তেলেংগানাৰ মুখ্যমন্ত্ৰী ৰেৱন্ত ৰেড্ডীয়ে হায়দৰাবাদৰ এটা পথৰ নাম আমেৰিকাৰ প্ৰাক্তন ৰাষ্ট্ৰপতি ড’নাল্ড ট্ৰাম্পৰ নামেৰে ৰখাৰ প্ৰস্তাৱ আগবঢ়োৱাত তীব্ৰ বিতৰ্কৰ সৃষ্টি হৈছে। যদি এই প্ৰস্তাৱ গৃহীত হয়, তেন্তে আমেৰিকাৰ শাসনত থকা বা প্ৰাক্তন ৰাষ্ট্ৰপতিৰ নামেৰে ভাৰতত এয়া প্ৰথমবাৰৰ বাবে কোনো পথৰ নামকৰণ কৰা হ’ব।
তেলেংগানাৰ মুখ্যমন্ত্ৰীয়ে ৰাজ্য চৰকাৰে আয়োজন কৰা ‘তেলেংগানা ৰাইজিং গ্ল’বেল ছামিট’ নামৰ আন্তঃৰাষ্ট্ৰীয় অনুষ্ঠানটোৰ প্ৰতি বিশ্বব্যাপী দৃষ্টি আকৰ্ষণ কৰাৰ উদ্দেশ্যে এই পথটোৰ নাম ট্ৰাম্পৰ নামেৰে ৰখাৰ প্ৰস্তাৱ আগবঢ়াইছে বুলি সদৰী কৰিছে। জানিব পৰা মতে, হায়দৰাবাদত আমেৰিকাৰ কনছুলেট জেনেৰেল থকা পথটোৰ নাম ড’নাল্ড ট্ৰাম্প এভিনিউ বুলি প্ৰস্তাৱ কৰা হৈছে।
বৰ্তমান হায়দৰাবাদ দেশৰ এক মুখ্য প্ৰযুক্তিৰ কেন্দ্ৰ। ৰাজ্যখনত বিদেশী বিনিয়োগ আৰু প্ৰযুক্তিৰ উপস্থিতি স্বীকাৰ কৰি ইয়াৰ পূৰ্বেও কেইবাটাও পথৰ নামকৰণ কৰা হৈছিল, যেনে—‘গুগল ষ্ট্ৰীট’, ‘মাইক্ৰ’ছফ্ট ৰোড’, আৰু ‘ৱিপ্ৰ’ জংচন’। একেদৰে, ৰাজ্য চৰকাৰে প্ৰয়াত উদ্যোগপতি ৰতন টাটাৰ নামেৰে নেহৰু আউটাৰ ৰিং ৰোড সংযোগী ১০০ মিটাৰৰ এক গ্ৰীণফিল্ড ৰেডিয়েল পথৰ নাম ৰখাৰো পৰিকল্পনা কৰিছে।
ইফালে, ৰাজ্য চৰকাৰৰ এই প্ৰস্তাৱক লৈ বিজেপিয়ে তীব্ৰ আপত্তি কৰিছে। কেন্দ্ৰীয় মন্ত্ৰী সঞ্জয় কুমাৰে কংগ্ৰেছ চৰকাৰক আক্ৰমণ কৰি হায়দৰাবাদৰ নাম পূৰ্বৰ দৰেই ভাগ্যনগৰলৈ সলনি কৰিবলৈ দাবী জনাইছে। তেওঁ কয়, “যদি কংগ্ৰেছ চৰকাৰে নাম সলনি কৰিবলৈ ইমান আগ্ৰহী, তেন্তে ইতিহাস আৰু প্ৰকৃত অৰ্থ থকা কাম এটা কৰিব লাগে। ৰেৱন্ত ৰেড্ডীয়ে কেৱল বানিজ্যিক চহৰৰ নাম সলনি কৰি আহিছে। আমাৰ দলেই একমাত্ৰ, যিয়ে চৰকাৰক প্ৰশ্ন উত্থাপন কৰি সাধাৰণ জনতাৰ সমস্যা সমাধানৰ চেষ্টা চলাইছে।”
