কোকৰাঝাৰ জিলাৰ পাটগাঁও আৰক্ষী চকীৰ অন্তৰ্গত ৭নং আফলাগাওঁৰ শম্ভু বসুমতাৰী ওৰফে ব্ৰহ্ম (৩৫) নামৰ বিবাহিত লোক এজনে এগৰাকী উচ্চতৰ মাধ্যমিকত পঢ়ি থকা ছাত্ৰীক ধৰ্ষণ কৰা কাৰ্যই চাঞ্চল্যৰ সৃষ্টি কৰিছে৷ ইতিমধ্যে ঘটনা সন্দৰ্ভত পাটগাঁও আৰক্ষী চকীত এজাহাৰ দাখিল কৰিছে যদিও ধৰ্ষণকাৰী লোকজনক গ্ৰেপ্তাৰ কৰিবলৈ সক্ষম হোৱা নাই৷
এজাহাৰত উল্লেখ কৰা মতে যোৱা ৪ অক্টোবৰৰ বিয়লি গৌজনপুৰী গাঁওৰ উচ্চতৰ মাধ্যমিকৰ ছাত্ৰী এগৰাকীক নিজ ঘৰৰ পৰা অপহৰণ কৰি লৈ আহে অভিযুক্ত শম্ভু বসুমতাৰীয়ে৷
ইয়াৰ পিছত শম্ভুয়ে নিজৰ ঘৰৰ কোঠাত ছাত্ৰী গৰাকীক বলপূৰ্বক আৱদ্ধ কৰি ৰাখি কেইবাবাৰ ধৰ্ষণ কৰাৰ লগতে মাৰি পেলোৱাৰ চেষ্টা চলায়৷ এই কথা ইকাণ-সিকাণ হৈ গাঁওৰ ৰাইজে গম পাই শম্ভুৰ ঘৰত উপস্থিত হৈ ধৰ্ষিতা ছোৱালীজনীক উদ্ধাৰ কৰে যদিও ধৰ্ষণকাৰী শম্ভু বসুমতাৰী সুযোগ বুজি পলায়ন কৰে৷
ৰাইজে পিছত ছোৱালীজনীক অচেতন অৱস্থাত কোকৰাঝাৰৰ আৰএনবি চিকিৎসালয়লৈ লৈ আহে যদিও পিছলৈ উন্নত চিকিৎসাৰ বাবে বঙাইগাওঁৰ ল’ৱাৰ আসাম চিকিৎসালয়ত ভৰ্তি কৰোৱা হয়৷
অদ্যাপি যুৱতী গৰাকীৰ অৱস্থা সংকটজনক বুলি জনা গৈছে৷ উল্লেখ্য যে শম্ভু বসুমতাৰীয়ে প্ৰায় চাৰি বছৰ পূৰ্বে নিজৰ পত্নীক হত্যা কৰি আত্মহত্যাৰ ৰূপ দিবলৈ চেষ্টা কৰিছিল৷ তদুপৰি শম্ভু বসুমতাৰীয়ে বিভিন্ন অসামাজিক কাম-কাজত জড়িত হোৱাৰ উপৰিও ধন দাবী আৰু এনডিএফবিৰ লিংকমেন হিচাপেও কাম কৰিছিল৷
শম্ভু বসুমতাৰীক আৰক্ষীয়ে পূৰ্বে গ্ৰেপ্তাৰ কৰি জেল হাজোতলৈ প্ৰেৰণ কৰিছিল যদিও জামিনত মুকলি আকাশৰ তললৈ ওলাই পুনৰ হত্যা, হিংসা, ধনদাবী, অপহৰণ আৰু শেহতীয়াকৈ এগৰাকী কিশোৰীক ধৰ্ষণ কৰি হত্যাৰ চেষ্টা চলাইছিল৷
এই ঘটনাই অঞ্চলটোত চাঞ্চল্যৰ সৃষ্টি কৰিছে৷ ৰাইজে ধৰ্ষণকাৰী শম্ভুৰ কঠোৰ শাস্তিৰ দাবী জনাইছে৷ মন কৰিবলগীয়া এয়ে যে শম্ভু বসুমতাৰীক ৭ নং আফলা গাওঁৰ ৰাইজে সমাজৰ পৰা পূৰ্বেই বহিস্কাৰ কৰিছে৷ আৰক্ষীয়ে ইতিমধ্যে ধৰ্ষণকাৰী শম্ভু বসুমতাৰীৰ দেউতাকক সোধপোছৰ বাবে আটক কৰিছে৷
