এক চাঞ্চল্যকৰ আত্মহত্যাৰ ঘটনাই তোলপাৰ লগাইছে মধ্য প্ৰদেশৰ ইন্দোৰ জিলাত। ইন্দোৰৰ কাষৰীয়া চেহোৰ জিলাৰ দুগৰাকী সহপাঠী কিশোৰীয়ে ইন্দোৰত নিজৰ প্ৰেমিকক লগ কৰিবলৈ গৈ বিমুখ হোৱাৰ বাবেই একেলগে বিহ সেৱন কৰি আত্মহত্যা কৰাৰ লগতে আন এগৰাকী সহপাঠী সংকটজনক অৱস্থাত চিকিৎসাধীন হ’বলগীয়া হৈছে।
ঘটনা সন্দৰ্ভত আৰক্ষীয়ে জানিবলৈ দিয়া মতে শুকুৰবাৰে তিনিওগৰাকী সহপাঠী কিশোৰীয়ে চেহোৰ জিলাৰ আষ্টা চহৰত থকা তেওঁলোকৰ বিদ্যালয়ৰ পৰা শ্ৰেণীত উপস্থিত নথকাকৈ বাহিৰে বাহিৰে প্ৰায় ১০০ কিলোমিটাৰতকৈও অধিক দূৰত থকা ইন্দোৰ অভিমুখে এখন বাছত উঠি যাত্ৰা কৰে।
তিনিও কিশোৰীৰ মাজৰ এগৰাকীয়ে প্ৰেমিকলৈ বাৰে বাৰে ফোন কৰাৰ পাছতো প্ৰেমিকে ফোন ৰিছিভ নকৰাৰ বাবেই সহপাঠী আন দুগৰাকী কিশোৰীৰ সৈতে ইন্দোৰলৈ ৰাওনা হয়। যদি ইন্দোৰত প্ৰেমিকৰ সাক্ষাৎ নাপায়, তেতিয়াহ’লে তাতেই দুই বান্ধৱীৰ সৈতে আত্মহত্যা কৰাৰ সিদ্ধান্ত লয় কিশোৰীগৰাকীয়ে।
এই উদ্দেশ্যে কিশোৰীগৰাকীয়ে অষ্টাৰ এখন দোকানৰ পৰাই ইন্দোৰ অভিমুখে যোৱাৰ পূৰ্বে বিহ সংগ্ৰহ কৰে। তাৰ পিছতে ইন্দোৰত উপস্থিত হৈ কিশোৰীগৰাকীয়ে পুনৰ প্ৰেমিকলৈ ফোন লগায় যদিও পুনৰ উত্তৰ দিয়াৰ পৰা বিৰত থাকে প্ৰেমিকগৰাকী।
বাৰে বাৰে যোগাযোগ কৰাৰ পাছতো নিৰাশ হোৱাত কিশোৰীগৰাকীয়ে পূৰ্বে লোৱা সিদ্ধান্ত মতেই বিহ পান কৰে। ইফালে বান্ধৱীৰ এই সিদ্ধান্ত অনুসৰণ কৰি আন দুগৰাকী সহপাঠীয়েও লগে লগে বিহ পান কৰে।
ইন্দোৰৰ এগৰাকী শীৰ্ষ আৰক্ষী বিষয়াই জানিবলৈ দিয়া মতে বিহ পানৰ পিছতে দুগৰাকী কিশোৰীৰ মৃত্যু হোৱাৰ বিপৰীতে আন এগৰাকী কিশোৰীক জীৱিত অৱস্থাত উদ্ধাৰ কৰা হয়। বৰ্তমান এই কিশোৰীগৰাকী সংকটজনক অৱস্থাত স্থানীয় এক চিকিৎসালয়ত চিকিৎসাধীন হৈ আছে বুলি বিষয়াগৰাকীয়ে জানিবলৈ দিছে।
তেওঁ লগতে উল্লেখ কৰা মতে কিশোৰী কেইগৰাকীৰ পৰা কোনো চুইচাইড নোট এইপৰ্যন্ত উদ্ধাৰ হোৱা নাই। চিকিৎসাধীন কিশোৰী গৰাকীৰ বক্তব্যৰ ওপৰতে বিষয়টোৰ অনুসন্ধানৰ বাবে সম্পূৰ্ণ নিৰ্ভৰ কৰি আছে বুলি আৰক্ষী বিষয়াগৰাকীয়ে লগতে কয়।
