অসমত ছয় জনগোষ্ঠীক (টাই আহোম, চুতীয়া, মৰাণ, মটক, কোচ-ৰাজবংশী, চাহ জনজাতি/আদিবাসী) অনুসূচীত জনজাতি (ST) ৰ মৰ্যাদা প্ৰদানৰ আন্দোলনৰ পাছতে বড়োভূমিত পুনৰ উত্তাল হৈ পৰিছে পৰিবেশ। ইয়াৰ ফলস্বৰূপে কোকৰাঝাৰত জনজাতীয় ছাত্ৰ-ছাত্ৰী আৰু সংগঠিত জনজাতীয় লোকসকলে তীব্ৰ প্ৰতিবাদ সাব্যস্ত কৰে, যাৰ বাবে বিটিচি সচিবালয়ত সৃষ্টি হয় এক দুৰ্ভাগ্যজনক পৰিস্থিতিৰ।
জনজাতিকৰণৰ প্ৰস্তাৱৰ বিৰোধিতাৰে কোকৰাঝাৰৰ কেইবাটাও স্থানত জনজাতীয় ছাত্ৰ-ছাত্ৰীসকলে প্ৰতিবাদী কাৰ্যসূচী গ্ৰহণ কৰে। উত্তেজিত প্ৰতিবাদকাৰীসকলে বিটিচি সচিবালয়ৰ চৌহদত প্ৰৱেশ কৰি তাত ব্যাপক ক্ষয়খতি কৰাৰ খবৰ পোৱা গৈছে।
উল্লেখ্য যে সদৌ বড়ো ছাত্ৰ সন্থা (ABSU) আৰু Coordination Committee of Tribal Organisations of Assam (CCTOA) ৰ দৰে প্ৰধান জনজাতীয় সংগঠনসমূহে দৃঢ়তাৰে কৈছে যে নতুনকৈ ছয় জনগোষ্ঠীক ST মৰ্যাদা দিলে বৰ্তমানৰ জনজাতীয় লোকসকলৰ সংৰক্ষণৰ অধিকাৰ আৰু সাংবিধানিক সুৰক্ষা বিপদাপন্ন হ’ব।
শেহতীয়া খবৰ অনুসৰি, কোকৰাঝাৰত পৰিস্থিতি নিয়ন্ত্ৰণলৈ আনিবলৈ নিৰাপত্তা বাহিনী মোতায়েন কৰা হৈছে যদিও জনজাতীয় সংগঠনসমূহে তেওঁলোকৰ আন্দোলন অধিক তীব্ৰতৰ কৰি তোলাৰ হুংকাৰ দিছে।
