মহানগৰীৰ হোটেল লিলিত শুকুৰবাৰে ৰাজ্যৰ বিৰোধী ৰাজনৈতিক দলসমূহৰ এখন গুৰুত্বপূৰ্ণ বৈঠক অনুষ্ঠিত হয়। অসম প্ৰদেশ কংগ্ৰেছ কমিটীৰ সভাপতি ভূপেন বৰাৰ উদ্যোগত বিৰোধী ৰাজনৈতিক দলসমূহৰ নেতৃত্বকলৈ এই বৈঠক অনুষ্ঠিত হয়।
ৰাজ্যখনৰ ১০ টা বিৰোধী ৰাজনৈতিক দলৰ প্ৰতিনিধি বৈঠকত উপস্থিত থাকে। অৱশ্যে বৈঠকত দেখা নগ’ল আম আদমী পাৰ্টি, তৃণমূল কংগ্ৰেছ আৰু এআইইউডিএফক। অসমৰ সাম্প্ৰতিক ৰাজনৈতিক পৰিস্থিতিৰ লগতে আগন্তুক লোকসভা নিৰ্বাচন সম্পৰ্কত দল কেইটাৰ নেতৃত্বই আলোচনা কৰে।
লগতে পঢ়ক: প্ৰযুক্তিৰ যুদ্ধ! টুইটাৰক প্ৰত্যাহ্বান জনাই এটা নতুন এপ লৈ আহিছে মেটাই! কি আছে ইয়াত?
বৈঠকত উপস্থিত থকা ১০ টা বিৰোধী ৰাজনৈতিক দলে অহা ৯ এপ্ৰিলত গুৱাহাটীত উমৈহতীয়াভাৱে ৰাজ্যিক সন্মিলন অনুষ্ঠিত কৰাৰ সিদ্ধান্ত গ্ৰহণ কৰে। বৈঠকত হিমন্ত বিশ্ব শৰ্মা নেতৃত্বাধীন চৰকাৰৰ বিৰুদ্ধে ঐক্যবদ্ধভাৱে যুঁজ দিয়াৰ লগতে বিজেপিৰ বিৰুদ্ধে সন্মিলিতভাৱে আগবঢ়াৰ সিদ্ধান্ত লোৱা হয়।
![](https://assam.nenow.in/wp-content/uploads/2023/03/WhatsApp-Image-2023-03-11-at-9.04.58-AM-300x169.jpeg)
ইপিনে, বিৰোধী ৰাজনৈতিক দলৰ এই বৈঠকত আপ, এআইডিইউএফ আৰু তৃণমূল কংগ্ৰেছে স্থান নোপোৱাটো তাৎপৰ্যপূৰ্ণ হিচাপে বিবেচিত হৈছে। আহ্বায়ক ভূপেন বৰাই বৈঠকত বিৰোধীৰ এক সঠিক ৰণনীতি প্ৰস্তুত কৰাত সফল হোৱা বুলি দাবী কৰে।
লগতে পঢ়ক: কিহৰ ইংগিত? আমেৰিকা যুক্তৰাষ্ট্ৰৰ ইতিহাসত আটাইতকৈ বৃহৎ সামৰিক বাজেট প্ৰস্তাৱ বিডেনৰ
এই বৈঠকত অসম প্ৰদেশ কংগ্ৰেছ কমিটীৰ সভাপতি ভূপেন বৰা, কাৰ্য্যকৰী সভাপতিদ্বয় জাকিৰ হুছেইন শিকদাৰ, ৰাণা গোস্বামী, বিধায়ক ভৰত চন্দ্ৰ নৰহ, ৰাইজৰ দলৰ সভাপতি তথা বিধায়ক অখিল গগৈ, অসম জাতীয় পৰিষদৰ সভাপতি লুৰীণজ্যোতি গগৈ, অসম জাতীয় পৰিষদৰ নেতা তথা প্ৰাক্তন মন্ত্ৰী জগদীশ ভূঞা, চিপিআই (এম)ৰ বিধায়ক মনোৰঞ্জন তালুকদাৰ, ৰাজ্য সভাৰ সাংসদ অজিত কুমাৰ ভূঞাকে ধৰি ১০ টা বিৰোধী ৰাজনৈতিক দলৰ নেতৃত্ব উপস্থিত থাকে।