তীব্ৰ ভাৰত বিৰোধী জামাত মিত্ৰজোঁটক পৰাস্ত কৰি বাংলাদেশত ক্ষমতালৈ আহিছে বিএনপি। বাংলাদেশৰ প্ৰধানমন্ত্ৰী হিচাপে কাৰ্যভাৰ গ্ৰহণ কৰাৰ পূৰ্বে ঐক্যৰ আহ্বান জনাইছে তাৰিক ৰহমানে। শনিবাৰে এখন সংবাদমেলত তাৰিক ৰহমানে কয় যে, ‘কোনো ফেচিবাদী শক্তিয়ে যাতে আকৌ মূৰ তুলিব নোৱাৰে’।
তাৰিক ৰহমানে সকলোৰে মাজত ঐক্যৰ আহ্বান জনাইছে। তেওঁ কয়, ‘জাতীয় ঐক্য আমাৰ শক্তি, বিভাজন আমাৰ দুৰ্বলতা। আমি সকলোৰে ওপৰত উঠি ধৰ্ম-দল নিৰ্বিশেষে কাম কৰিব লাগিব। আমি দেশৰ আইন-শৃংখলা ৰক্ষা কৰিব লাগিব, আইন সকলোৰে বাবে একেই হ’ব।’ বাংলাদেশত কাৰ্যভাৰ গ্ৰহণ কৰাৰ পূৰ্বে এয়া আছিল খালেদা পুত্ৰৰ বাৰ্তা।
তাৰিক ৰহমানক অভিনন্দন জনাই ছ’চিয়েল মিডিয়াত পোষ্ট কৰিছে প্ৰধানমন্ত্ৰী নৰেন্দ্ৰ মোদীয়ে। তেওঁ লিখিছে, গণতান্ত্ৰিক, প্ৰগতিশীল বাংলাদেশৰ প্ৰতি ভাৰতে সমৰ্থন অব্যাহত ৰাখিব। আমাৰ বহুমাত্ৰিক সম্পৰ্ক আৰু অধিক শক্তিশালী কৰাৰ বাবে আৰু আমাৰ উমৈহতীয়া উন্নয়নৰ লক্ষ্যসমূহ আগুৱাই নিয়াৰ বাবে আপোনালোকৰ সৈতে কাম কৰিবলৈ মই আগ্ৰহী। পিছত প্ৰধানমন্ত্ৰীয়ে তাৰিক ৰহমানৰ সৈতে ফোনযোগেও কথা পাতে।
বাংলাদেশৰ সিংহাসনত কেতিয়া বহিব খালেদাপুত্ৰ তাৰিকে? সূত্ৰসমূহে কয় সোমবাৰ বা মঙলবাৰে বহিব পাৰে। পৰিৱৰ্তনৰ ঢৌক আকোৱালি লৈ নতুন চৰকাৰক আদৰিবলৈ বাংলাদেশে অপেক্ষা কৰি আছে। শান্তি ঘূৰি আহক আৰু ভাৰতৰ সৈতে সুসম্পৰ্ক বজাই ৰাখক – সেয়া দেশবাসীৰ আশা। তাৰিক ৰহমানক তেওঁৰ বিশাল জয়ৰ বাবে বিভিন্ন মহলে অভিনন্দন জনাইছে। নিৰ্বাচনৰ পিছৰ হিংসাত ২ জন লোকৰ মৃত্যু হোৱাৰ লগতে ৩৬ জন আহত হৈছে।
অন্তৱৰ্তীকালীন চৰকাৰৰ মুখ্য উপদেষ্টা মহম্মদ ইউনুছে ত্ৰয়োদশ সংসদীয় নিৰ্বাচনত বিপুল সংখ্যাগৰিষ্ঠতাৰে জয়ী হোৱাৰ বাবে বাংলাদেশ জাতীয়তাবাদী পাৰ্টি বিএনপিৰ অধ্যক্ষ তাৰিক ৰহমানক ছ’চিয়েল মিডিয়াত অভিনন্দন জনায়। তেওঁ লিখিছে, বাংলাদেশ আজি বিশ্বত এক নতুন সম্ভাৱনাৰ দুৱাৰমুখত থিয় দিছে। গণতান্ত্ৰিক পৰিৱৰ্তনৰ ঐতিহাসিক প্ৰক্ৰিয়াত জনসাধাৰণৰ এই স্পষ্ট ৰায়দান দেশৰ সাংবিধানিক আৰু গণতান্ত্ৰিক ধাৰাবাহিকতা আৰু প্ৰতিষ্ঠানিক স্থিতিশীলতাৰ ক্ষেত্ৰত এক অতি গুৰুত্বপূৰ্ণ মাইলৰ খুঁটি হ’ব।
