নাগৰিকত্ব সংশোধনী বিধেয়কৰ বিৰুদ্ধে স্থিতি লৈ কংগ্ৰেছে ‘অসম চুক্তি’ৰ কথা কোৱাৰ সময়তে একাংশই কংগ্ৰেছক অসম আন্দোলনত চহিদ হোৱা ৮৫৫ জন অসমীয়াৰ হত্যাকাৰী বুলি বিভিন্ন মাধ্যমত প্ৰকাশ কৰি আহিছে। কিন্তু এই মন্তব্যক উভতি ধৰিলে প্ৰাক্তন মুখ্য মন্ত্ৰী তৰুণ গগৈয়ে।
সোমবাৰে গুৱাহাটীৰ ৰাজীৱ ভৱনত অনুষ্ঠিত এখন সংবাদমেলত প্ৰাক্তন মুখ্য মন্ত্ৰী গৰাকীয়ে তেতিয়াৰ আন্দোলনৰ নেতৃত্বকহে ইয়াৰ বাবে দায়ী বুলি মন্তব্য কৰে।
‘৮৫৫ জন লোকৰ মৃত্যুৰ বাবে আছু আৰু প্ৰফুল্ল কুমাৰ মহন্ত দায়ী। তেতিয়াৰ প্ৰধান মন্ত্ৰী ইন্দিৰা গান্ধীয়ে ১৯৮০ চনতেই অসমলৈ আহি আন্দোলনকাৰী সকলক ১৯৭১ চনৰ ভিত্তি বছৰ মানি ল’বলৈ কৈছিল। তাৰ পাছত ১৯৬৭ লৈকেও মানি ল’বলৈ কৈছিল। কিন্তু তেতিয়া তেওঁলোকে এই কথা গ্ৰহণ নকৰিলে। যদি তেতিয়াই ইন্দিৰা গান্ধীৰ এই কথা মানি ল’লে হেতেন ৮৫৫ জন চহিদ নহ’ল হেতেন’, তৰুণ গগৈয়ে কয়।
তৰুণ গগৈয়ে লগতে কয় যে ১৯৮০ চনত আন্দোলনকাৰী নেতাসকলৰ নিৰ্বাচনত প্ৰতিদ্বন্দ্বিতা কৰাৰ বয়স হোৱা নাছিল বাবেই তেতিয়া এই কথা মানি লোৱা নাছিল।
একেটা ভিত্তি বছৰকে ১৯৮৫ চনত আন্দোলনৰ নেতৃত্বই কি যুক্তিত মানি ল’লে বুলিও তেওঁ প্ৰশ্ন উত্থাপন কৰে।
তৰুণ গগৈয়ে লগতে ‘অসম চুক্তি’ কংগ্ৰেছেই কৰিছিল বুলি দাবী কৰি এই ক্ষেত্ৰত দলটো দায়বদ্ধ বুলিও কয়। ‘অসম চুক্তি’ সন্দৰ্ভত কংগ্ৰেছৰ মাত মতাৰ সম্পূৰ্ণ অধিকাৰ থকা বুলিও তেওঁ মত প্ৰকাশ কৰে।
ইপিনে, তৰুণ গগৈৰ এই মন্তব্যৰ পাছত বিষয়টো তথ্য সহকাৰে প্ৰমাণ কৰাৰ দাবী জনাইছে সদৌ অসম ছাত্ৰ সন্থাৰ মুখ্য উপদেষ্টা ড০ সমুজ্বল ভট্টাচাৰ্যই। তেওঁ লগতে এই মৃত্যুৰ বাবে তেতিয়াৰ শাসনাধিষ্ঠ কংগ্ৰেছই দায়ী বুলি মন্তব্য কৰে।
‘অসম আন্দোলনত ৮৫৫ জন লোকে প্ৰাণ হেৰুৱাবলগীয়া ঘটনাৰ বাবে সেই সময়ৰ দিল্লী আৰু দিচপুৰত থকা চৰকাৰ দায়ী। অসমৰ মানুহে এটা সমস্যা সমাধানৰ বাবে ন্যায্য দাবী কৰি শান্তিপূৰ্ণ ভাৱে আন্দোলন কৰিছিল। কিন্তু তেতিয়াৰ চৰকাৰে ইয়াৰ ওপৰত দমন চলাবলৈ চেষ্টা কৰিছিল’, নৰ্থ-ইষ্ট নাওক সমুজ্বল ভট্টাচাৰ্যই কয়।
আনহাতে, তৰুণ গগৈৰ উক্ত মন্তব্যৰ প্ৰতিক্ৰিয়া ব্যক্ত কৰিছে প্ৰাক্তন মুখ্য মন্ত্ৰী তথা অসম আন্দোলনৰ সময়ৰ আছুৰ সভাপতি প্ৰফুল্ল কুমাৰ মহন্তই।
মহন্তই গণতান্ত্ৰিক আন্দোলনৰ বাবে ওলাই অহা মানুহক কংগ্ৰেছ চৰকাৰই গুলীয়াই মাৰিছিল বুলি মন্তব্য কৰাৰ লগতে কয়,” ৮৫৫ জন চহিদ হ’বলগীয়া হোৱাৰ বাবে কেৱল হিতেশ্বৰ শইকীয়াই নহয়, তৰুণ গগৈও দায়ী। সেই সময়ত গগৈও এগৰাকী কেন্দ্ৰীয় মন্ত্ৰী আছিল। তেওঁ অসমৰ সমস্যাৰ কথা দিল্লীক কিয় বুজাব পৰা নাছিল?”
