নাগৰিকত্ব সংশোধনী বিধেয়ক, ২০১৬ বাতিল আৰু ছয় জনগোষ্ঠীক জনজাতিকৰণৰ দাবীত তাই আহোম যুৱ পৰিষদে কাইলৈ অৰ্থাৎ ৯ ফেব্ৰুৱাৰিত ১২ ঘন্টীয়া অসম বন্ধৰ আহ্বান জনাইছিল। কৃষক মুক্তি সংগ্ৰাম সমিতি, আহোম সেনা, জাতীয়তাবাদী যুৱ ছাত্ৰ পৰিষদ, আহোম জাতীয় গণ মঞ্চ, অনুসূচিত জাতি ছাত্ৰ সন্থাকে ধৰি অসমৰ বহুকেইটা জাতীয় সংগঠনে তাইপাৰ এই বন্ধত পূৰ্ণ সমৰ্থন আগবঢ়াইছে।
উল্লেখযোগ্য যে ৰাইজৰ মাজত বিভ্ৰান্তি সৃষ্টি কৰিবৰ বাবে এচাম দুষ্ট চক্ৰই তাই আহোম যুৱ পৰিষদে আহ্বান জনোৱা ১২ ঘন্টীয়া অসম বন্ধ উঠাই লোৱা বুলি উৰা বাতৰি উলিয়াই দিছে। দুষ্ট চক্ৰটোৱে সংগঠনটোৰ ভাৰপ্ৰাপ্ত সম্পাদক মৃদুল দেওধাই ফুকন আৰু প্ৰচাৰ সম্পাদক গুণকান্ত গগৈৰ নাম উল্লেখ থকা এক প্ৰেছ বিবৃতিৰ জৰিয়তে অসম বন্ধ উঠাই লোৱা বুলি প্ৰকাশ কৰিছিল।
অৱশ্যে পৰৱৰ্তী সময়ত সংগঠনটোৰ কেন্দ্ৰীয় কাৰ্যকৰী সভাপতি লোহিত গগৈয়ে স্পষ্ট কৰি দিয়ে যে তাই আহোম যুৱ পৰিষদে ৯ ফেব্ৰুৱাৰীত আহ্বান জনোৱা ১২ ঘন্টীয়া অসম বন্ধ উঠাই লোৱা নাই। অসমৰ জনসাধাৰণক এনে ধৰণৰ ভুৱা বাতৰিক গুৰুত্ব নিদিবলৈ আহ্বান জনায় সকলোৰে সহযোগিতা কামনা কৰিছে।
লগতে এনে ধৰণৰ উৰা বাতৰিৰে ৰাইজক বিভ্ৰান্তি সৃষ্টি কৰা সকলক ধিক্কাৰ জনোৱাৰ লগতে শান্তি-শৃংখলা বিঘ্নিত হ’ব পৰা এনেধৰণৰ অশোভ আচৰণ যাতে কেনেও পুনৰবাৰ নকৰে তাক সকীয়াই দিয়ে তাইপাৰ কেন্দ্ৰীয় কাৰ্যকৰী সভাপতি গৰাকীয়ে।
