অসমবাসীৰ বাবে গৌৰৱ কঢ়িয়াই ব্রিকছ দেশবিলাকৰ বিশ্ববিদ্যালয়ৰ ৰেংকিং (২০১8) তালিকাত (যিটো কিউ এছ য়ুনিভাৰ্ছিটি ৰেংকিং নামৰ প্ৰতিষ্ঠানটোৱে কিউ এছ ব্ৰিকছ য়ুনিভাৰ্ছিটি ৰেংকিং নামেৰে কৰি আহিছে) তেজপুৰৰ কেন্দ্ৰীয় বিশ্ববিদ্যালয়ে স্থান লাভ কৰিছে।
উল্লেখযোগ্য যে সমীক্ষাৰ ভিত্তিত বিশ্বৰ বিশ্ববিদ্যালয়বোৰৰ ৰেংকিং প্ৰকাশ কৰা প্ৰতিষ্ঠানবিলাকৰ ভিতৰত কিউ এছ য়ুনিভাৰ্ছিটি ৰেংকিং (QS University Rankings) অন্যতম।
এই প্ৰতিষ্ঠানটোৱে ব্ৰিকছ দেশবিলাকৰ (চীন, ব্ৰাজিল, ভাৰত, ৰাছিয়া আৰু দক্ষিণ আফ্ৰিকা) বাবে সুকীয়া ৰেংকিঙো কৰে। এই ৰেংকিঙত ব্ৰিকছ দেশবিলাকৰ শীৰ্ষ ৩০০খন বিশ্ববিদ্যালয়ৰ তালিকাত ১৪৬ নং স্থান লাভ কৰিছে তেজপুৰ কেন্দ্ৰীয় বিশ্ববিদ্যালয়ে। আনহাতে, ভাৰতৰ শীৰ্ষ ৭৫খন শিক্ষানুষ্ঠানৰ ভিতৰত তেজপুৰ বিশ্ববিদ্যালয়ৰ স্থান হ’ল ৩৬ নম্বৰত।
একাডেমিক ৰেপুটেইশ্যন, ফেকাল্টি ষ্টুডেণ্ট, পি এইচ্ছ ডি ডিগ্ৰীধাৰী ফেকাল্টি ষ্টাফ ৰেপুটেইশ্যন আদিত ভাল নম্বৰ লাভেৰে বিশ্ববিদ্যালয়খনে এই স্থান পাইছে। আনহাতে এম্প্লয়াৰ ৰেপুটেইশ্যন, ইণ্টাৰনেশ্যনেল ষ্টুডেণ্ট আদিত বিশ্ববিদ্যালয়খনে কম নম্বৰ পোৱা বুলি জানিব পৰা গৈছে।
উল্লেখযোগ্য যে বিদ্যায়তনিক আৰু অন্যান্য দিশৰ মান উন্নত হোৱা বাবে তেজপুৰ বিশ্ববিদ্যালয়ে ইয়াৰ পূৰ্বেও ৰাষ্ট্ৰীয় আৰু আন্তঃৰাষ্ট্ৰীয় পৰ্যায়ত সন্মান লাভ কৰি আহিছে।
