পশ্চিম বংগৰ সোনাৰপুৰ ভ্ৰমণৰ সময়ত তৃণমূল কংগ্ৰেছৰ ৰাষ্ট্ৰীয় সাধাৰণ সম্পাদক তথা সাংসদ অভিষেক বেনাৰ্জীৰ ওপৰত একাংশ স্থানীয় লোকে চলোৱা আক্ৰমণক লৈ তীব্ৰ উত্তেজনাৰ সৃষ্টি হৈছে। নিৰ্বাচনৰ পিছত হোৱা হিংসাত্মক ঘটনাত ক্ষতিগ্ৰস্ত হোৱা পৰিয়ালসমূহক দেখা কৰিবলৈ যোৱাৰ সময়তে এই ঘটনা সংঘটিত হয়। উত্তেজিত জনতাই তেওঁৰ কাপোৰ ফালি পেলায় আৰু শিল তথা কণী নিক্ষেপ কৰে। ঘটনাস্থলীত থকা আৰক্ষীয়ে তেওঁক সুৰক্ষা দিবলগীয়া হয় আৰু মূৰত হেলমেট পিন্ধাই অতি কষ্টৰে সেই স্থানৰ পৰা উদ্ধাৰ কৰি উলিয়াই আনে।
এই আক্ৰমণৰ পিছতে অভিষেক বেনাৰ্জীয়ে বিজেপিৰ বিৰুদ্ধে এক গুৰুতৰ অভিযোগ উত্থাপন কৰিছে। তেওঁ কয় যে বিজেপিয়ে তেওঁক হত্যা কৰিবলৈ এই ষড়যন্ত্ৰ ৰচনা কৰিছে আৰু এই সমগ্ৰ ঘটনা কেমেৰাত ৰেকৰ্ড হৈছে। এই সন্দৰ্ভত তেওঁলোকে উচ্চ ন্যায়ালয় আৰু ৰাজ্যপালৰ দ্বাৰস্থ হ’ব বুলি জানিবলৈ দিয়ে। আনহাতে এই ঘটনাৰ মাজতে চিআইডিয়ে অভিষেক বেনাৰ্জীলৈ এক জাননী পঠিয়াইছে আৰু অহা ১ জুন সোমবাৰে দুপৰীয়া ১২ বজাত পশ্চিম বংগ আৰক্ষীৰ মুখ্য কাৰ্যালয় ভবানী ভৱনৰ চিআইডি কাৰ্যালয়ত হাজিৰ হ’বলৈ নিৰ্দেশ দিছে।
আনফালে অসম তৃণমূল কংগ্ৰেছৰ ভিতৰতো এক ডাঙৰ খহটা দেখা গৈছে। অসম তৃণমূলৰ সভাপতি অভিজিৎ মজুমদাৰে নিজৰ পদৰ পৰা পদত্যাগ কৰি দলৰ মুখ্য নেত্ৰী মমতা বেনাৰ্জীলৈ পদত্যাগ পত্ৰ পঠিয়াইছে। তেۆঁ অভিযোগ কৰিছে যে দলটোৱে এতিয়া নিজৰ আচল লক্ষ্য হেৰুৱাই পেলাইছে আৰু সকলো সম্প্ৰদায়ৰ স্বাৰ্থ ৰক্ষা কৰাৰ পৰিৱৰ্তে কেৱল মুছলমান ভোট বেংকৰ পিছত দৌৰি এটা সাম্প্ৰদায়িক সংগঠনলৈ ৰূপান্তৰিত হৈছে। বহু দলৰ পৰা বহিষ্কৃত হোৱা শ্বেৰমান আলীয়ে নিৰ্বাচনৰ ঠিক আগত তৃণমূলত যোগ দি জয়ী হোৱা কাৰ্যকো তেওঁ তীব্ৰ সমালোচনা কৰে আৰু কয় যে তেওঁ বিগত ২০ বছৰতকৈও অধিক সময় ধৰি অসমত দলটোৰ অন্যতম প্ৰতিষ্ঠাপক হিচাপে কাম কৰিছিল যদিও বৰ্তমানৰ স্থিতিত তেওঁ অতি দুখিত।
