গালৱান সংঘৰ্ষৰ পিছতো প্ৰকৃত নিয়ন্ত্ৰণ ৰেখা(এলএচি) লংঘন অব্যাহত ৰাখিছে চীন পিপ’লছ লিবাৰেশ্যন আৰ্মি-এ।
যোৱা ২২ জুনৰ দুই দেশৰ ক’ৰ কামাণ্ডাৰ স্তৰৰ বৈঠকত দুই পক্ষ সেনাই গ্ৰহণ কৰা সিদ্ধান্তকো উপেক্ষা কৰি আহিছে পিএলএ-এ।
চীনে এই সিদ্ধান্তক উপেক্ষা কৰাৰ পিছতে লাডাখৰ পৰিস্থিতি পৰ্যালোচনাৰ বাবে চাইনা ষ্টাডি গ্ৰুপ(চিএছজি)এ কেন্দ্ৰ চৰকাৰৰ সৈতে এক বৈঠকত মিলিত হয়।
ৰাষ্ট্ৰীয় নিৰাপত্তা উপদেষ্টা অজিত ডোভালৰ নেতৃত্বাধীন এই গ্ৰুপত আছে সেনা বাহিনীৰ প্ৰধান, গৃহ আৰু প্ৰতিৰক্ষা মন্ত্ৰালয়ৰ কেবিনেট সচিব আৰু চেন্ট্ৰেল ইন্টেলিজেন্স ব্যু'(আইবি)ৰ প্ৰধান।
১৯৯৭ চনত গঠিত এই চিএছজিৰ চৰকাৰী স্বীকৃতি নেথাকিলেও চীন সম্পৰ্কীয় নীতি আৰু কৌশল নিৰ্ধাৰণত ইয়াৰ গুৰুত্বপূৰ্ণ ভূমিকা আছে।
কেন্দ্ৰৰ এক সূত্ৰৰ মতে, শনিবাৰে নিশাৰ বৈঠকত লাডাখৰ এলএচিত চীনা সেনাৰ তৎপৰতা বৃদ্ধি সম্পৰ্কে আলোচনা কৰে চিএছজিএ।
কেন্দ্ৰৰ এগৰাকী বিষয়াই জনাইছে যে, গালৱান সংঘৰ্ষত ২০ গৰাকী নিহত হোৱাৰ উপৰিও ১৫ গৰাকী ভাৰতীয় সেনাৰ মূৰত চোকা অস্ত্ৰৰ আঘাতৰ চিহ্ন স্পষ্ট হৈ আছে।
প্ৰাক্তন সেনা প্ৰধান তথা কেন্দ্ৰীয় মন্ত্ৰী ভি কে সিঙে ১৫ জুনৰ সংঘৰ্ষৰ বিষয়ে কয়, “৬ জুনৰ ক’ৰ কামাণ্ডাৰ স্তৰৰ প্ৰথম বৈঠকত সিদ্ধান্ত লোৱা হৈছিল যে, দুই পক্ষই এলএচিৰ পৰা সেনা বাহিনীৰ লগতে ছাউনীও পিছুৱাই নিব। কিন্তু কৰ্ণেল সন্তোষ বাবুৰ নেতৃত্বত বিহাৰ ৰেজিমেন্টৰ জোৱানসকলে ১৫ জুনৰ ৰাতি গৈ দেখে যে চীনা ছাউনীবোৰ পইণ্ট ১৪ত তেতিয়াও আছে। সন্তোষৰ নিৰ্দেশত ভাৰতীয় জোৱানসকলে ছাউনীবোৰ ভাঙিবলৈ চেষ্টা কৰে। সেই সময়তে হঠাতে এটা ছাউনীত অগ্নি সংযোগ ঘটে। আৰু ইয়াৰ পৰাই সংঘৰ্ষৰ আৰম্ভ হয়।”
আনহাতে উপগ্ৰহীয় চিত্ৰত দেখা গৈছে যে যোৱা এসপ্তাহত সংঘৰ্ষস্থলীৰ সমীপৰ গালৱান নদীৰ পাৰত চীনা সেনাৰ ছাউনীৰ সংখ্যা বৃদ্ধি পাইছে।
গোগৰাৰ হটস্প্ৰিং অঞ্চল আৰু পাংগং হ্ৰদৰ উত্তৰ ফিঙ্গাৰ পইণ্ট ৮ৰ পৰা ৪ৰলৈকে চীনা সেনাই কংক্ৰিটৰ বাংকাৰ নিৰ্মাণ কৰি অৱস্থান কৰি থকাৰ তথ্য ভাৰতীয় সেনাৰ হাতত আছে।
