প্ৰান্তত উন্নয়নৰ কাম কৰাৰ দৰে সমগ্ৰ বিটিএডি অঞ্চলৰ উন্নয়নৰ হকে কাম কৰি আহিছে আৰু সেয়া বিটিএডি অঞ্চলৰ ৰাইজে নিজেই দেখা পাইছে,’’-এই মন্তব্য তামুলপুৰ বিধানসভা সমষ্টিৰ বিধায়ক ইমানুৱেল মুছাহাৰীৰ।
মঙলবাৰে নাগ্ৰীজুলি ব্লক বিপিএফৰ উদ্যোগত নাগ্ৰীজুলি ব্লক বিপিএফ পৰ্য্যায়ৰ লোকসভাৰ নিৰ্বাচন পৰিচালনা সমিতি গঠনৰ উদ্দেশ্যে অনুষ্ঠিত এখন ৰাজহুৱা সভাত অংশ গ্ৰহণ কৰি ইমানুৱেল মুছাহাৰীয়ে এইদৰে মন্তব্য কৰে।
তেওঁ কয়,‘’ উন্নয়নৰ কামৰ ক্ষেত্ৰত কেতিয়াও আপোচ কৰা নাই বিপিএফ নেতৃত্বাধীন বিটিচি প্ৰশাসনে। হাগ্ৰামা নেতৃত্বাধীন বিপিএফ প্ৰশাসনে বিটিএডিৰ চাৰি জিলাত যি উন্নয়নৰ কাম কৰিছে, সেই উন্নয়নৰ ফল ভোগ কৰিছে বিটিএডিত বসবাস কৰা প্ৰতিটো জাতি-জনগোষ্ঠীৰ লোকে।
নাগ্ৰিজুলি ব্লক বিপিএফৰ কাৰ্যালয়ত নাগ্ৰীজুলি ব্লক বিপিএফৰ সভাপতি খেম বাহাদুৰ থাপাৰ পৌৰহিত্যত আবেলি ২ বজাত অনুষ্ঠিত সভাখনত মুছাহাৰীয়ে লগতে কয় যে কোকৰাঝাৰ লোকসভা সমষ্টিত বিগত পাঁচটা বছৰত নৱ কুমাৰ শৰণীয়াই কি কাম কৰিছে বা কোনটো জাতি-জনগোষ্ঠীৰউন্নয়নৰ কাম কৰিছে সেয়া ৰাইজে দেখা পাইছে।
তেওঁ কয় যে সাম্প্ৰতিক সময়ত সাম্প্ৰদায়িক মনোভাৱেৰে ৰাজনীতি কৰা নৱ কুমাৰ শৰণীয়া যে এটা বিগ জিৰ’ তাক বুজিবলৈও আজি ৰাইজৰ বাকী নাই বুলি মুছাহাৰীয়ে তাৎপৰ্যপূৰ্ণ মন্তব্য আগবঢ়ায়।
আনহাতে, আগন্তুক লোকসভাৰ নিৰ্বাচনত বিপিএফ দলৰ মনোনীত তথা বিজেপিৰ সমৰ্থিত প্ৰাৰ্থী প্ৰমিলাৰাণী ব্ৰহ্মই কোকৰাঝাৰ লোকসভা সমষ্টিৰ পৰা জয়ী হোৱাটো নিশ্চিত বুলিও দাবী কৰি বিটিচিৰ উন্নয়নৰ বৃহত্তৰ স্বাৰ্থৰ প্ৰতি লক্ষ্য ৰাখি প্ৰমিলাৰণী ব্ৰহ্মক ভোটদান কৰাৰ বাবেও বিধায়কগৰাকীয়ে সকলোকে আহ্বান জনায়।
ইপিনে, সভাত উপস্থিত থাকি বিটিচিৰ কাৰ্যবাহী সদস্য দেবেন বড়োয়ে কয় যে বিটিএডি অঞ্চলত বিপিএফ দলৰ বিকল্প দল নাই। হাগ্ৰামা মহিলাৰীৰ নেতৃত্বত শিক্ষা, স্বাস্থ্য, যাতায়ত, কৃষিকে ধৰি বিভিন্ন দিশত দেশৰ ভিতৰতে লেখত লবলগীয়া ধৰণেৰে উন্নয়ন তৰান্বিত কৰিছে। বিটিএডিৰ প্ৰতিটো জাতি-জনগোষ্ঠীক সম মৰ্যাদা প্ৰদান কৰি প্ৰতিটো জাতি-জনগোষ্ঠীৰ কৃষ্টি-সংস্কৃতিৰ উন্নয়নৰ ক্ষেত্ৰতো কাম কৰি আহিছে হাগ্ৰামা মহিলাৰী নেতৃত্বাধীন বিপিএফ প্ৰশাসনে।
সকলো জাতি-জনগোষ্ঠীৰ উন্নয়নৰ স্বাৰ্থত লোকসভা নিৰ্বাচনত প্ৰমীলা ৰাণী ব্ৰহ্মক ভোট দান কৰি বিটিচিৰ উন্নয়নৰ গতি অধিক ক্ষিপ্ৰতৰ কৰাৰ বাবে আহ্বান জনায় কাৰ্যবাহী সদস্য দেবেন বড়োয়ে।
সভাত উপস্থিত থাকি দাৰঙাজুলি বিটিচি পৰিষদীয় সমষ্টিৰ এমচিএলএ বিজিত গৌৰা নাৰ্জাৰীয়ে ভাষণ প্ৰসংগত কয় যে বিটিএডিৰ উন্নয়নৰ এটা নাম হৈছে বিপিএফ দল। বিটিএডিৰ সকলো জাতি-জনগোষ্ঠীৰ সংমিশ্ৰণত গঠন হোৱা বিপিএফ দলৰ উন্নয়ন কাম কাজে সম্প্ৰতি সকলো জাতি-জনগোষ্ঠীক প্ৰভাৱান্বিত কৰিছে আৰু দলটোক আস্থাত লৈ বিপিএফ দললৈ ধাৱমান হৈছে। গতিকে প্ৰমিলাৰণী ব্ৰহ্মই নিৰ্বাচনত এইবাৰ অভিলেখ সংখ্যক ভোট লাভ কৰি যে জয়লাভ কৰিব সেয়া এশ শতাংশই নিশ্চিত।
সভাত তামুলপুৰ জিলাৰ বিপিএফৰ লগতে বিভিন্ন পৰিষদ, সমিতি আদিৰ নেতাসকল উপস্থিত থাকে।
