বিহু, অসমীয়া জাতীয় স্বাভিমানৰ ৰূপৰেখা। এই বিহুৰ স্বকীয়তা বিনষ্ট নোহোৱাকৈ আৰম্ভ কৰা বিহু সন্মিলনীসমূহৰ সাম্প্রতিক সময়ত ভূমিকাক লৈ বহু প্ৰশ্নচিহ্নৰ সৃষ্টি হৈছে। কিন্তু বর্তমান সময়ত এই বিহুৰ পৰম্পৰা আৰু জাতীয় কৃষ্টিৰ উত্তৰণৰ বাবে কাম কৰা বিহু সন্মিলনী বহু কম সংখ্যকহে আছে।
তেনে এখন বিহু সন্মিলন হৈছে নলবাৰী জিলাৰ বলোৱা প্ৰগতি সংঘৰ সৌজন্যত আয়োজন কৰা ৰঙালী বিহু সন্মিলন। ৪২ বছৰত ভৰি দিয়া এইখন বিহুৰ আছে বহু স্বকীয় বৈশিষ্ট্য।
আজিকালি বিহু সন্মিলনসমূহত দেখিবলৈ পোৱা যায় নামী-দামী শিল্পীৰ বিভিন্ন সাংস্কৃতিক অনুষ্ঠান। কিন্তু বলোৱা অঞ্চলৰ এইখন বিহুৱে এই যান্ত্ৰিকতাৰ মাজতো ১ ব’হাগৰ দিনা গাঁৱৰ প্ৰতিজন জেষ্ঠৰ ভৰিত সেৱা জনাই বিহুৱান দিয়াৰ পৰম্পৰা ধৰি ৰাখিছে বুলি বিহু সন্মিলনখনৰ সক্রিয় সদস্য ৰমেন শৰ্মাই জানিবলৈ দিয়ে।
মানসজ্যোতি শৰ্মাৰ সভাপতিত্ব আৰু সম্পাদকত্ৰয় ক্রমে বনমালী দাস, মনোজ ডেকা আৰু বিকাশ ডেকাৰ নেতৃত্বত এইখন বিহুৰ অন্য এক আকর্ষণ খেল-ধেমালি প্রতিযোগিতা, ভেশচন প্রতিযোগিতা, কুইজ প্ৰতিযোগিতা, অসমীয়া গীতৰ আধাৰত একক নৃত্য প্ৰতিযোগিতা আদি প্রতিযোগিতা অনুষ্ঠিত হ’ব।১২ আৰু ১৩ ব’হাগত বলোৱা দৌল বাকৰিত দুকুৰি অতিক্ৰম কৰা বিহুখনৰ মূল অনুষ্ঠান আৰু প্ৰতিযোগিতাসমূহ অনুষ্ঠিত হ’ব। বলোৱাবাসী ৰাইজে এই অনুষ্ঠানটিৰ সফলতা অন্তঃকৰণেৰে কামনা কৰিছে।
