বিশ্ববিদ্যালয় অনুদান আয়োগৰ ঘোষণা অনুসৰি অহা জুলাই-আগষ্ট-২০২৫ শিক্ষাবৰ্ষৰ পৰা মনোবিজ্ঞান, পুষ্টি, অণুজীৱবিজ্ঞান, জৈৱ-প্ৰযুক্তি, ক্লিনিকেল পুষ্টি আদি স্বাস্থ্যসেৱা-সংযুক্ত পাঠ্যক্ৰমসমূহ অনলাইন বা দূৰশিক্ষা ব্যৱস্থাৰ পৰা বাদ দিয়া হৈছে।
ন্যাশনেল কমিছন ফৰ এলাইড এণ্ড হেল্থকেয়াৰ প্ৰফেচনছ এক্ট, ২০২১ৰ ভিত্তিত এই সিদ্ধান্ত লোৱা হৈছে বুলি সদৰী কৰিছে ইউজিচিয়ে। সংস্থাটোৱে স্পষ্টকৈ জনাইছে যে এই পাঠ্যক্ৰমসমূহত প্ৰয়োজনীয় পঢ়া-শুনাৰ লগতে হাতে-কামে কৰা বা অনুশীলনো অত্যাৱশ্যকীয়, আৰু এইটো অনলাইন মাধ্যমত গুণগতভাৱে সম্ভৱ নহয়।
বৰ্তমান অনুমোদন প্ৰাপ্ত প্ৰতিষ্ঠানসমূহে নিজৰ অনুমোদন প্ৰত্যাহাৰ কৰিব লাগিব আৰু ২০২৫-২৬ শিক্ষাবৰ্ষৰ পৰা নতুনকৈ কোনো নামভৰ্তি কৰিব নোৱাৰিব বুলি ঘোষণা কৰিছে। অৱশ্যে বি.এ. ডিগ্ৰী বা অন্য বহুতো সাধাৰণ পাঠ্যক্ৰম অনলাইনতে উপলব্ধ থাকিব, কেৱল মনোবিজ্ঞান বা স্বাস্থ্যসেৱা-সংযুক্ত বিষয়বোৰক ইয়াৰ পৰা বাদ দিয়া হ’ব।
বিশেষজ্ঞসকলে এই সিদ্ধান্তক সমৰ্থন জনাইছে, যদিও তেওঁলোকে সকীয়াই দিছে যে ইয়াৰ ফলত স্বাস্থ্যসেৱা শিক্ষাৰ প্ৰৱেশ সীমিত হ’ব পাৰে। সেয়ে তেওঁলোকে ইউজিচিক আহ্বান জনাইছে যে অন-কেম্পাছ পাঠ্যক্ৰমত আসনৰ অভাৱ দূৰ কৰি সকলোৰে বাবে শিক্ষা সহজলভ্য কৰাৰ ব্যৱস্থা কৰিব লাগিব।
