অৱশেষত জল্পনা-কল্পনাৰ অন্ত পৰিল। অৱশেষত উদ্ধৱ আৰু ৰাজ থাকৰে হাতে হাত ধৰি নিৰ্বাচনত প্ৰতিদ্বন্দ্বিতা কৰিবলৈ ওলাইছে। শিৱসেনা উদ্ধৱ ফৈদৰ আনজন নেতা তথা সাংসদ সঞ্জয় ৰাৱটে অক্টোবৰত একেলগে বৃহনমুম্বাই পৌৰ নিগমৰ নিৰ্বাচনত প্ৰতিদ্বন্দ্বিতা কৰিব বুলি নিশ্চিত কৰিছে।
শুকুৰবাৰে সঞ্জয় ৰাৱটে কয় যে, উদ্ধৱ থাকৰে আৰু ৰাজ থাকৰে আগন্তুক মুম্বাই পৌৰ নিগমৰ নিৰ্বাচনত একেলগে প্ৰতিদ্বন্দ্বিতা কৰিব আৰু তেওঁলোকে নিশ্চিতভাৱে জয়ী হ’ব। দুয়ো ভাতৃৰ যৌথ শক্তি আৰু মাৰাঠী জনসাধাৰণৰ ঐক্যতাই এই জয়ৰ চাবিকাঠি হ’বলৈ গৈ আছে।
সুদীৰ্ঘ ২০ বছৰৰ অন্তত শেহতীয়াকৈ থাকৰে পৰিয়াল দুটাৰ ওচৰ চাপিছে। আচলতে ৰাজনৈতিক কাৰণত দুয়োজন ভাতৃয়ে হাত মিলাইছে। কাৰণ, শেহতীয়াকৈ মহাৰাষ্ট্ৰৰ বিধানসভা নিৰ্বাচনত দুয়োটা দলে মৰ্মান্তিক পৰাজয়ৰ সন্মুখীন হৈছে। উদ্ধৱে কেনেবাকৈ মুম্বাই অঞ্চলত জীয়াই থাকিবলৈ সক্ষম হৈছে। আৰু ৰাজ থাকৰে নিজৰ পুত্ৰকো নিৰ্বাচিত কৰিব নোৱাৰিলে। দুয়োটা দলেই এতিয়া অস্তিত্ব সংকটৰ সন্মুখীন হৈছে। সেইবাবেই ৰাজনৈতিক মহলে বিশ্বাস কৰে যে দুয়োজন ভাতৃয়ে একেলগে বিএমচিৰ নিৰ্বাচনত যুঁজ দিয়াৰ সিদ্ধান্ত লৈছে।
