তাই আহোম ভাষাটো বিদ্যালয়ৰ প্ৰাথমিক পৰ্যায়ৰ পৰা মহাবিদ্যালয় তথা বিশ্ববিদ্যালয়ৰ পাঠ্যক্ৰমত অন্তৰ্ভুক্ত কৰাৰ দাবীত তাই আহোম যুৱ ছাত্ৰ সন্মিলনৰ লখিমপুৰ জিলা সমিতিয়ে আজি দুঘণ্টীয়া অৱস্থান ধৰ্মঘট কাৰ্যসূচী ৰূপায়ণ কৰে।
উত্তৰ লখিমপুৰত ৰূপায়ণ কৰা ধৰ্মঘট কাৰ্যসূচীত লখিমপুৰ জিলা সমিতিয়ে তেওঁলোকৰ ভাষাটো অৱহেলিত হৈ অহাৰ অভিযোগ তুলি তীব্ৰ অসন্তুষ্টি ব্যক্ত কৰে।
ধৰ্মঘট কাৰ্যসূচীৰ পাছত জিলা সমিতিয়ে উপায়ুক্তৰ জৰিয়তে মুখ্য মন্ত্ৰী সৰ্বানন্দ সোণোৱাললৈ এখন স্মাৰকপত্ৰ প্ৰেৰণ কৰে বুলিও জনায়।
মুখ্য মন্ত্ৰীলৈ প্ৰেৰণ কৰা স্মাৰকপত্ৰত তেওঁলোকে প্ৰাথমিক পৰ্যায়ৰ পৰা মহাবিদ্যালয় তথা বিশ্ববিদ্যালয়ৰ পাঠ্যক্ৰমত তাই ভাষাটো অন্তৰ্ভুক্ত কৰাৰ লগতে য়ুনিক’ডতো অন্তৰ্ভুক্তৰ দাবী জনায়।
উল্লেখ্য যে যোৱা মাহৰ ২৭ ছেপ্তেম্বৰত নাৰায়ণপুৰস্থিত মাধৱদেৱ বিশ্ববিদ্যালয়ৰ উপাচাৰ্যক এখন স্মাৰকপত্ৰৰ জৰিয়তে বিশ্ববিদ্যালয়খনত তাই আহোম ভাষাটো দুবছৰীয়া পাঠদানৰ ব্যৱস্থা কৰিবলৈ দাবী জনাইছিল। কিন্তু বিশ্ববিদ্যালয়ৰ তৰফৰ পৰা কোনো উত্তৰ নোপোৱাত সংগঠনৰ নেতৃবৃন্দ ক্ষুভিত হৈ পৰিছে।
উত্তৰ লখিমপুৰস্থিত উপায়ুক্তৰ কাৰ্যালয়ৰ সন্মুখত ৰূপায়ণ কৰা অৱস্থান ধৰ্মঘট কাৰ্যসূচীত উপস্থিত থকা জিলা সমিতিৰ সভাপতি চাও জয় জ্যোতি গগৈয়ে কয়, ‘অসম চৰকাৰে আমাৰ ভাষাটোৰ ওপৰত গুৰুত্ব দিয়াৰ বাবে দাবী জনলো। নহ’লে অনাগত দিনত তীব্ৰ প্ৰতিবাদী কাৰ্যসূচী গ্ৰহণ কৰিম’।
ধৰ্মঘট কাৰ্যসূচীত সভাপতি গৰাকীৰ উপৰি সম্পাদকদ্বয় ক্ৰমে চাও অক্ষয় গগৈ আৰু চাও দুলু লাহনৰ লগতে বিভিন্ন কৰ্মকৰ্তা উপস্থিত থাকে।
