’সদৌ অসম প্ৰাথমিক টে’ট উত্তীৰ্ণ শিক্ষক সমাজ’ৰ আহ্বানমৰ্মে মাৰ্ঘেৰিটা ব্লক প্ৰাথমিক টে’ট উত্তীৰ্ণ শিক্ষক সমাজেও মাৰ্ঘেৰিটা খণ্ড প্ৰাথমিক শিক্ষা বিষয়াৰ কাৰ্যালয়ৰ সন্মুখত অসমৰ প্ৰতিটো প্ৰাথমিক শিক্ষাখণ্ডত কৰ্মৰত ঠিকাভিত্তিক শিক্ষকসকলৰ চাকৰি বিনাচৰ্তে বেতন সুৰক্ষাসহ নিয়মীয়াকৰণৰ দাবীত দুঘণ্টীয়া অৱস্থান ধৰ্মঘট কাৰ্যসূচী পালন কৰে।
‘ঠিকাভিত্তিক শিক্ষকসকলৰ চাকৰি বিনাচৰ্তে বেতন সুৰক্ষাসহ নিয়মীয়াকৰণ কৰক, শিক্ষকসকলক লৈ ৰাজনীতি নকৰিব, শিক্ষকসকলক ৰাজপথলৈ ওলাই আহিবলৈ বাধ্য কৰিছে কোনে, আমাৰ দাবী ন্যায্য দাবী’ আদি শ্ল’গানেৰে প্ৰতিবাদকাৰী সকলে পৰিৱেশ উত্তাল কৰি তোলে।
মাৰ্ঘেৰিটা ব্লক প্ৰাাথমিক টে’ট উত্তীৰ্ণ শিক্ষক সমাজৰ সাধাৰণ সম্পাদক নিৰঞ্জন শইকীয়াই সাংবাদিকৰ আগত কয় যে, ‘টে’ট শিক্ষকৰ চাকৰি বিনাচৰ্তে বেতন সুৰক্ষাসহ নিয়মীয়াকৰণ কৰক। আমাক আৰ টি ই মতে নিযুক্তি দিছিল। এন চি টি ইৰ সকলো নীতি আমি মানি চাকৰি পাইছো৷’
‘আমাক অসম চৰকাৰৰ প্ৰাথমিক শিক্ষা বিভাগৰ অধীনত নিবলৈ কেন্দ্ৰই বাৰে বাৰে কৈ আছে যদিও আজিলৈ নিয়া নাই আৰু সৰ্বশিক্ষাৰ অধীনতে আমাক কৰ্মৰত কৰি ৰাখিছে। যিটো পেব্ ( নতুন দৰমহা বিধি) অনুযায়ী নোৱাৰে। আমাক নিয়মীয়াকৰণ হে লাগে। ইয়াৰ বাবে চৰকাৰে নিৰ্বাচনৰ প্ৰতিশ্ৰুতি মতে ব্যৱস্থা লওক।’ সাধাৰণ সম্পাদক নিৰঞ্জন শইকীয়াই কয়।
আনহাতে মাইনোটচৰ সন্দৰ্ভত ব্লক সমিতিৰ সভাপতি অনুপম বৰুৱা কয় যে, ‘শিক্ষা মন্ত্ৰীয়ে দুজনমান বিশেষ টেট্ শিক্ষকৰ লগত আলোচনা কৰি যিখন মাইনোটচ্ উলিয়াইছে, তাত টেট্ শিক্ষকৰ চাকৰি নিয়মীয়াকৰণৰ বাবে কোনো কথা কোৱা হোৱা নাই। মূল আৰু একমাত্ৰ দাবীটো নথকা বাবে সেই মাইনোটচ আমি গ্ৰহণ কৰিব নোৱাৰো।’
প্ৰতিবাদী কাৰ্যসূচীত মাৰ্ঘেৰিটা আঞ্চলিক ছাত্ৰ সংস্থা, অসম জাতীয়তাবাদী যুৱ-ছাত্ৰ পৰিষদ, সদৌ অসম কৰ্মচাৰী পৰিষদ, মাৰ্ঘেৰিটা মহকুমা প্ৰাথমিক শিক্ষক সন্মিলনী, সদৌ অসম মধ্য ইংৰাজী শিক্ষক সন্থা আদি সংগঠনৰ নেতৃবৰ্গ উপস্থিত থাকি শিক্ষকসকলৰ নিয়মীয়াকৰনৰ দাবী উত্থাপন কৰে।
পিছত অৱস্থান ধৰ্মঘটস্থলীৰ পৰাই সভাপতি অনুপম বৰুৱা আৰু সম্পাদক নিৰঞ্জন শইকীয়া স্বাক্ষৰিত একোখনকৈ স্মাৰকপত্ৰ মাৰ্ঘেৰিটা খণ্ড প্ৰাথমিক শিক্ষা বিষয়াৰ যোগেদি মুখ্য মন্ত্ৰী আৰু শিক্ষা মন্ত্ৰীলৈ প্ৰেৰণ কৰে।
লগতে তেওঁলোকৰ দাবীসমূহ অতি শীঘ্ৰে পূৰণৰ ব্যৱস্থা নকৰিলে তীব্ৰ গণতান্ত্ৰিক আন্দোলন গঢ়ি তোলাৰো হুংকাৰ দিয়ে।
