হায়দৰাবাদৰ কাঞ্চা গাচিবৌলিৰ ৪০০ একৰ মাটিৰ ঘটনাক লৈ বৰ্তমান বিতৰ্ক তুংগত। গৃহহীন জীৱ-জন্তু আৰু চৰাইবোৰ দেখি সকলোৱে কাতৰ হৈ পৰিছে। তাৰ বহু ভিডিঅ’ ছ’চিয়েল মিডিয়াত প্ৰচাৰ হৈছিল। তাৰ ভিতৰত আছিল কৃত্ৰিম বুদ্ধিমত্তাৰে নিৰ্মিত কিছুমান ছবি আৰু ভিডিঅ’। যাক লৈ এইবাৰ তেলেংগানা চৰকাৰ সক্ৰিয় হৈ পৰিছে।
মুখ্যমন্ত্রীৰ কার্যালয়ৰ সূত্রৰ পৰা জানিব পৰা মতে, এআইৰ সৈতে নির্মিত ফটো আৰু ভিডিঅ’ শ্বেয়াৰ কৰাৰ বাবে অভিনেত্ৰী দিয়া মির্জা আৰু ইউটিউবাৰ ধ্রুৱ ৰাথীৰ বিৰুদ্ধে প্রশাসনে ব্যৱস্থা ল’বলৈ ওলাইছে৷ ‘ভুল তথ্য’ প্ৰচাৰ কৰাৰ অভিযোগৰ ভিত্তিত তেওঁলোকৰ বিৰুদ্ধে ব্যৱস্থা গ্ৰহণ কৰা হ’ব।
সোমবাৰে ৰাজ্য চৰকাৰে উচ্চ ন্যায়ালয়ৰ কাষ চাপে। আইন মতে মাটিখিনি তেওঁলোকৰ বুলি দাবী কৰে। সেই ৪০০ একৰ ভূমিৰ ঘটনাক লৈ চলি আছে ভুৱা অপপ্ৰচাৰ। একাংশ লোকে AI ব্যৱহাৰ কৰি ছবি আৰু ভিডিঅ’ বিয়পাইছে। এই সন্দৰ্ভত ব্যৱস্থা গ্ৰহণৰ বাবে অনুৰোধ জনোৱা হৈছে।
এই সন্দৰ্ভত ৰাজ্যৰ মুখ্যমন্ত্ৰী ৰেভন্ত ৰেড্ডীয়ে নিজেই সৰৱ হৈছে। তেওঁৰ ভাষাত এআই ভিত্তিক ‘মিছা ভিজুৱেল’ বিয়পাই দিয়াটো এক গুৰুতৰ অপৰাধ। এই বিভ্ৰান্তিকৰ তথ্যই সমস্যাৰ সৃষ্টি কৰিছে।
উল্লেখ্য যে এই ভূমি হায়দৰাবাদ বিশ্ববিদ্যালয়ৰ সংলগ্ন অঞ্চলত অৱস্থিত। যদিও চৰকাৰে এই ভূমি তেওঁলোকৰ বুলি কৈছে, তথাপিও হায়দৰাবাদ বিশ্ববিদ্যালয়ৰ ছাত্ৰ-ছাত্ৰীসকলে এইখন বিশ্ববিদ্যালয়ৰ অধীনস্থ বনভূমি বুলি দাবী কৰিছে।
বিশ্ববিদ্যালয়খনৰ ছাত্ৰ সংসদৰ নেতৃত্বত যোৱা সপ্তাহত এক প্ৰতিবাদী আন্দোলন আৰম্ভ হৈছিল আৰু আৰক্ষীয়ে প্ৰতিবাদ কৰা ছাত্ৰ-ছাত্ৰীসকলক লাঠিৰে প্ৰহাৰ কৰি অঞ্চলটোৰ পৰা খেদি পঠিয়াইছিল। তাকলৈও কম বিতৰ্ক হোৱা নাছিল। সম্প্ৰতি সমগ্ৰ বিষয়টো তেলেংগানা উচ্চ ন্যায়ালয় আৰু উচ্চতম ন্যায়ালয়ত বিচাৰাধীন হৈ আছে।
আনহাতে, মুখ্যমন্ত্ৰীয়ে অভিযোগ উত্থাপন কৰাৰ পিছতে এই বিষয়ত টুইটাৰযোগে চৰকাৰক সমালোচনা কৰে অভিনেত্ৰী দিয়া মিৰ্জাই। তেওঁ প্ৰশ্ন কৰে, “গছবোৰো নকল নেকি?” ইউটিউবাৰ ধ্ৰুৱ ৰাথীয়েও পৰিৱেশ ধ্বংসৰ চিত্ৰ অংকন কৰি এটা ভিডিঅ’ মুকলি কৰে।
উপগ্ৰহৰ ছবিৰ পৰা দেখা গৈছে যে বিগত পাঁচ বছৰত অঞ্চলটোত ব্যাপক বনাঞ্চল ধ্বংস হৈছে। কিন্তু চৰকাৰে কয় যে কিছুমান ভিজুৱেল ‘আউট অৱ কনটেক্সট’ ব্যৱহাৰ কৰি আৰু কন্টেন্টত এআই ব্যৱহাৰ কৰি জনতাৰ মাজত ক্ষোভৰ সৃষ্টি কৰা হৈছে।
