তেজপুৰ বিশ্ববিদ্যালয়ৰ নতুন শিক্ষাবৰ্ষৰ নামভৰ্তি প্ৰক্ৰিয়া আৰম্ভ

দেশৰ অন্যতম আগশাৰীৰ কেন্দ্ৰীয় উচ্চ শিক্ষানুষ্ঠান তেজপুৰ বিশ্ববিদ্যালয়ে(TU) ২০২৫-২৬ শিক্ষাবৰ্ষৰ বাবে বিভিন্ন পাঠ্যক্ৰমত নামভৰ্তিৰ বাবে অনলাইন পঞ্জীয়ন প্ৰক্ৰিয়া আৰম্ভ কৰিছে। বিশ্ববিদ্যালয় খনৰ অধীনত প্ৰদান কৰা স্নাতক, স্নাতকোত্তৰ, পিএইচডি, ডিপ্লমা আৰু অন্যান্য পাঠ্যক্ৰম সমূহৰ বাবে আগ্ৰহী ছাত্ৰ-ছাত্ৰীয়ে অনলাইন আবেদন কৰিব পাৰিব।

ৰাষ্ট্ৰীয় শিক্ষানীতি(NEP) ২০২০ৰ প্ৰস্তাৱ অনুসৰি বিশ্ববিদ্যালয়খনত বৰ্তমান সময়ত ৮০টা পাঠ্যক্ৰম প্ৰদান কৰা হৈছে, পাঠ্যক্ৰম সমূহত ৰাষ্ট্রীয় শিক্ষা নীতিৰ নিৰ্দেশনা আৰু সুযোগ সুবিধা সমূহ অন্তৰ্ভুক্ত কৰা হৈছে।

বিজ্ঞান, অভিযান্ত্ৰিক, মানৱিকী আৰু সমাজ বিজ্ঞান, পৰিচালন বিজ্ঞানৰ দৰে বহুতো শাখাত আগ্ৰহী ছাত্ৰ-ছাত্ৰীয়ে পাঠ্যক্ৰম বাছনি কৰিব পাৰিব। পাঠ্যক্ৰমৰ সবিশেষ বিৱৰণ, অৰ্হতা আৰু নামভৰ্তি প্ৰক্ৰিয়াৰ সম্পৰ্কে অধিক তথ্য বিশ্ববিদ্যালয়ৰ ৱেবছাইটত উপলব্ধ কৰোৱা হৈছে। (https://www.tezu.ernet.in/academic/admission2025/)

তেজপুৰ বিশ্ববিদ্যালয়ে ছাত্ৰ-ছাত্ৰীৰ নামভৰ্তিৰ বাবে তেজপুৰ বিশ্ববিদ্যালয় প্ৰৱেশ পৰীক্ষা(TUEE), গেট-বি, স্নাতক আৰু স্নাতকোত্তৰ পৰ্যায়ৰ Common University Entrance Test (CUET-2025), জেইই-মেইনছ, Common Entrance Examination for Design (CEED), UG- National Institute of Design (NID) Design Aptitude Test (DAT), The Undergraduate Common Entrance Examination for Design (UCEED) আদিৰ প্ৰৱেশ পৰীক্ষাৰ নম্বৰৰ ভিত্তিত ছাত্ৰ-ছাত্ৰীক নিৰ্বাচন কৰিব। ইয়াৰোপৰি, ৰাষ্ট্রীয় যোগ্যতা পৰীক্ষা (NET),ৰাজ্যিক যোগ্যতা পৰীক্ষা (SLET), আৰু Graduate Aptitude Test in Engineering (GATE)ৰ নম্বৰৰ ভিত্তিতো ছাত্ৰ-ছাত্ৰীক নিৰ্বাচন কৰা হ’ব।

উল্লেখযোগ্য যে, বিশ্ববিদ্যালয়ৰ প্ৰৱেশ পৰীক্ষাৰ অনলাইন আবেদন পত্ৰ জমা দিয়াৰ শেষ তাৰিখ হৈছে ২০২৫ চনৰ ৩০ এপ্ৰিল। তেজপুৰ বিশ্ববিদ্যালয় প্ৰৱেশ পৰীক্ষা (TUEE) ২০২৫ চনৰ ৬-৮ জুনৰ ভিতৰত অনুষ্ঠিত হ’ব। তেজপুৰ বিশ্ববিদ্যালয়ৰ এই নামভৰ্তি প্ৰক্ৰিয়াই ছাত্ৰ-ছাত্ৰীসকলক এক বৃত্তিমুখী, বহুমুখী আৰু গতিশীল শিক্ষাৰ সুযোগ প্ৰদান কৰিব বুলি আশা কৰা হৈছে।