সম্প্ৰতি দেশৰ বিভিন্ন প্ৰান্তত বৃদ্ধ পিতৃ-মাতৃক অৱহেলা কৰাৰ ঘটনা সততেই শুনিবলৈ পোৱা যায়। শেহতীয়অ কৈ তেলেংগানাত বৃদ্ধ পিতৃ-মাতৃক অৱহেলা কৰাৰ বিৰুদ্ধে চৰকাৰে এক কঠোৰ পদক্ষেপ গ্ৰহণ কৰিছে। মুখ্যমন্ত্ৰী এ ৰেবন্ত ৰেড্ডীয়ে শনিবাৰে ঘোষণা কৰে যে, যিসকল চৰকাৰী কৰ্মচাৰীয়ে বৃদ্ধ অভিভাৱকসকলক অৱহেলা কৰে তেওঁলোকৰ মাহিলী দৰমহাৰৰ ১৫ শতাংশ পর্যন্ত কৰ্তন কৰি সেই ধন পিতৃ-মাতৃৰ বেংক একাউণ্টত জমা কৰা হ’ব। এই নতুন আইনখন শীঘ্ৰই প্ৰৱৰ্তন কৰা হ’ব বুলি তেওঁ সদৰী কৰে।
মুখ্যমন্ত্ৰীয়ে গ্ৰুপ ২ সেৱাৰ নৱনিৰ্বাচিত বিষয়াসকলক নিযুক্তি পত্ৰ প্ৰদানৰ সময়ত এই ঘোষণা কৰে। তেওঁলোকক সম্বোধন কৰি তেওঁ কয়, “আপুনি যেনেকৈ মাহিলী দৰমহা পায়, আমি নিশ্চিত কৰিম যে আপোনালোকৰ পিতৃ-মাতৃয়েও ইয়াৰ পৰা মাহিলী আয় লাভ কৰে।” এই আইনখনৰ জৰিয়তে বৃদ্ধ বয়সত অভিভাৱকসকলে আৰ্থিক দুৰ্দশা বা অৱহেলাৰ সন্মুখীন নহয়, তাৰ ব্যৱস্থা লোৱা হ’ব বুলি তেওঁ উল্লেখ কৰে। যদি কোনো কৰ্মচাৰীয়ে পিতৃ-মাতৃৰ সঠিক যত্ন লোৱা নাই বুলি প্ৰমাণিত হয়, তেন্তে চৰকাৰে কৰি দৰমহাৰ কৰ্তন কৰিব।
উল্লেখ্য যে বহু সময়ত পুত্ৰ-কন্যাই বৃদ্ধ পিতৃ-মাতৃক অৱহেলা কৰাৰ ঘটনা দেখা যায়। মুখ্যমন্ত্ৰীয়ে উল্লেখ কৰে যে, এই আইনখন চৰকাৰী কৰ্মচাৰী আৰু তেওঁলোকৰ পৰিয়ালৰ মাজত বিতৰ্ক সৃষ্টি কৰিব পাৰে, কিন্তু ই অভিভাৱকসকলৰ সুৰক্ষাৰ বাবে অপৰিহাৰ্য। ভাৰতত ইতিমধ্যে ‘পিতৃ-মাতৃ আৰু জ্যেষ্ঠ নাগৰিকৰ ৰক্ষণাবেক্ষণ আৰু কল্যাণ আইন, ২০০৭’ আছে, য’ত অভিভাৱকৰ যত্নৰ ব্যৱস্থা আছে। কিন্তু তেলেংগানা চৰকাৰে নিজৰ কৰ্মচাৰীৰ ওপৰত দৰমহাৰ পৰা পোণপটীয়া কৰ্তনৰ ব্যৱস্থা কৰি দেশৰ ভিতৰতেব এক নজিৰ স্থাপন কৰিছে।
