বৃহস্পতিবাৰে শিলগুটি নিক্ষেপৰ ঘটনা সংঘটিত হোৱাৰ পিছতে লিকাবালিৰ সমীপত অসম-অৰুণাচল প্ৰদেশ সীমান্তত উত্তেজনা বিৰাজ কৰে।
সূত্ৰই জনোৱা মতে, আন্তঃৰাজ্যিক সীমান্তৰ সমীপত অৰুণাচল প্ৰদেশৰ দুস্কৃতিকাৰীয়ে প্ৰতিবাদকাৰীৰ ওপৰত শিলগুটি নিক্ষেপ কৰাৰ পিছত অসম আৰক্ষীয়ে চাৰি ৰাউণ্ড গুলীচালনা কৰে।
এক সূত্ৰই জনোৱা মতে, ‘কোনো লোক আহত হোৱাৰ খবৰ পোৱা হোৱা নাই। বৰ্তমান পৰিস্থিতি নিয়ন্ত্ৰণত আছে আৰু কৰ্তৃপক্ষই পৰিস্থিতিৰ ওপৰত নিবিড়ভাৱে নিৰীক্ষণ কৰি আছে।
উত্তৰ অসমৰ কেইবাটাও সীমান্ত অঞ্চলত বুধবাৰৰ পৰা অসমৰ সংগঠনসমূহে অৰ্থনৈতিক অৱৰোধ আৰোপ কৰিছে।
সোমবাৰে সীমান্তৰ মিংমাং বডোটি অঞ্চলত অসমৰ গাঁৱৰ ১১ জন লোক গুলীচালনাত আহত হোৱাৰ প্ৰতিবাদত বুধবাৰে ধেমাজি জিলাত অসমৰ মিছিং জনগোষ্ঠীক প্ৰতিনিধিত্ব কৰা সংগঠন টাকাম মিছিং পোৰিন কেবাঙে ১২ ঘণ্টীয়া বন্ধৰ আহ্বান জনায়।
অৰুণাচল প্ৰদেশৰ লোকে অসমে দাবী কৰা মাটি দখল কৰা বুলি অভিযোগ উত্থাপন হোৱাৰ পিছতে এই গুলীচালনাৰ ঘটনা সংঘটিত হয়।
অসমৰ মুখ্যমন্ত্ৰী হিমন্ত বিশ্ব শৰ্মাই বৃহস্পতিবাৰে অসম আৰু অৰুণাচল প্ৰদেশৰ ৰাইজক শান্তি সম্প্ৰীতি বজাই ৰাখিবলৈ আহ্বান জনায়।
এক্সত এটা পোষ্ট শ্বেয়াৰ কৰি শৰ্মাই কয়, “অসম আৰু অৰুণাচল প্ৰদেশৰ মাজত সীমাৰ বহু উৰ্দ্ধত এটা বন্ধন আছে। প্ৰজন্মৰ পিছত প্ৰজন্ম ধৰি আমাৰ মানুহে ভাই-ভনী হিচাপে জীয়াই আছে, প্ৰেম, মৰম আৰু পাৰস্পৰিক সন্মানেৰে বান্ধ খাই আছে।”
তেওঁ কয়, ‘শেহতীয়া বছৰবোৰত আমি আমাৰ সীমান্তৰ অধিকাংশ মতানৈক্য আলোচনা আৰু বন্ধুত্বৰ জৰিয়তে সমাধান কৰিছো। মাত্ৰ ৫২খন গাঁও বাকী আছে, আৰু দুয়োখন চৰকাৰে একে মনোভাৱেৰে আলোচনা অব্যাহত ৰাখিব যাতে বিবাদ সম্পূৰ্ণৰূপে সমাধান কৰিব পাৰে।’
তেওঁ লগতে কয়, ‘অসম আৰু অৰুণাচলৰ জনসাধাৰণক শান্তি-সম্প্ৰীতি বজাই ৰাখিবলৈ আহ্বান জনাইছো, সীমাৰেখাই হয়তো আমাৰ ৰাজ্যসমূহ সংজ্ঞায়িত কৰিব পাৰে, কিন্তু ই আমাৰ হৃদয় কেতিয়াও বিভাজিত কৰিব নোৱাৰে।”
অৰুণাচল প্ৰদেশৰ মুখ্যমন্ত্ৰী পেমা খাণ্ডুৱেও শৰ্মাৰ এই বক্তব্যক আদৰণি জনায়।
এক্সত খাণ্ডুৱে লিখিছে, ‘অসমৰ মাননীয় মুখ্যমন্ত্ৰী শ্ৰী @himantabiswa Ji ডাঙৰীয়াৰ ইতিবাচক আৰু আশ্বস্ত কৰা বক্তব্যক মই আন্তৰিকতাৰে আদৰণি জনাইছো। অসম আৰু অৰুণাচল প্ৰদেশৰ মাজত ইতিহাস, বন্ধুত্ব আৰু ভাতৃত্ববোধৰ গভীৰ বান্ধোন আছে। আমাৰ মতানৈক্য সদায় আলোচনা, পাৰস্পৰিক বুজাবুজি আৰু শান্তিপূৰ্ণ উপায়েৰে সমাধান কৰিব লাগিব।’
তেওঁ লগতে কয়, “অসম আৰু অৰুণাচল প্ৰদেশ উভয়ৰে ৰাইজক শান্তি, সম্প্ৰীতি আৰু পাৰস্পৰিক সন্মান বজাই ৰাখিবলৈ আহ্বান জনাইছো। আহক মতানৈক্যক আমি আমাৰ জনসাধাৰণক একত্ৰিত কৰা শক্তিশালী বান্ধোনক ছাঁ পেলাবলৈ নিদিওঁ।”
খাণ্ডুৱে লগতে সদৌ অৰুণাচল প্ৰদেশ ছাত্ৰ সন্থা (আপছু)ৰ সৈতে অসম সীমান্তৰ সমীপৰ হিমে গাঁৱত শেহতীয়াকৈ সংঘটিত হোৱা ঘটনাৰ পৰা উদ্ভৱ হোৱা পৰিস্থিতি সন্দৰ্ভতো আলোচনাত মিলিত হোৱাৰ লগতে গালো কল্যাণ সমিতি, গালো ছাত্ৰ সন্থা আৰু ডোলোক বাংগো কল্যাণ সমিতিৰ প্ৰতিনিধিৰ সৈতে আলোচনাত মিলিত হোৱা বুলিও জানিবলৈ দিয়ে।
‘খণ্ডুৱে কয়, অগ্ৰাধিকাৰ দিয়া হৈছে আলোচনাৰ জৰিয়তে অতি সোনকালে স্বাভাৱিক অৱস্থা ঘূৰাই অনা। শান্তি বজাই ৰখা আৰু পাৰস্পৰিক বিশ্বাস বজাই ৰখাৰ বাবে সংশ্লিষ্ট সকলো পক্ষক জড়িত কৰা হৈছে।’
গুলীত আঘাতপ্ৰাপ্ত ১১ জন ব্যক্তিৰ আটাইকেইজন ব্যক্তি ডিব্ৰুগড়ৰ অসম চিকিৎসা মহাবিদ্যালয় হাস্পাতালত চিকিৎসাধীন হৈ আছে।
