বোকাখাত বিধানসভা সমষ্টিৰ অন্তৰ্গত ১ নং বকুলি চাপৰিত কৃষি মন্ত্ৰী পিয়ুচ হাজৰিকাৰ নিৰ্দেশত পৰিবেশ বিৰোধী পাম অইল খেতি সম্প্ৰসাৰণ কৰাক কেন্দ্ৰ কৰি তীব্ৰ উত্তেজনাৰ সৃষ্টি হৈছে। জীপাল কৃষক শ্ৰমিক সংঘই অভিযোগ কৰা মতে, ব্ৰহ্মপুত্ৰৰ নৈপৰীয়া জনজাতি অধ্যুষিত চৰ-চাপৰি অঞ্চলত থলুৱা লোকসকলৰ পশুধনৰ পৰম্পৰাগত চৰণীয়া পথাৰ বলপূৰ্বকভাৱে দখল কৰি কৰ্প‘ৰেটৰ স্বাৰ্থত পাম অইল বাগিচা গঢ়াৰ আয়োজন কৰা হৈছে। এই সমগ্ৰ কাণ্ড পোহৰলৈ অহাৰ পিছতে জীপাল কৃষক শ্ৰমিক সংঘৰ নেতৃত্বত স্থানীয় ৰাইজে প্ৰতিৰোধী সংগ্ৰাম গঢ়ি তুলিছে।
স্থানীয় ৰাইজৰ অভিযোগ অনুসৰি, গোলাঘাট জিলা কৃষি বিভাগ আৰু এখন নতুনকৈ গঠিত সমবায় সমিতিৰ উদ্যোগত প্ৰথমতে এই ভূমিত মাহ, সৰিয়হ আৰু তিলৰ দৰে ৰবি শস্য সিঁচাৰ কথা ঘোষণা কৰা হৈছিল। সেই মৰ্মে যোৱা ২৫ আগষ্টত স্থানীয় লোকসকলক অন্ধকাৰত ৰাখি এখন বীজ সিঁচা অনুষ্ঠান অনুষ্ঠিত কৰা হয়, য’ত জিলা কৃষি বিষয়া আৰু নাবাৰ্ডৰ বিষয়াসকল উপস্থিত আছিল। কিন্তু পিছত অতি সংগোপনে সেই চৰণীয়া মাটিত পাম অইলৰ পুলি ৰোপণ কৰাত থলুৱা ৰাইজৰ মাজত তীব্ৰ ক্ষোভৰ সৃষ্টি হয়। নৈপৰীয়া লোকসকলে দীৰ্ঘদিনৰ পৰা পশুধন পালনৰ বাবে ব্যৱহাৰ কৰি অহা এই মাটিত বাণিজ্যিক পাম অইলৰ খেতি কোনো কাৰণতে হ’বলৈ দিয়া নহ’ব বুলি স্পষ্ট কৰি দিছে।
পাম অইল খেতিৰ ভয়াবহ পৰিৱেশগত প্ৰভাৱক লৈও জীপাল কৃষক শ্ৰমিক সংঘই গভীৰ উদ্বেগ প্ৰকাশ কৰিছে। সংগঠনটোৰ মতে, ব্ৰহ্মপুত্ৰৰ সংবেদনশীল চৰ-চাপৰিত এনে ধৰণৰ খেতি কৰিলে উদ্ভিদ বৈচিত্ৰ্য হ্ৰাস পোৱাৰ লগতে জলাশয় আৰু নদীৰ প্ৰাকৃতিক পৰিবেশ বিনষ্ট হ’ব। বিজ্ঞানসন্মত পৰ্যালোচনা অনুসৰি, পাম অইল খেতিৰ ফলত পানীৰ গুণগত মান হ্ৰাস পোৱা, মাটিৰ খহনীয়া বৃদ্ধি পোৱা আৰু কৃষি ৰাসায়নিক সামগ্ৰীৰ ব্যৱহাৰে জৈৱ বৈচিত্ৰ্যৰ প্ৰতি ডাঙৰ ভাবুকি কঢ়িয়াই আনে। সেয়ে সমগ্ৰ কাজিৰঙা ৰাষ্ট্ৰীয় উদ্যানৰ দাঁতিকাষৰীয়া অঞ্চলৰ পৰিবেশ ধ্বংস কৰিব পৰা এনে সিদ্ধান্ত বৈজ্ঞানিক মূল্যায়ন নকৰাকৈ জাপি দিয়াটো অত্যন্ত বিপদজনক।
ঘটনা সন্দৰ্ভত জীপাল কৃষক শ্ৰমিক সংঘৰ মুখ্য উপদেষ্টা সোণেশ্বৰ নৰহে কৃষিমন্ত্ৰী পিয়ুচ হাজৰিকাক তীব্ৰ সমালোচনা কৰে। তেওঁ কয় যে অসমৰ ভূমিপুত্ৰ মিচিং জনজাতি লোকসকলৰ সন্মতি নোলোৱাকৈ আৰু পৰিৱেশগত প্ৰভাৱ অধ্যয়ন নকৰাকৈ কেৱল পুঁজিপতি গোষ্ঠীৰ স্বাৰ্থত খিলঞ্জীয়াৰ মাটি এৰি দিয়া নহ’ব। আনহাতে সংঘৰ মুখপাত্ৰ প্ৰবীণ পেগুৱে কৃষিমন্ত্ৰীক বকুলি চাপৰিত উপস্থিত হৈ এখন ৰাজহুৱা শুনানি অনুষ্ঠিত কৰাৰ দাবী জনায়। ইয়াৰ উপৰিও শেহতীয়াকৈ সৃষ্টি হোৱা সংঘাত সমাধানৰ বাবে গোলাঘাটৰ জিলা আয়ুক্তক শীঘ্ৰে ব্যৱস্থা ল’বলৈ দাবী জনাইছে। প্ৰশাসনে এই বিষয়ত উচিত পদক্ষেপ নল’লে সৃষ্টি হ’ব পৰা যিকোনো পৰিস্থিতিৰ বাবে জিলা প্ৰশাসন তথা কৃষি মন্ত্ৰী নিজেই জগৰীয়া হ’ব বুলিও তেওঁ সকীয়াই দিয়ে।
