ডুবাই এয়াৰ শ্ব’ ২০২৫-ৰ সময়ত ভাৰতীয় বায়ুসেনাৰ যুঁজাৰু বিমান ‘তেজস’ দুৰ্ঘটনাত পতিত হৈ কৰুণভাৱে প্ৰাণ হেৰুৱায় উইং কমাণ্ডাৰ নমন শ্যালে। তেওঁৰ এই আকস্মিক মৃত্যুত হিমাচল প্ৰদেশত থকা তেওঁৰ ওপজা গাঁও গভীৰ শোকত ডুবি গৈছে।
মূলতঃ নগ্ৰোটা বাগৱান তহচিলৰ পাটিয়ালকাৰ গাঁৱৰ বাসিন্দা ৩৪ বছৰীয়া পাইলটজনে মৃত্যুৰ সময়ত পত্নী (যিগৰাকী ভাৰতীয় বায়ুসেনাৰ বিষয়া), ছবছৰীয়া কন্যা আৰু পিতৃ-মাতৃক এৰি থৈ গৈছে।
এই মৰ্মান্তিক ঘটনাৰ খবৰ পোৱাৰ লগে লগে তেওঁৰ গৃহ চহৰত আত্মীয়-স্বজন আৰু গাঁৱৰ লোকসকল সমবেত হৈ শোকত ভাগি পৰে।
শ্যালৰ আত্মীয় ৰমেশ কুমাৰে নিজৰ দুখ প্ৰকাশ কৰি কয়, “নমনৰ পিতৃ-মাতৃ বৰ্তমান তামিলনাডুৰ কইম্বাটুৰৰ সমীপৰ চুলুৰ (Sulur) বায়ুসেনা ষ্টেচনত আছে। তেওঁৰ পত্নীও বৰ্তমান বায়ুসেনাত সেৱা আগবঢ়াই আছে। তেওঁৰ পিতৃ জগন্নাথ শ্যালে ভাৰতীয় সেনাবাহিনীৰ মেডিকেল কৰ্পত সেৱা আগবঢ়াইছিল আৰু পিছলৈ শিক্ষা বিভাগত কাম কৰি অধ্যক্ষ হিচাপে অৱসৰ লৈছিল।”
বায়ুসেনাই জনোৱা মতে, দুৰ্ঘটনাটোৰ প্ৰকৃত কাৰণ জানিবলৈ এখন তদন্ত আদালত (Court of Inquiry) গঠন কৰা হৈছে।
স্থানীয় সংবাদ মাধ্যমে প্ৰকাশ কৰা অনুসৰি, বৃহৎ জনসমাগমৰ আগত বিমান কছৰত (বা এয়াৰ শ্ব’) প্ৰদৰ্শন কৰি থকা অৱস্থাত বিমানখন হঠাতে তললৈ নামি যায় আৰু দুৰ্ঘটনাত পতিত হয়।
