মঙলবাৰে বিনাযুদ্ধে বাৰ্মিজ সেনাৰ দখললৈ গৈছে ম্যানমাৰৰ চাগাইং অঞ্চলৰ তা গা গাওঁস্থিত এন এচ চি এন-কেৰ মুখ্য কাৰ্য্যালয়।
ঘটনাটো স্বীকাৰ কৰিলেও তাতমাদাও (বাৰ্মিজ আৰ্মি)-এ ইয়াক এতিয়ালৈকে “দখল” বুলি বিবৃতি জাৰি কৰা নাই। কিন্তু এন এচ চি এন-কেৰ তৰফৰ পৰা ইয়াক “দখল” বুলিয়ে অভিহিত কৰা হৈছে।
“তেওঁলোকে দখল কৰিলে বুলি ক’ব পৰা যায়। কোনো লোক হতাহত হোৱা নাই। আমাৰ শান্তি সমিতি আৰু অস্ত্ৰ নোলোৱা কিছুসংখ্যক সদস্য এতিয়াও মুখ্য কাৰ্য্যালয়তে আছে,” এন এচ চি এন-কেৰ কেন্দ্ৰীয় কাৰ্য্যনিৰ্বাহক সদস্য উ ক্যাও ৱন চেইনৰ এই উদ্ধৃতি ম্যানমাৰৰ নিউজ প’ৰ্তেল ইৰাৱদি-ৰ।
ম্যানমাৰ চৰকাৰৰ সৈতে শান্তি প্ৰক্ৰিয়া “অস্থিৰ” নোহোৱাৰ স্বাৰ্থতে মুখ্য কাৰ্য্যালয়টো “বিনাযুদ্ধে” এৰি দিয়া বুলি এন এচ চি এন-কেই দাবী কৰিছে। কিন্তু তাতমাদাও-ৰ এই অভিযান ম্যানমাৰৰ ওপৰত ভৌগোলিকভাৱে অত্যন্ত নিৰ্ভৰশীল আলফা (স্বাধীন)কে ধৰি উত্তৰ-পূবৰ বিদ্ৰোহী সংগঠনৰ বাবেও চিন্তাজনক হ’ব পাৰে।
চাগাইঙত নাগা স্বায়ত্তশাসন ম্যানমাৰ চৰকাৰৰ স্বীকৃতিপ্ৰাপ্ত। এই সন্দৰ্ভত ২০১২ চনৰ এপ্ৰিলৰ পৰা সংগঠনটোৰ সৈতে চুক্তিবদ্ধ হৈ আছে ম্যানমাৰ চৰকাৰ। এন এচ চি এন-কেৰ সৈতে যোৱা ১৯ বছৰ ধৰি তাতামাদাও-ৰ কোনো সংঘৰ্ষ হোৱা নাই।
এন এচ চি এন-কেৰ ভাষ্য মতে চুক্তিখনত মুখ্য কাৰ্য্যালয় “স্থানান্তৰ”ৰ বিষয় নাই। কিন্তু মঙলবাৰৰ অভিযানৰ পূৰ্বে বিদ্ৰোহী সংগঠনটোক কোনো আগতীয়া জাননী দিয়া নাছিল তাতমাদাও-ৱে। “ম্যানমাৰ সেনাই কিয় ত্ৰুপ পঠাইছে বুজি পোৱা নাই,” নাগা স্বায়ত্তশাসিত এলেকাৰ কাৰ্য্যনিৰ্বাহক উ কাচি ৰেঙৰ মন্তব্যৰ উদ্ধৃতি ইৰাৱদি-ৰ।
আনহাতে তাতমাদাও-ৰ প্ৰস্তুতিয়ে প্ৰমাণ কৰে যে মুখামুখি যুদ্ধৰ সম্পূৰ্ণ সাজু হৈ এন এচ চি এন-কে কাৰ্য্যালয়ত প্ৰৱেশ কৰিছিল ম্যানমাৰ সেনা। সেনা বাহিনীটোত আছিল ৬টা বেতেলিয়নৰ ৪ শতাধিক ত্ৰুপ, তাতমাদাও-ৰ নৰ্থ-ৱে’ষ্ট কমান্দৰ অধীনত অভিযানটো চলিছিল কামতি জিলাৰ তেক্তিকেল কমান্দাৰৰ নেতৃত্বত।
আঞ্চলিক চুক্তিৰ পৰিৱৰ্তে শেহতীয়াকৈ সমগ্ৰ দেশজোৰা শান্তি চুক্তিৰ বাবে এন এচ চি এন-কেক হেঁচা দি আহিছে ম্যানমাৰ চৰকাৰে। কিন্তু অখণ্ড “ভূ-ৰাজনৈতিক” নাগাভূমিত বিশ্বাসী নাগা বিদ্ৰোহী দলটোৱে এই চুক্তিত ম্যানমাৰৰ লগতে নাগালেণ্দকে ধৰি সমগ্ৰ উত্তৰ-পূবৰ নাগা এলেকা সামৰি লোৱাটো বিচাৰিছে।
মোদী চৰকাৰৰ আমোলত “চূড়ান্ত” নাগা চুক্তিৰ আশ্বাস দি অহা ভাৰতীয় পক্ষৰ বাবে ম্যানমাৰ চৰকাৰৰ সৈতে এন এচ চি এন-কেৰ এইধৰণৰ চুক্তি অস্বস্তিকৰ হ’ব। আৰু ভাৰতীয় পক্ষক এই মুহূৰ্তত মুকলিকৈ হয়তো অস্বস্তিত পেলাব নুখুজিব ম্যানমাৰ চৰকাৰে।
ভাৰতৰ সমগ্ৰ উত্তৰ-পূবত নাগৰিকত্ব বিধেয়কসৃষ্ট পৰিস্থিতিৰ পৰিপ্ৰেক্ষিতত লোকসভা নিৰ্বাচনৰ আগ মুহূৰ্তত নিশ্চয় বিষয়টো কেন্দ্ৰৰ বাবেও হয়টো সংবেদনশীল।
এন এচ চি এন-কেৰ প্ৰতিষ্ঠাপক খাপলাং ম্যানমাৰৰে নাগৰিক আছিল। খাপলাঙৰে ভতিজা য়ং অং বৰ্তমান সংগঠনটোৰ অধ্যক্ষ।
