“ভেন্সাৰ শিক্ষকক প্ৰতাৰণা কৰা চৰকাৰৰ পতন নিশ্চিত ।” এই মন্তব্য অসম শিক্ষক-কৰ্মচাৰী ঐক্যমঞ্চৰ মুখ্য সভাপতি কুশল কুমাৰ হালৈৰ ।
বৃহস্পতিবাৰে বৰপেটা চহৰত অনুষ্ঠিত অসম শিক্ষক-কৰ্মচাৰী ঐক্যমঞ্চৰ এখন গুৰুত্বপূৰ্ণ সভাত অংশগ্ৰহণ কৰি সংগঠনটোৰ মুখ্য সভাপতি গৰাকীয়ে লগতে কয় যে, প্ৰাদেশিকীকৰণৰ পুনৰীক্ষণৰ নামত চৰকাৰে প্ৰাথমিক পৰ্যায়ৰ শিক্ষক সকলক প্ৰতিবছৰে মানসিক নিৰ্যাতন চলাই থকাটো দুৰ্ভাগ্যজনক।
শেহতীয়াকৈ একাংশ শিক্ষানুষ্ঠানৰ শিক্ষকৰ পদ প্ৰাদেশিকীকৰণৰ তালিকা প্ৰকাশ কৰা কাৰ্যক আদৰণি জনায় যদিও উক্ত তালিকাতো বহু শিক্ষক বঞ্চিত হোৱা বুলি তেওঁ উল্লেখ কৰে।
ঐক্যমঞ্চৰ বৰপেটা জিলা সমিতিৰ সভাপতি ছবেদ ভূঞাৰ সভাপতিত্বত অনুষ্ঠিত সভাখনত প্ৰাথমিক পৰ্যায়ৰ ভেন্সাৰ শিক্ষানুষ্ঠান সমুহৰ প্ৰাদেশিকীকৰণৰ তালিকা অতি শীঘ্ৰে প্ৰকাশ কৰাৰ বাবে চৰকাৰক তেওঁ দাবী জনায় ।
প্ৰাদেশিকীকৰণ আইন ২০১৭ অনুসৰি বাদ পৰা শিক্ষক-কৰ্মচাৰী সকলৰ পদ সমূহ প্ৰাদেশিকীকৰণ কৰাৰ ব্যৱস্থা গ্ৰহণ কৰাৰ বাবেও চৰকাৰক তেওঁ দাবী জনায়।
বৰপেটা চহৰৰ প্ৰতিবন্ধী সন্থাৰ কাৰ্যালয় প্ৰাংগণত সামাজিক দূৰত্ব বজাই ৰাখি অনুষ্ঠিত সভাখনত বিভিন্ন পৰ্যায়ৰ নেতা আৰু শিক্ষক-শিক্ষয়িত্ৰী উপস্থিত থাকে।
সভাৰ আৰম্ভণিতে লোকশিল্পী অৰ্চনা মহন্ত, বৰপেটা সত্ৰৰ ডেকা সত্ৰীয়া নৱজিৎ দাস পাঠকৰ বিয়োগত এক মিনিট সময় মৌনতা অৱলম্বন কৰি বিদেহী আত্মাৰ চিৰশান্তি কামনা কৰে।