বিহাৰ বিধানসভা নিৰ্বাচনৰ প্ৰাকক্ষণত বিৰোধী মিত্ৰজোঁট ‘গ্ৰেণ্ড এলায়েন্সে আৰজেডি নেতা তেজস্বী যাদৱক মুখ্যমন্ত্ৰী পদৰ প্ৰাৰ্থী হিচাপে প্ৰক্ষেপ কৰিছে। বৃহস্পতিবাৰে পাটনাত অনুষ্ঠিত যৌথ সংবাদমেলত এই ঘোষণা কৰে। ইয়াৰ লগতে বিকাশশীল ইনছান পাৰ্টিৰ মুৰব্বী মুকেশ সাহনীক উপ-মুখ্যমন্ত্ৰী পদৰ প্ৰাৰ্থী হিচাপে ঘোষণা কৰা হৈছে। অৱশ্যে আসন ভাগ-বতৰা আৰু প্ৰাৰ্থী নিৰ্বাচনক লৈ মিত্ৰজোঁটৰ মাজত এটিয়াও বিতৰ্ক অব্যাহত আছে।
উল্লেখ্য যে সংবাদমেলত কংগ্ৰেছৰ প্ৰতিনিধী হিচাপে উপস্থিত থাকে ৰাজস্থানৰ প্ৰাক্তন মুখ্যমন্ত্ৰী অশোক গেহলট। তেওঁ তেজস্বী যাদৱক মুখ্যমন্ত্ৰী পদৰ প্ৰাৰ্থী হিচাপে ঘোষণা কৰি কয় যে, “তেজস্বী যুৱক আৰু কাৰ্য্যৰ প্ৰতি দায়বদ্ধ।” বিজেপি নেতা অমিত শ্বাহক সম্বোধন কৰি গেহলটে কয়, “মই অমিত শ্বাহক ক’ব বিচাৰো যে আমাৰ নেতা তেজস্বী জাগ্ৰত হৈছে। এইবাৰ তেওঁলোকে (শাসকীয় এনডিএ) মুখ্যমন্ত্ৰীৰ পদ নিশ্চিত কৰক।” মিত্ৰজোঁটত অব্যাহত বিতৰ্কৰ মাজতে এই ঘোষণা হৈছে।
আসন ভাগ বতৰাৰ চুক্তিৰ পৰা আৰম্ভ হৈ যৌথ সংবাদমেললৈকে ‘গ্ৰেণ্ড এলায়েন্স’ বিতৰ্কৰ পৰা মুক্ত হোৱা নাই। আৰজেডি আৰু কংগ্ৰেছে তিনিখন আসনত প্ৰাৰ্থী প্ৰক্ষেপ কৰিছে আৰু ইয়াক ‘বন্ধুত্বপূৰ্ণ প্ৰতিযোগিতা’ হ’ব বুলি অভিহিত কৰিছে। অৱশ্যে বিৰোধী পক্ষৰ এই সিদ্ধান্তক লৈ বিজেপি আৰু জেডিইউয়ে লৈ সমালোচনা কৰিছে। সংবাদমেলৰ মঞ্চৰ আঁৰত কেৱল তেজস্বীৰ ফটো থকাৰ বাবে বিতৰ্কৰ সৃষ্টি হৈছে। ইয়াৰ দ্বাৰা মিত্ৰজোঁটে ‘সহমত’ প্ৰদৰ্শনৰ চেষ্টা চলাইছে বুলি অনুমান কৰা হৈছে।
সংবাদমেলত উপস্থিত চিপিআইৰ নেতা দিপাংকৰ ভট্টাচাৰ্যয় কয় যে, “বিহাৰৰ দৰে বৃহৎ ৰাজ্যত প্ৰয়োজন অনুসৰি উপ-মুখ্যমন্ত্ৰীৰ প্ৰাৰ্থী ঘোষণা কৰা হৈছে। আমি অধিক আসনত প্ৰতিদ্বন্দ্বিতা কৰিব বুলি ভাবিছিলোঁ, কিন্তু মিত্ৰতা বৃদ্ধি পোৱাৰ বাবে ২০খন আসনতহে প্ৰতিদ্বন্দ্বিতা আগবঢ়াইছে। আমি ঐক্যবদ্ধভাৱে যুঁজ দিম।”
উল্লেখ্য যে প্ৰথম অৱস্থাত আৰজেডি আৰু কংগ্ৰেছে আনুষ্ঠানিক তালিকা প্ৰস্তুত নকৰাকৈয়ে কিছুমান আসনত প্ৰাৰ্থী ঘোষণা কৰিছিল, যাৰ ফলত মিত্ৰজোঁটৰ সমীকৰণক লৈ প্ৰশ্ন উত্থাপিত হৈছিল। যৌথ সংবাদমেলত এই বিতৰ্ক নিৰাময়ৰ চেষ্টা চলোৱা পৰিলক্ষিত হয়।
এই ঘোষণাৰ পিছতে তেজস্বী যাদৱে এনডিএক সমালোচনা কৰি কয়, “আমি যৌথ সংবাদমেল অনুষ্ঠিত কৰিলোঁ, কিন্তু এনডিএত নীতিশ কুমাৰক অন্যায়ভাৱে ব্যৱহাৰ কৰা হৈছে। তেওঁলোকে এটাও যৌথ সংবাদমেল অনুষ্ঠিত কৰা নাই। মুখ্যমন্ত্ৰী পদৰ আনুষ্ঠানিক ঘোষণা হোৱা নাই। আমি আৰম্ভণিৰে পৰাই কৈ আহিছো যে বিজেপিয়ে নীতিশক মুখ্যমন্ত্ৰী হোৱাটো নিবিচাৰে।” তেজস্বীয়ে এনডিএত নীতিশ কুমাৰক মুখ্যমন্ত্ৰী পদৰ প্ৰাৰ্থী ঘোষণা নকৰাক লৈ প্ৰশ্ন উত্থাপন কৰে।
